ମୁମ୍ବାଇ,୭।୧: ଜେଏନ୍ୟୁ ହିଂସାକୁ ନେଇ ମୁମ୍ବାଇର ଗେଟ୍ ଓ୍ବେ ଅଫ୍ ଇଣ୍ଡିଆରେ ବିରୋଧ ପ୍ରଦର୍ଶନ ସମୟରେ ସାମ୍ନାକୁ ଆସିଥିବା ‘ଫ୍ରି କଶ୍ମୀର’ ପୋଷ୍ଟରକୁ ନେଇ ଏବେ ବିବାଦ ମୁଣ୍ଡ ଟେକିଛି। ହେଲେ ଏହି ପୋଷ୍ଟରକୁ ଧରିଥିବା ଯୁବତୀ ଜଣକ ଏ ନେଇ ଏକ ଭିଡିଓ ଜାରି କରି ଏହା ଉପରେ ସଫେଇ ଦେଇଛନ୍ତି। ମେହେକ ପ୍ରଭୁ ନାମକ ଏହି ଯୁବତୀ ଜଣକ କହିଛନ୍ତି ‘ଫ୍ରି କଶ୍ମୀର’ ପୋଷ୍ଟର ଦେଖାଇବାରେ ତାଙ୍କର ସେମିତି କୌଣସି ଉଦ୍ଦେଶ୍ୟ ନ ଥିଲା। ସେଠରେ ପଡିଥିବା ଏହି ପୋଷ୍ଟରଟିକୁ ଉଠାଇ ସେ କଶ୍ମୀରରେ ବନ୍ଦ ରହିଥିବା ମୋବାଇଲ ଓ ଇଣ୍ଟରନେଟ୍ ସେବାକୁ ପୁଣିଥରେ ଚାଲୁ କରିବାକୁ କହିବାକୁ ଚାହୁଁଥିଲେ ବୋଲି କହିଛନ୍ତି। ଇନଷ୍ଟାଗ୍ରାମରେ ସେ ତାଙ୍କର ଏହି ଭିଡିଓଟି ଅପଲୋଡ କରିଛନ୍ତି। ମେହେକ ଆହୁରି ମଧ୍ୟ କହିଛନ୍ତି ସେ କଶ୍ମୀରର ନୁହେଁ ବରଂ ମୁମ୍ବାଇ ବାସିନ୍ଦା। ଆଉ ସେ କୌଣସି ସଙ୍ଗଠନର ସଦସ୍ୟ ମଧ୍ୟ ନୁହଁନ୍ତି। ସୂଚନାଯୋଗ୍ୟ, ଏବେ ଏହି ପୋଷ୍ଟରକୁ ନେଇ ରାଜନୀତି ଆରମ୍ଭ ହୋଇଯାଇଥିବା ବେଳେ ଏହାକୁ ନେଇ ଭାରତୀୟ ଜନତା ପାର୍ଟି(ଭାଜପା) ମହାରାଷ୍ଟ୍ର ସରକାରଙ୍କୁ ଟାର୍ଗେଟ କରିଛନ୍ତି।