କଟକ ଅଫିସ, ୪ା୧: ଜେଲ୍ ଭିତରେ ଥାଇ ବ୍ୟବସାୟୀଙ୍କୁ ଦାଦାବଟି ମାଗିବା ଘଟଣାରେ ଦରଘାବଜାର ପୋଲିସ ଗ୍ୟାଙ୍ଗଷ୍ଟର ମହମ୍ମଦ ସକିଲଙ୍କ ଆଉଜଣେ ବାନ୍ଧବୀଙ୍କୁ ଶୁକ୍ରବାର ଗିରଫ କରିଛି। ସେ ହେଲେ ମଙ୍ଗଳାବାଗ ଥାନା ଅନ୍ତର୍ଗତ କେଶରପୁରର ନସିମ ଓରଫ ନିଖାତ୍ ନସିମ(୨୫)। ସକିଲ ଗିରଫ ହୋଇ ଜେଲ୍ ଗଲା ପରେ କିଛିଦିନ ପାଇଁ ଗ୍ୟାଙ୍ଗର ଆପରାଧିକ କାର୍ଯ୍ୟକଳାପ ବନ୍ଦ ରହିଥିଲା। ତେବେ କିଛିଦିନର ବ୍ୟବଧାନ ପରେ ସକିଲ ଜେଲ୍ରେ ଥାଇ ଫୋନ୍ ମାଧ୍ୟମରେ ପୁଣି ନିଜ ଗ୍ୟାଙ୍ଗର ନେଟ୍ୱର୍କ ବଢାଇଥିଲେ। ଜେଲ୍ରେ ଥାଇ ସମସ୍ତ ପ୍ଲାନ ତିଆରି କରୁଥିଲେ ସକିଲ। କିଏ ଦାଦାବଟି ଦେବ, କାହାକୁ ଦେବ, କେମିତି ଦେବ ତାହାର ବ୍ଲୁପ୍ରିଣ୍ଟ ଜେଲ୍ ଭିତରୁ ପ୍ରସ୍ତୁତ ହେଉଥିଲା। ଏ ସମସ୍ତ ପ୍ଲାନର ମାଷ୍ଟରମାଇଣ୍ଡ ଥିଲେ ସକିଲ। ଜେଲ୍ ବାହାରେ ରହି ଏହାକୁ ରୂପ ଦେଉଥିଲେ ତାଙ୍କର ୨ ବାନ୍ଧବୀ। ପରେ ଗ୍ୟାଙ୍ଗଷ୍ଟରଙ୍କ ସହଯୋଗୀ ସେମାନଙ୍କଠାରୁ ବଟି ଆଦାୟ କରୁଥିଲେ। ସକିଲଙ୍କୁ ଦେଖା କରିବା ପାଇଁ ଜେଲ୍କୁ କେହି ପୁରୁଷ ସହଯୋଗୀ ଗଲେ କାଳେ ପୋଲିସର ସନ୍ଦେହ ଘେରକୁ ଆସିବେ, ତେଣୁ ଏହି ୨ ବାନ୍ଧବୀ ତାଙ୍କୁ ଦେଖା କରିବାକୁ ଜେଲ୍ ଯାଉଥିଲେ। ସେମାନେ ସକିଲଙ୍କୁ ଏକ ଫୋନ୍ ଦେବା ସହ ଜେଲ୍ ବାହାରର ସମସ୍ତ ସୂଚନା ଦେଉଥିଲେ। ଝିଅ ହୋଇଥିବାରୁ ଏତେ ସହଜରେ ପୋଲିସର ସନ୍ଦେହ ଘେରକୁ ଆସି ନ ଥିଲେ। ତେବେ ବ୍ୟବସାୟୀଙ୍କୁ ଦାଦାବଟି ପାଇଁ ଧମକ ଦେବା ଘଟଣାରେ ସକିଲଙ୍କ ଜଣେ ସହଯୋଗୀ ଗିରଫ ହେବା ପରେ ସମସ୍ତ ଗୁମର ଫିଟିଥିଲା।
କଟକ ବକ୍ସିବଜାରସ୍ଥିତ ଆନନ୍ଦ ସ୍ପୋଟର୍ସର ମାଲିକ ତଥା ବ୍ୟବସାୟୀ ଯୋଗେଶ ଅଗ୍ରୱାଲଙ୍କୁ ଗତ ଡିସେମ୍ବର ୧୨ ତାରିଖରେ ଚୌଦ୍ୱାର ଜେଲ୍ରେ ଥିବା ସକିଲ ଫୋନ୍ କରି ୧୦ଲକ୍ଷ ଟଙ୍କା ମାଗିଥିଲେ। ପରେ ସକିଲ୍ଙ୍କ ସହଯୋଗୀ ଜନ, ମୁକେଶ ଓ ଟାଇଗର ସେଠାରେ ପହଞ୍ଚି ଯୋଗେଶଙ୍କୁ ବନ୍ଧୁକ ଦେଖାଇ ଧମକ ଦେଇଥିଲେ। ଯୋଗେଶ ଉକ୍ତ ଟଙ୍କା ଦେବାରେ ବିଫଳ ହେବାରୁ ଗତ ୧୯ ତାରିଖରେ ସକିଲ ଯୋଗେଶଙ୍କ ସାନଭାଇ ସୁରଜଙ୍କୁ କଲ କରି ୫ଲକ୍ଷ ଟଙ୍କା ମାଗିଥିଲେ। ଏ ନେଇ ଯୋଗେଶ ଓ ସୁରଜଙ୍କ ପକ୍ଷରୁ ଦରଘାବଜାର ଥାନାରେ ଅଭିଯୋଗ ହେବା ପରେ ପୋଲିସ ଦୁଇଟି ମାମଲା ରୁଜୁ କରିଥିଲା। ପରେ ପୋଲିସ ଉଭୟ ଘଟଣାରେ ସମ୍ପୃକ୍ତ ଥିବା ନସିମଙ୍କୁ ଗିରଫ କରିଥିଲା। ସୂଚନାଯୋଗ୍ୟ, ଏହି ଘଟଣାରେ ପୂର୍ବରୁ ପୋଲିସ ସକିଲଙ୍କ ବାପା, ଭାଇ ଓ ଜଣେ ବାନ୍ଧବୀଙ୍କ ସମେତ ୭ଜଣଙ୍କୁ ଗିରଫ କରିଥିଲା।