ଢେଙ୍କାନାଳ ଅଫିସ, ୨୫।୯-ତେଲେଙ୍ଗାନାର କରିମ୍ନଗରସ୍ଥିତ ଆମ୍ବେଡକର ସ୍ପୋଟର୍ସ ଇନ୍ଡୋର ଷ୍ଟାଡିୟମରେ ଆୟୋଜିତ ୱାକୋ ଇଣ୍ଡିଆ ଜୁନିୟର କିକ୍ ବକ୍ସିଂ ପ୍ରତିଯୋଗିତାରେ ଢେଙ୍କାନାଳର କ୍ରୀଡ଼ାବିତ୍ମାନେ ପ୍ରଭାବୀ ପ୍ରଦର୍ଶନ କରିଛନ୍ତି। ପ୍ରତିଯୋଗିତାରେ ଭାଗନେଇଥିବା ଖେଳାଳିମାନେ ୫ ସ୍ବର୍ଣ୍ଣ, ୨ରୌପ୍ୟ, ୪ ବ୍ରୋଞ୍ଜ୍ ସହ ମୋଟ ୧୧ ପଦକ ହାସଲ କରିଛନ୍ତି।
ସେପ୍ଟେମ୍ବର ୧୭ରୁ ୨୦ ମଧ୍ୟରେ ଅନୁଷ୍ଠିତ ଏହି ପ୍ରତିଯୋଗିତାରେ ଓଡ଼ିଶା ଦଳରେ ଜିଲାର ୬ଜଣ ଖେଳାଳି ପ୍ରତିନିଧିତ୍ୱ କରିଥିଲେ। ସେମାନଙ୍କ ମଧ୍ୟରେ ଲକି ବିଶ୍ୱାଳ, ବାବି ପ୍ରତିହାରୀ, ଲିପ୍ସା ସିଂ, ସୁଦାମ ମହନ୍ତ, ଦୁଲାରାମ ହାଂସଦା, ରୂପେନ୍ଦ୍ର ମାରାଣ୍ଡି ଥିଲେ। ସମ୍ପୃକ୍ତ ଖେଳାଳିମାନେ ଡାଇମଣ୍ଡ କିକ୍ ବକ୍ସିଂ ଆସୋସିଏଶନ ଅଧୀନରେ ପ୍ରଶିକ୍ଷଣ ନେଉଛନ୍ତି। ପ୍ରତିଯୋଗିତାରେ ଭାଗନେଇ ଫେରିବା ପରେ ସେମାନଙ୍କୁ ବିଭିନ୍ନ ମହଲରେ ଶୁଭେଚ୍ଛା ଜ୍ଞାପନ କରାଯାଇଛି।