କଟକ ଅଫିସ,୨୭ା୫: ରେଭେନ୍ଶା ବିଶ୍ୱବିଦ୍ୟାଳୟର ସମସ୍ତ ପରୀକ୍ଷା ଜୁଲାଇ ୨୪ ସୁଦ୍ଧା ସରିବ। ଜୁନ୍ ୧୭ ପରେ ବିଶ୍ୱବିଦ୍ୟାଳୟ ଖୋଲିଲେ ବାକି ଥିବା ସମସ୍ତ ପରୀକ୍ଷା ସାରିବା ପାଇଁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ନିଷ୍ପତ୍ତି ନେଇଛନ୍ତି। ଲକ୍ଡାଉନ୍ ପୂର୍ବରୁ କିଛି ବିଭାଗରେ ଇଣ୍ଟରନାଲ ପରୀକ୍ଷା ହୋଇ ନ ଥିଲା। ଏହାକୁ ଅନଲାଇନ ମାଧ୍ୟମରେ କରାଯାଉଛି ବୋଲି କୁଳପତି ପ୍ରଫେସର ଇଶାନ କୁମାର ପାତ୍ର କହିଛନ୍ତି।
ଲକ୍ଡାଉନ୍ ପାଇଁ ରାଜ୍ୟରେ ସ୍ନାତକ ଦ୍ୱିତୀୟ ଓ ଚତୁର୍ଥ ସେମିଷ୍ଟର ଏବଂ ସ୍ନାତକୋତ୍ତରର ଦ୍ୱିତୀୟ ସେମିଷ୍ଟର ପରୀକ୍ଷା ବାତିଲ କରାଯାଇଛି। ବିଶ୍ୱବିଦ୍ୟାଳୟ ଏଥିପାଇଁ ବିକଳ୍ପ ବ୍ୟବସ୍ଥା କରିବାକୁ ଉଚ୍ଚଶିକ୍ଷା ବିଭାଗ ଘୋଷଣା କରିଛି। ଏହାକୁ ବାଦ୍ ଦେଇ ଛାତ୍ରୀଛାତ୍ରଙ୍କୁ ବାକି ଥିବା ସମସ୍ତ ପରୀକ୍ଷା ଦେବାକୁ ପଡ଼ିବ। ଏହି ପରୀକ୍ଷା ସବୁ ଜୁଲାଇ ୨୪ ସୁଦ୍ଧା ସାରିବାକୁ ରେଭେନ୍ଶା ବିଶ୍ୱବିଦ୍ୟାଳୟ ପକ୍ଷରୁ ନିଷ୍ପତ୍ତି ନିଆଯାଇଛି। ବିଶ୍ୱବିଦ୍ୟାଳୟ ଖୋଲିବା ପରେ କରୋନା ସ୍ଥିତିକୁ ଦୃଷ୍ଟିରେ ରଖି କେବେ ପରୀକ୍ଷା ହେବ, ସେ ନେଇ ସୂଚନା ଦିଆଯିବ ବୋଲି କୁଳପତି କହିଛନ୍ତି। କିଛି ବିଭାଗରେ ଲକ୍ଡାଉନ୍ ପୂର୍ବରୁ ଇଣ୍ଟରନାଲ ହୋଇପାରି ନ ଥିଲା। ଯେଉଁ ବିଭାଗରେ ପରୀକ୍ଷା ହୋଇନାହିଁ, ତାହାର ଛାତ୍ରୀଛାତ୍ରଙ୍କୁ ଅନ୍ଲାଇନ୍ରେ ପ୍ରଶ୍ନପତ୍ର ଦିଆଯିବ। ପରୀକ୍ଷା ପାଇଁ ଏକ ନିର୍ଦ୍ଦିଷ୍ଟ ସମୟ ରଖାଯିବା ସହ ଉତ୍ତରଖାତାକୁ ଛାତ୍ରୀଛାତ୍ରମାନେ ନିଜ ବିଭାଗର ମୁଖ୍ୟଙ୍କୁ ହ୍ବାଟ୍ସଆପ୍ କିମ୍ବା ମେଲ୍କୁ ପଠାଇାବେ। ଯେଉଁମାନେ ପରୀକ୍ଷା ଦେବାରେ ଅସଫଳ ହେବେ, ସେମାନଙ୍କୁ ପୁନଃ ପରୀକ୍ଷା ଦେବା ପାଇଁ ବ୍ୟବସ୍ଥା କରାଯିବ ବୋଲି କୁଳପତି କହିଛନ୍ତି।