ଅମେଠି,୨୪।୪: ଉତ୍ତରପ୍ରଦେଶ ଅମେଠି ଲୋକ ସଭା ଆସନରେ କଂଗ୍ରେସ ରାଷ୍ଟ୍ରୀୟ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଏବଂ ସ୍ମୃତି ଇରାନୀଙ୍କ ମଧ୍ୟରେ ଚପଲ ରାଜନୀତି ଜୋର ଧରିଛି। ଏହାକୁ ନେଇ ସୋସିଆଲ୍ ମିଡ଼ିଆରେ ମଧ୍ୟ ଚର୍ଚ୍ଚା ଆରମ୍ଭ ହୋଇଛି। ସ୍ମୃତି ଇରାନୀ ସ୍ଥାନୀୟ ହରିୟରପୁର ଗ୍ରାମରେ ଲୋକଙ୍କ ମଧ୍ୟରେ ଚପଲ ବାଣ୍ଟିଥିଲେ। ତେବେ ପରବର୍ତ୍ତୀ ସମୟରେ ପ୍ରିୟଙ୍କା ଏହାକୁଅପମାନ ସୂଚକ ବୋଲି କହିଥିଲେ। ଏହା ଦ୍ୱାରା ଗ୍ରାମବାସୀଙ୍କ ମଧ୍ୟରେ ଆକ୍ରୋଶ ବଢ଼ିଥିଲା। ଗ୍ରାମବାସୀମାନେ ଏକତ୍ରିତ ହୋଇ ହାତରେ ଚପଲ ଧରି ବିଭିନ୍ନ ସ୍ଲୋଗାନ ଦେଇଥିଲେ। ଏହା ସହିତ ସ୍ମୃତିଙ୍କ ଠିକଣାରେ ବଣ୍ଟାଯାଇଥିବା ଚପଲ ପଠାଇବାକୁ ଅଡ଼ି ବସିଥିଲେ। ସୂଚନାଯୋଗ୍ୟ, ଚପଲ ବଣ୍ଟନରେ ୨୫ ହଜାର ଟଙ୍କା ଖର୍ଚ୍ଚ ହୋଇଥିବା କୁହାଯାଉଛି।