ଖୋର୍ଦ୍ଧା ଅଫିସ,୧୬।୯: ବ୍ରାଉନସୁଗାର ବିକ୍ରି ଅଭିଯୋଗରେ ଖୋର୍ଦ୍ଧା ଆଦର୍ଶ ଥାନା ପୋଲିସ ସୋମବାର ବ୍ୟବସାୟୀ ପ୍ରକାଶ ନାୟକ ଓରଫ ମୁନାଙ୍କୁ ଗିରଫ କରି କୋର୍ଟ ଚାଲଣ କରିଥିଲା। ଜାମିନ ନାମଞ୍ଜୁର ହେବାରୁ ତାଙ୍କୁ ଖୋର୍ଦ୍ଧା ସବଜେଲକୁ ପଠାଇଦିଆଯାଇଛି। ତାଙ୍କ ଠାରୁ ୧୬.୬୦୦ଗ୍ରାମ ବ୍ରାଉନସୁଗାର, ୩୦ହଜାର ୨ଶହ ଟଙ୍କା ଓ ଗୋଟିଏ ମୋବାଇଲ ଫୋନ ଜବତ ହୋଇଛି। ବାଲେଶ୍ୱରରେ ଜବତ ହୋଇଥିବା ବ୍ରାଉନସୁଗାର ଘଟଣାରେ ଅଭିଯୁକ୍ତଙ୍କ ସମ୍ପୃକ୍ତ ଥିବା ଖୋର୍ଦ୍ଧା ଏସ୍ଡିପିଓ ସୁଶିଲ ମିଶ୍ର ସୋମବାର ଏକ ଖବରଦାତା ସମ୍ମିଳନୀରେ କହିଛନ୍ତି।
ସୂଚନା ଅନୁଯାୟୀ, ପ୍ରକାଶ ବ୍ରାଉନସୁଗାର ବିକ୍ରି କରୁଥିବା ନେଇ ପୋଲିସକୁ ଖବର ମିଳିଥିଲା। ବିଭିନ୍ନ ସମୟରେ ତାଙ୍କ ଘରେ ଚଢ଼ାଉ କରାଯାଇଥିଲେ ମଧ୍ୟ ସେ ଖସି ପଳାଉଥିଲେ। ସୋମବାର ନିୟ୍ୟୁ ମେଡିକାଲ ରୋଡରେ ବ୍ରାଉନସୁଗାର ବିକ୍ରି କରୁଥିବା ଖବରପାଇ ପୋଲିସ ତାଙ୍କୁ ଧରିଥିଲା। ପ୍ରକାଶଙ୍କ ନଁାରେ ଖୋର୍ଦ୍ଧା ଆଦର୍ଶ ଥାନାରେ ୫ଟି ମାମଲା (ନଂ.୩୯୫/୧୪, ୧୮/୧୪, ୯୮/୧୪, ୨୪/୧୫, ୧୫୩/୧୫)ରହିଛି। ସୂଚନାଥାଉ କି, ଗତ ଶନିବାର ଅପରାହ୍ନରେ ବାଲେଶ୍ୱରରୁ ୩ଜଣ ଗିରଫ ହୋଇଥିବାବେଳେ ୩୦ଲକ୍ଷ ଟଙ୍କାର ବ୍ରାଉନସୁଗାର ଓ ୯ଲକ୍ଷ ୪୪ ହଜାର ୮୦ଟଙ୍କା ଜବତ ହୋଇଥିଲା। ଏହି ଘଟଣାରେ ଗିରଫ ହୋଇଥିବା ୩ ଅଭିଯୁକ୍ତଙ୍କ ମଧ୍ୟରୁ ଖୋର୍ଦ୍ଧା ଜାଗୁଳେଇପାଟଣାର ଭବାନୀ ପ୍ରସାଦ ସ୍ବାଇଁ, କୁମ୍ଭିଲୋର ପୀତବାସ ରଣାଙ୍କ ସୂଚନା ଆଧାରରେ ଅଭିଯୁକ୍ତ ପ୍ରକାଶଙ୍କୁ ଗିରଫ କରାଯାଇଛି।