ନୂଆଦିଲ୍ଲୀ, ୧୫।୭: କଥାରେ ଅଛି ଯଦି ଧୈର୍ଯ୍ୟ, ସାହସ, ପରିଶ୍ରମ ଏବଂ ଇଚ୍ଛାଶକ୍ତି ଅଛି ତେବେ ସଫଳତା ପାଇବା ଆଦୌ କଷ୍ଟକର ନୁହେଁ। ଏହି ୪ ସୁଗୁଣ ସମ୍ପନ୍ନ ଯୁବକ ହେଉଛନ୍ତି ରାମଜଳ ମୀନା। ଜବାହରଲାଲ ନେହେରୁ ବିଶ୍ୱବିଦ୍ୟାଳୟ(ଜେଏନୟୁ)ରେ ୫ ବର୍ଷ ହେଲା ସିକ୍ୟୁରିଟି ଗାର୍ଡ ଭାବେ କାର୍ଯ୍ୟ କରୁଥିବା ମୀନା ଏବେ ସେଠାରେ ପାଠ ପଢିବାକୁ ଯୋଗ୍ୟ ବିବେଚିତ ହୋଇଛନ୍ତି। ଜେଏନୟୁରେ ଏଣ୍ଟ୍ରାନ୍ସ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ଯେଉଁଠି ସେ ଲାଇବ୍ରେରୀ କ୍ଲାସରୁମ୍ ବାହାରେ ପହରା ଦେଉଥିଲେ ଏବେ ଭିତରେ ବସି ପାଠ ପଢିବେ। ରାଜସ୍ଥାନରେ କିରୌଲି ଜିଲାରୁ ଆସିଥିବା ମୀନା ମାତ୍ର ୧୬ବର୍ଷ ବୟସରେ ବିବାହ କରିଥିଲେ। ଫଳରେ ତାଙ୍କ ପାଠ ପଢାରେ ଡୋରୀ ଲାଗିଯାଇଥିଲା। ଚାକିରି ସନ୍ଧାନରେ ନୂଆଦିଲ୍ଲୀ ଆସିଥିବା ରାମଜଳ ଜେଏନୟୁରେ ସିକ୍ୟୁରିଟି ଗାର୍ଡ ଭାବେ କାମ ଆରମ୍ଭ କରିଥିଲେ। କିନ୍ତୁ ପାଠପଢା ଛାଡି ନ ଥିଲେ। କାମ ସହ ପାଠପଢା ବି ଜାରି ରଖିଥିଲେ। ରାମଜଳଙ୍କ ପାଠପଢା ପ୍ରତି ନିଶା ଦେଖି ତାଙ୍କୁ ବିଶ୍ୱବିଦ୍ୟାଳୟର କିଛି ଛାତ୍ର ଏବଂ ପ୍ରଫେସର ପ୍ରୋତ୍ସାହିତ କରିଥିଲେ। ଶେଷରେ ସେ ସଫଳତା ପାଇଥିଲେ।