ନୂଆଦିଲ୍ଲୀ,୨୦।୫ – ଜୁନ୍ ପହିଲାରୁ ସାରା ଦେଶରେ ୨୦୦ ସ୍ବତନ୍ତ୍ର ଅଣ ଏସି ପାସେଞ୍ଜର ଟ୍ରେନ ଚଳାଚଳ କରିବ। କେନ୍ଦ୍ର ରେଳ ମନ୍ତ୍ରୀ ପୀୟୂଷ ଗୋୟଲ ଟୁଇଟ ଯୋଗେ ମଙ୍ଗଳବାର ଏହି ସୂଚନା ଦେଇଛନ୍ତି। ଏହି ଟ୍ରେନଗୁଡିକ ଲାଗି ଲୋକମାନେ ଆଇଆର୍ସିଟିସି ଓ୍ବେବସାଇଟ କିମ୍ବା ଆପ୍ଲିକେଶନରୁ ଟିକେଟ ବୁକିଂ କରିପାରିବେ। ବର୍ତ୍ତମାନ ଷ୍ଟେଶନଗୁଡିକରେ ଟିକେଟ ବୁକିଂ କାଉଣ୍ଟର ବନ୍ଦ ଥିବାରୁ ସେଠାରେ କୌଣସି ଟିକେଟ ଉପଲବ୍ଧ ହେବ ନାହିଁ। ନୂଆ ଟ୍ରେନଗୁଡିକ ଲାଗି ଶୀଘ୍ର ଟିକେଟ ବୁକିଂ ଆରମ୍ଭ ହେବ। ସେହିଭଳି ଟ୍ରେନ ଚାଲିବା ନେଇ ସମୟ ସାରଣୀ ମଧ୍ୟ ଶୀଘ୍ର ଜାରି କରାଯିବ ବୋଲି ରେଳ ମନ୍ତ୍ରଣାଳୟ ପକ୍ଷରୁ ସୂଚନା ରହିଛି। ମେ ୧୨ଠାରୁ ସ୍ବତନ୍ତ୍ର ପାସେଞ୍ଜର ଟ୍ରେନ ପରିଚାଳନା ନେଇ ସରକାର ବ୍ୟବସ୍ଥା କରିଛନ୍ତି। ପ୍ରାରମ୍ଭିକ ପର୍ଯ୍ୟାୟରେ କେବଳ ୧୫ ଯୋଡା ଟ୍ରେନ ଚଳାଚଳ କରୁଛି। ଟ୍ରେନଗୁଡିକ ନୂଆଦିଲ୍ଲୀ ଷ୍ଟେଶନରୁ ଦିବ୍ରୁଗଡ, ଅଗରତାଲା, ହାଓଡା, ପାଟନା, ବିଳାସପୁର, ରାଞ୍ଚି, ଭୁବନେଶ୍ୱର, ସିକନ୍ଦରାବାଦ,ବାଙ୍ଗାଲୋର, ଚେନ୍ନାଇ, ଥିରୁଭାନନ୍ତପୁରମ, ମୁମ୍ବାଇ ସେଣ୍ଟ୍ରାଲ, ଅହମ୍ମଦାବାଦ, ଜମ୍ମୁ ତାଓ୍ବି ଭଳି ସ୍ଥାନଗୁଡିକୁ ଚଳାଚଳ କରୁଛି। ଟିକେଟ ବୁକିଂ ସମୟରେ ଯାତ୍ରୀଙ୍କୁ ସେମାନଙ୍କ ଗନ୍ତବ୍ୟସ୍ଥଳର ଠିକଣା ସମ୍ପୂର୍ଣ୍ଣ ଭାବେ ଦିଆଯିବାକୁ କୁହାଯାଇଛି। କୋଭିଡ୍-୧୯ ଲାଗି କଣ୍ଟାକ୍ଟଟ୍ରେସିଂ ଲାଗି ଏଭଳି ପଦକ୍ଷେପ ଗ୍ରହଣ କରାଯାଇଥିବା ସୂଚନା ରହିଛି।