ବନ୍ତଳା, ୪।୮(ଡି.ଏନ.ଏ): ଜେଜେମା’ଙ୍କ ନିଷ୍ଠୁରତା। ପଡୋଶୀ ଘରେ ଯାଇ ଖାଇବାରୁ ତିନି ବର୍ଷର ଶିଶୁ କନ୍ୟାକୁ ଜେଜେମା ମାଡ଼ ମାରି ଘର ଭିତରେ ରଖି ତାଲା ପକାଇବା ଖବର ଜିଲାରେ ଚର୍ଚ୍ଚାର ବିଷୟ ହୋଇଛି। ଅନୁଗୋଳ ଜିଲା ବନ୍ତଳା ଥାନା ଗଡ଼ ତରାଶ ଗ୍ରାମରେ ଘଟିଛି ଏଭଳି ଅଭାବନୀୟ ଘଟଣା। ପୋଲିସ ଘଟଣାସ୍ଥଳରେ ପହଞ୍ଚି ଶିଶୁଟିକୁ ଉଦ୍ଧାର କରିଛି। ଶିଶୁ କନ୍ୟାର ଜେଜେମା, ଜେଜେବାପା ଓ ବାପାଙ୍କୁ ଥାନାରେ ଅଟକ ରଖି ପଚରାଉଚରା ଚଳାଇଛି ପୋଲିସ।
ସୂଚନାଯୋଗ୍ୟ, ଗଡ଼ ତରାଶ ଗ୍ରାମର ଅସିତ ରାଉତଙ୍କ ସ୍ତ୍ରୀ ଦୀପ୍ତି (୨୨)ଙ୍କର ବର୍ଷେ ପୂର୍ବରୁ ମୃତ୍ୟୁ ହୋଇଥିଲା। ତାଙ୍କ ଔରଷରୁ ଦୁଇଟି ଶିଶୁ କନ୍ୟା (୫ବର୍ଷ ଓ ୩ ବର୍ଷ) ଅଛନ୍ତି। ସାନ ଝିଅକୁ ତାଙ୍କ ଜେଜେମା କୁମୁଦିନୀ ରାଉତ ଅକଥନୀୟ ନିର୍ଯାତନା ଦେବା ସହ ମାଡ଼ ମାରିଥାନ୍ତି। ଏପରିକି ପାଇଖାନା ଏବଂ ଶୋଇବା ଘରେ ତାଲା ପକାଇ ଦୀର୍ଘ ସମୟ ରଖି ନିର୍ଯାତନା ଦିଅନ୍ତି ବୋଲି ଗ୍ରାମବାସୀ ପ୍ରକାଶ କରିଛନ୍ତି। ଗାଁ କାଳିକା ମନ୍ଦିର ସମ୍ମୁଖ କୂଅ ନିକଟରେ ରାତ୍ରି ପର୍ଯ୍ୟନ୍ତ ବସାଇଥାନ୍ତି। ଗ୍ରାମବାସୀ ଏହାର ବିରୋଧ କଲେ କୁମୁଦିନୀ ଅସଭ୍ୟ ଭାଷାରେ ଗାଳିଗୁଲଜ କରିଥାନ୍ତି। ରବିବାର ସକାଳେ ଅଙ୍ଗନଓ୍ବାଡି ଶିକ୍ଷୟିତ୍ରୀ, ପଞ୍ଚାୟତ ସମିତି ସଭ୍ୟଙ୍କ ସମ୍ମୁଖରେ ଜେଜେମା’ ଶିଶୁକନ୍ୟାକୁ ଅକଥନୀୟ ମାଡ଼ ମାରିବା ସହିତ ଘର ଭିତରେ ପୂରାଇ ବାହାରେ ତାଲା ପକାଇ ଦେଇଥିଲେ। ଶିଶୁଟି କାନ୍ଦିବା ସହିତ ପାଣି ମଧ୍ୟ ମାଗିଥିଲା। ଅଙ୍ଗନଓ୍ବାଡି ଶିକ୍ଷୟିତ୍ରୀ ଓ ସମିତି ସଭ୍ୟ ଏହାକୁ ବିରୋଧ କରିବା ସହିତ ତାଲା ଖୋଲିବା ପାଇଁ କହିଥିଲେ ମଧ୍ୟ ସେ ଖୋଲି ନ ଥିଲେ। ପରବର୍ତ୍ତୀ ସମୟରେ ଏନେଇ ସ୍ଥାନୀୟ ଖବରଦାତାଙ୍କୁ ଜଣାଇବା ସହ ଜିଲା ଶିଶୁ ମଙ୍ଗଳ ଅଧିକାରୀ ଓ ବନ୍ତଳା ଥାନା ଆଇଆଇସିଙ୍କୁ ମଧ୍ୟ ଜଣାଇଥିଲେ। ପୋଲିସ ଏଏସଆଇ ବିଏନ ସାହୁ ଫୋର୍ସ ସହ ଖବରଦାତା ପହଞ୍ଚିବା ପୂର୍ବରୁ ଗ୍ରାମବାସୀ ଓ ସରପଞ୍ଚଙ୍କ ହସ୍ତକ୍ଷେପରେ ଶିଶୁ କନ୍ୟାକୁ ଉଦ୍ଧାର କରିଥିଲେ। ପୋଲିସ ପହଞ୍ଚି ତଦନ୍ତ କରିବା ସହିତ ଦୁଇ ଶିଶଙ୍କୁ ଉଦ୍ଧାର କରି ଜେଜେମା କୁମିଦିନୀଙ୍କୁ ଥାନାକୁ ଆଣି ଅଟକ ରଖିଛନ୍ତି। ଶିଶୁ ଦ୍ୱୟଙ୍କୁ ସିଡବ୍ଲୁସିକୁ ହସ୍ତାନ୍ତର କରାଯାଇଛି। ଏହାପୂର୍ବରୁ ଶନିବାର ୭ ବର୍ଷର ନାତିକୁ ତଳେ ପକାଇ ଜଣେ ଜେଜେ ମା’ ଗୋଇଠା ମାରୁଥିବା ଦୃଶ୍ୟ ବାଲେଶ୍ୱର ଜିଲା ବସ୍ତା ଅଞ୍ଚଳରେ ଭାଇରାଲ ହୋଇଥିଲା।