ଭୁବନେଶ୍ୱର,୨୫।୫(ବ୍ୟୁରୋ)- ଝାରସୁଗୁଡ଼ା ବୀର ସୁରେନ୍ଦ୍ର ସାଏ ବିମାନବନ୍ଦରରୁ ଭୁବନେଶ୍ୱର ଓ ଛତିଶଗଡ଼ ରାଜଧାନୀ ରାୟପୁରକୁ ବିମାନ ଉଡ଼ିବ। ଆସନ୍ତା ଜୁନ୍ ୧ରୁ ଏହି ସେବା ଆରମ୍ଭ ହେବ। ଆଲିଏନ୍ସ ଏୟାର ଏହି ସେବା ପ୍ରଦାନ କରିବ ବୋଲି ବିମାନବନ୍ଦର ନିର୍ଦ୍ଦେଶକ ସୁଦେଶ କୁମାର ଚୌହାନ କହିଛନ୍ତି। ଆଲିଏନ୍ସ ଏୟାର ତରଫରୁ ଏଟିଆର୍-୭୨ ବିମାନ ଚଳାଚଳ କରାଯିବ, ଯେଉଁଥିରେ ୭୨ଜଣ ଯାତ୍ରା କରିପାରିବେ। ସୂଚନାଯୋଗ୍ୟ, ଆଲିଏନ୍ସ ଏୟାର ହେଉଛି ଏୟାର ଇଣ୍ଡିଆର ଏକ ସବ୍ସିଡାଏରୀ ସଂସ୍ଥା। ଝାରସୁଗୁଡ଼ା-ଭୁବନେଶ୍ୱର ବିମାନର ସମୟସୂଚୀ ବାହାରିଯାଇଛି। ପ୍ରତିଦିନ ସକାଳ ୯ଟା ୫ରୁ ଭୁବନେଶ୍ୱରରୁ ଉଡ଼ାଣ ଆରମ୍ଭ କରି ପୂର୍ବାହ୍ନ ୧୦ଟା ୧୦ରେ ଝାରସୁଗୁଡ଼ା ବିମାନବନ୍ଦରରେ ଅବତରଣ କରିବ। ସେହିପରି ପୂର୍ବାହ୍ନ ୧୦ଟା ୩୦ରୁ ଝାରସୁଗୁଡ଼ା ବିମାନବନ୍ଦରରୁ ଉଡ଼ାଣ ଆରମ୍ଭ କରି ୧୧ଟା ୪୦ରେ ଭୁବନେଶ୍ୱରରେ ଅବତରଣ କରିବ। ଝାରସୁଗୁଡ଼ା-ରାୟପୁର ପାଇଁ ଖୁବ୍ଶୀଘ୍ର ସମୟସୂଚୀ ବାହାର କରାଯିବ। ଆଗକୁ ଝାରସୁଗୁଡ଼ା-କୋଲକାତା ରୁଟ୍ରେ ବିମାନ ଚଳାଚଳ ହେବ ବୋଲି ନିର୍ଦ୍ଦେଶକ ସୁଦେଶ ଚୌହାନ କହିଛନ୍ତି। ସୂଚନାଯୋଗ୍ୟ, ଝାରସୁଗୁଡ଼ାରୁ ଅନ୍ୟ ସହରକୁ ଉଡ଼ୁଥିବା ବିମାନରେ ଗତ ମାର୍ଚ୍ଚ ମାସରେ ୪,୬୯୨ଜଣ ଯାତ୍ରୀ(ପ୍ରତିଦିନ ୧୭୦) ବାହାରକୁ ଯାତ୍ରା କରିଥିବା ବେଳେ ୫,୧୨୦ଜଣ(ପ୍ରତିଦିନ ୧୮୫) ଝାରସୁଗୁଡ଼ା ବିମାନବନ୍ଦରକୁ ଆସିଛନ୍ତି।