କଟକ ଅଫିସ,୨୨।୪: ସମ୍ପ୍ରତି ଲକ୍ଡାଉନ୍ ଜାରିଥିବାରୁ ହାଇକୋର୍ଟରେ ଭିଡିିଓ କନ୍ଫରେନ୍ସିଂ ଜରିଆରେ ଶୁଣାଣି ଚାଲିଛି। ଏଥିପାଇଁ ଗତ ୯ ତାରିଖଠାରୁ ‘ଓଡ଼ିଶା ହାଇକୋର୍ଟ ଇ-ଫାଇଲିଂ ଆଣ୍ଡ ଭିଡିିଓ କନ୍ଫରେନ୍ସିଂ ସ୍କିମ୍-୨୦୨୦’ ଆରମ୍ଭ ହୋଇଛି। ଏହି ସ୍କିମ୍ ଅନୁଯାୟୀ ଭିଡିିଓ କଲ୍, ବିଶେଷ ଭାବେ ହ୍ବାଟ୍ସଆପ୍ରେ ଭିଡିଓ କଲ୍ କିମ୍ବା ଜୁମ୍ ଆପ୍ରେ ଭିଡିିଓ କନ୍ଫରେନ୍ସିଂ କରାଯାଉଛି। ତେବେ ଜୁମ୍ ଆପ୍କୁ ନେଇ କେନ୍ଦ୍ର ଗୃହ ମନ୍ତ୍ରଣାଳୟ ଆପତ୍ତି ଉଠାଇଥିବାରୁ ହାଇକୋର୍ଟରେ ଭିଡିଓ କନ୍ଫରେନ୍ସିଂରେ ଏହି ଆପ୍ ବ୍ୟବହାର ନ କରିବାକୁ ନିର୍ଦ୍ଦେଶ ଜାରି ହୋଇଛି। ହାଇକୋର୍ଟ ରେଜିଷ୍ଟ୍ରାର୍ ଜେନେରାଲ୍ଙ୍କ ପକ୍ଷରୁ ଏହି ନିର୍ଦ୍ଦେଶ ଦିଆଯାଇଛି।
ଅନେକ ଘରୋଇ ଏବଂ ସରକାରୀ ଅନୁଷ୍ଠାନ ନିଜ କର୍ମଚାରୀଙ୍କ ସହ ଭିଡିଓ କନ୍ଫରେନ୍ସିଂ ପାଇଁ ଜୁମ୍ ଆପ୍କୁ ବ୍ୟବହାର କରୁଛନ୍ତି। ବର୍ତ୍ତମାନ ଲକ୍ଡାଉନ୍ ସମୟରେ ଏହି ଆପ୍ ବହୁଳ ଭାବେ ଲୋକପ୍ରିୟ ହୋଇପାରିଛି। ତେବେ ଗତ ଗୁରୁବାର ଆପ୍କୁ ନେଇ କେନ୍ଦ୍ର ଗୃହ ମନ୍ତ୍ରଣାଳୟ ଆପତ୍ତି ଉଠାଇଥିଲା। ଆପ୍ ବ୍ୟବହାର ଅସୁରକ୍ଷିତ ଏବଂ ଏହାଦ୍ୱାରା ସାଇବର୍ ଠକେଇର ସମ୍ଭାବନା ଅଧିକ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା। ବ୍ୟବହାରୀଙ୍କ ଗୋପନୀୟ ତଥ୍ୟ ପ୍ରଘଟ ହେଉଥିବା ଏବଂ ଆଗାମୀ ଦିନରେ ଏହାକୁ ସାଇବର୍ ଅପରାଧୀମାନେ ବ୍ୟବହାର କରିପାରନ୍ତି ବୋଲି ମନ୍ତ୍ରଣାଳୟ ସତର୍କ କରାଇଥିଲା। ଏହା ପରେ ହାଇକୋର୍ଟ ପକ୍ଷରୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଜୁମ୍ ଆପ୍ର ବ୍ୟବହାରକୁ ବାରଣ କରାଯାଇଛି। ତେବେ ଆବେଦନକାରୀମାନେ ପୂର୍ବବତ ‘ଭିଡୟୋ’ ଆପ୍ କିମ୍ବା ହ୍ବାଟ୍ସଆପ୍ ଭିଡିିଓ କଲିଂର ବ୍ୟବହାର କରିପାରିବେ। ସେହିଭଳି ହାଇକୋର୍ଟ ପରିସରରେ ଏକ ସ୍ବତନ୍ତ୍ର ଭିଡିିଓ କନଫରେନ୍ସିଂ ହଲ୍ କରାଯାଇଛି। ଯେଉଁମାନେ ଚାହିଁବେ, ସେଠାରୁ ଭିଡିିଓ କନ୍ଫରେନ୍ସି ମାଧ୍ୟମରେ ଶୁଣାଣିରେ ଭାଗନେଇପାରିବେ ବୋଲି ହାଇକୋର୍ଟ ରେଜିଷ୍ଟ୍ରାର୍ ଜେନେରାଲ୍ଙ୍କ ପକ୍ଷରୁ କୁହାଯାଇଛି।