ଚମ୍ପୁଆ,୨।୯(ଡି.ଏନ.ଏ.)- କେନ୍ଦୁଝର ଜିଲା ଚମ୍ପୁଆ ଉପକାରାଗାରରେ ରହୁଥିବା ଝାଡଖଣ୍ଡ ଜୟନ୍ତୀଗଡ ଅଞ୍ଚଳର ଆଦିତ୍ୟ ସିର୍କା ନାମ୍ନୀ ଜଣେ ୮ ମାସର ଗର୍ଭବତୀ ମହିଳାଙ୍କୁ ଶନିବାର ଜାମିନ୍ରେ ଛଡାଯାଇଛି। ୬ ବର୍ଷ ତଳେ ନିଜ ପରିବାର ଲୋକଙ୍କ ଇଚ୍ଛା ବିରୋଧରେ ସେ କେନ୍ଦୁଝର ଜିଲା ବଲାଣୀ ଅଞ୍ଚଳର ବିଜୟ ମୁଣ୍ଡାଙ୍କୁ ପ୍ରେମ ବିବାହ କରିଥିଲେ। ପରେ ଏକ ଆପରାଧିକ ମାମଲା ଛନ୍ଦି ହୋଇ ପଡିବାରୁ ତାଙ୍କୁ ଜେଲ ଭୋଗିବାକୁ ପଡିଥିଲା। ସେ ୨ବର୍ଷର ଏକ ଶିଶପୁତ୍ର ସହ ପ୍ରଥମେ ବଡବିଲ ଜେଲ୍ରେ ରହିଥିଲେ। ଗତ ୨୬ ତାରିଖରେ ସେ ଚମ୍ପୁଆ ଜେଲକୁ ସ୍ଥାନାନ୍ତରିତ ହୋଇଥିଲେ। ମାସକ ତଳେ ଅତିରିକ୍ତ ଜିଲା ଦୌରାଜଜ ତାଙ୍କୁ ଜାମିନ ପ୍ରଦାନ କରିଥିଲେ ମଧ୍ୟ ଟଙ୍କା ଓ ଜାମିନଦାର ଅଭାବରୁ ସେ ଜେଲରୁ ମୁକୁଳି ପାରି ନ ଥିଲେ। ଆଦିତ୍ୟ ଗର୍ଭବତୀ ଥିବା ଜାଣିବା ପରେ ଜେଲ୍ ସୁପରିଣ୍ଟେଣ୍ଡେଣ୍ଟ ଜୀବନ ସିଂ କୁଦାଦା ପ୍ରଥମେ ଏ ନେଇ ତାଲୁକ ଆଇନ ସେବା କର୍ତ୍ତୃପକ୍ଷଙ୍କୁ ଚିଠି ଲେଖିଥିଲେ। ପରେ ଆଇନ ସେବା ସହାୟତା ପକ୍ଷରୁ ଜଣେ ସ୍ବତନ୍ତ୍ର ଓକିଲ ନିଯୁକ୍ତି ଦିଆଯାଇଥିଲା। ଏ ନେଇ ଜେଲ୍ ସୁପରିଣ୍ଟେଣ୍ଡେଣ୍ଟ କୁଦାଦା ୩ ହଜାର ଟଙ୍କା ଖର୍ଚ୍ଚ କରିବା ସହ ଜାମିନଦାର ଯୋଗାଡରେ ସହାୟତା କରିଥିଲେ। ଆଇନ ଅନୁଯାୟୀ ସମସ୍ତ କାଗଜପତ୍ର କାମ ସରିବା ପରେ ଆଦିତ୍ୟ ଶନିବାର ସନ୍ଧ୍ୟାରେ ଜେଲରୁ ମୁକୁଳିଛନ୍ତି। ଚମ୍ପୁଆ ଏସଡିଏମଓଙ୍କ ସହଯୋଗ କ୍ରମେ ସେ ଚମ୍ପୁଆ ଡାକ୍ତରଖାନାରେ ଥିବା ମା’ ଘରେ ପିଲା ଜନ୍ମ ହେବା ପର୍ଯ୍ୟନ୍ତ ଡାକ୍ତରଖାନା କତ୍ତୃର୍ର୍ପକ୍ଷଙ୍କ ରକ୍ଷଣା ବେକ୍ଷଣା ଦାୟିତ୍ୱରେ ରହିବେ ବୋଲି ଜଣାପଡିଛି।