ନୂଆଦିଲ୍ଲୀ, ୧୬।୬-
କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ ଯୋଗୁ ଭାରତୀୟ ଫୁଟବଲ ଦଳର ପୂର୍ବତନ ଅଧିନାୟକ ଗୌରମାଙ୍ଗି ସିଂ ସମ୍ପ୍ରତି ପରିବାର ସହିତ ଇମ୍ଫାଲରେ ରହୁଛନ୍ତି। ଘରେ ବସିରହିବା ଅପେକ୍ଷା ଜୈବିକ କୃଷିକୁ ଆପଣେଇ ନିଜ ଜମିରେ ବିଭିନ୍ନ ପନିପରିବା ଚାଷକରି ସମୟ ଅତିବାହିତ କରୁଛନ୍ତି। ”ଆମର ଏକ ଛୋଟ ଜମି ଅଛି, ଏହା ଏକ ଏକରରୁ କମ୍ ହେବ। ଆମ ଘରଠାରୁ ଏହା ଅଳ୍ପଦୂରରେ ରହିଛି। ଗତ ୨ ବର୍ଷ ଧରି ସେଠାରେ ଆମେ ପନିପରିବା ଚାଷ କରିଆସୁଛୁ। ଲକ୍ଡାଉନ୍ ସମୟରେ ମୁଁ ଅନ୍ୟ ଭାଇମାନଙ୍କ ସହ ମିଶି ଲଙ୍କା, ହଳଦୀ, ଅଦା, ମକା, କଲରା, କଖାରୁ ଆଦି ବିଭିନ୍ନ ପ୍ରକାର ପନିପରିବା ଚାଷ କରିବାକୁ ଚେଷ୍ଟା କରିଛୁ“ ବୋଲି ଗୌରମାଙ୍ଗି ପ୍ରକାଶ କରିଛନ୍ତି।
ଏଥିରୁ ତାଙ୍କୁ ବହୁତ ଆନନ୍ଦ ମିଳିଛି ଏବଂ ନୂଆ ଅନୁଭୂତି ହେବା ସହ ଉପାଦେୟ ମଧ୍ୟ ହୋଇଛି ବୋଲି ଏହି ପୂର୍ବତନ ଡିଫେଣ୍ଡର ପ୍ରକାଶ କରିଛନ୍ତି। ଗୌରମାଙ୍ଗି ସମ୍ପ୍ରତି ଦ୍ୱିତୀୟ ଡିଭିଜନ ଲିଗ୍ ଦଳ ଏଫସି ବେଙ୍ଗାଲୁରୁ ୟୁନାଇଟେଡର ମୁଖ୍ୟ କୋଚ୍ ଅଛନ୍ତି। ପରିବା ବଗିଚାରେ କାର୍ଯ୍ୟ କରି ଖୁବ୍ ମଜା ଅନୁଭବ କରିଛି। ସେଠାରେ ମୁଁ ପ୍ରତିଦିନ କିଛି ସମୟ ଅତିବାହିତ କରୁଛି। ଗଛ ଲଗାଇବା ସହ ପାଣିଦିଏ ଏବଂ ପରିବା ତୋଳେ। ଆମର ପରିଶ୍ରମ ସଫଳ ହୋଇଥିବାରୁ ବହୁତ ସନ୍ତୋଷ ଲାଗିଛି ବୋଲି ସେ କହିଛନ୍ତି। ଉଭୟ ମାନସିକ ଓ ଶାରୀରିକଭାବେ ନିଜକୁ ସତେଜ ରଖିବା ପାଇଁ ଏହା ଏକ ଭଲ ମାଧ୍ୟମ। ଏହାଦ୍ୱାରା ଆମେ ଭଲ ପରିବା ଖାଇବା ସହ ପରିବାର ସହିତ ବହୁ ସମୟ ବିତାଇ ପାରୁଛୁ। ଭବିଷ୍ୟତରେ ମୁଁ ଯେପରି ଆହୁରି ଅଧିକ ପନିପରିବା ଚାଷ କରିପାରିବି ତା ଉପରେ ଗୁରୁତ୍ୱ ଦେଉଛି। ମୋର କେତେକ ବନ୍ଧୁ ଏହା କରୁଛନ୍ତି। ମୁଁ ସେମାନଙ୍କ ସହ କଥା ହୋଇଛି। ସମୟ ଆସିଲେ ମୁଁ ଏହା ଉପରେ ବିଶେଷ ଧ୍ୟାନ ଦେବି ବୋଲି ଗୌରମାଙ୍ଗି କହିଛନ୍ତି।
ସାମ୍ପ୍ରତିକ ସମୟରେ ଭାରତୀୟ ଫୁଟବଲରେ ଗୌରମାଙ୍ଗି ଜଣେ ସଫଳ ଖେଳାଳି। ସେ ଜାତୀୟ ଫୁଟବଲ ଲିଗ୍, ଫେଡେରେଶନ କପ୍ ଏବଂ ଆଇ-ଲିଗ୍ ଟାଇଟଲ ଜିତିବା ସହ ୨୦୧୦ରେ ଏଆଇଏଫଏଫ ପ୍ଲେୟର ଅଫ ଦି ଇୟର ପୁରସ୍କାର ଜିତିଥିଲେ। ୨୦୧୧ରେ ଦୋହାରେ ଭାରତର ଏଏଫସି ଏସିଆନ କପ୍ ଅଭିଯାନରେ ମଧ୍ୟ ସେ ସାମିଲ ଥିଲେ। ସେଠାରେ ଭାରତର ପ୍ରଥମ ମ୍ୟାଚରେ ସେ ବାହାରିନ ବିପକ୍ଷରେ ପ୍ରଥମ ଗୋଲଟି ଦେଇଥିଲେ।