ଅନୁଗୋଳ ଅଫିସ, ୧୧।୧୦-ବୟସ୍କ ରୋଗୀ ବା ବରିଷ୍ଠ ନାଗରିକଙ୍କ ଚିକିତ୍ସା ପାଇଁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ଜେରିଆଟିକ ୱାର୍ଡ ଖୋଲାଯାଇଛି। କିନ୍ତୁ ଗତ ସପ୍ତାହେ ହେଲା ଉକ୍ତ ଓ୍ବାର୍ଡରେ ତାଲା ଝୁଲାଇ ଦିଆଯାଇଥିବାରୁ ମେଡିକାଲକୁ ଆସୁଥିବା ବୟସ୍କ ରୋଗୀମାନେ ଅନ୍ୟ ଓ୍ବାର୍ଡଗୁଡ଼ିକରେ ଚିକିତ୍ସିତ ହେଉଛନ୍ତି। ଏ ନେଇ ସେମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଗତ ଜୁଲାଇ ୧୫ରେ ଏହି ଜେରିଆଟିକ୍ ୱାର୍ଡ ଉଦ୍ଘାଟିତ ହୋଇଥିଲା। ଅନୁଗୋଳ ବିଧାୟକ ତଥା ଉପବାଚସ୍ପତି ରଜନୀକାନ୍ତ ସିଂ ଏହାକୁ ଉଦ୍ଘାଟନ କରିବା ପରଠାରୁ ବୟସ୍କ ରୋଗୀମାନଙ୍କୁ ଏଠାରେ ରଖାଯାଇ ଚିକିତ୍ସା କରାଯିବ ବୋଲି ଆଶା କରାଯାଉଥିଲା। କିନ୍ତୁ ଉକ୍ତ ଓ୍ବାର୍ଡକୁ କାର୍ଯ୍ୟକ୍ଷମ କରା ନ ଯିବାରୁ କେତେଜଣ ବରିଷ୍ଠ ନାଗରିକ ଓ ସାମାଜିକକର୍ମୀ ଧାରଣାରେ ବସିଥିଲେ। ଫଳରେ ଗତ ଅଗଷ୍ଟ ୨୬ରେ ଉକ୍ତ ୱାର୍ଡରେ ରୋଗୀସେବା ଆରମ୍ଭ କରାଯାଇଥିଲା। କିନ୍ତୁ କିଛି ଦିନ ପରେ ପୁଣି ଓ୍ବାର୍ଡକୁ ବନ୍ଦ କରିଦିଆଯାଇଛି। ମେଡିକାଲକୁ ଆସୁଥିବା ବୟସ୍କ ରୋଗୀଙ୍କୁ ବିଭିନ୍ନ ଓ୍ବାର୍ଡରେ ରଖାଯାଇ ଚିକିତ୍ସା କରାଯାଉଛି। ଏବେ ୩୦ରୁ ଊର୍ଦ୍ଧ୍ୱ ଏପରି ରୋଗୀ ଅନ୍ୟାନ୍ୟ ଓ୍ବାର୍ଡରେ ଚିକିତ୍ସିତ ହେଉଥିବା ଅଭିଯୋଗ ହେଉଛି। ଏ ନେଇ ଜିଲା ମୁଖ୍ୟ ଚିକିତ୍ସାଧିକାରୀ ଅମରେନ୍ଦ୍ର ନାଥ ମହାନ୍ତି କହିଛନ୍ତି, ବାର୍ଦ୍ଧକ୍ୟ ଜନିତ ରୋଗୀ ଆସିଲେ ସେମାନଙ୍କୁ ଜେରିଆଟିକ ୱାର୍ଡରେ ଚିକିତ୍ସା କରାଯିବ। ବର୍ତ୍ତମାନ କୌଣସି ବାର୍ଦ୍ଧକ୍ୟ ଜନିତ ରୋଗୀ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉ ନ ଥିବା ସିଡିଏମ୍ଓ କହିଛନ୍ତି।