ବନ୍ତଳା, ୨୫ା୨(ଡି.ଏନ.ଏ.)
ଅନୁଗୋଳ ଜିଲା ବନ୍ତଳା ଥାନା ବଡ଼କେରା ପଞ୍ଚାୟତ ଚମ୍ପତିମୁଣ୍ଡା ଜବାହର ନବୋଦୟ ବିଦ୍ୟାଳୟରେ ସୋମବାର ଜ୍ୱର, ଝାଡାବାନ୍ତି ବ୍ୟାପିଛି। ଝାଡାବାନ୍ତିରେ ୧୨ ଜଣ ଆକ୍ରାନ୍ତ ହୋଇଥିବାବେଳେ ୩୭ ଜଣ ଜ୍ୱରରେ ପୀଡିତ ହୋଇଥିବା ଜଣାପଡିଛି। ବିଦ୍ୟାଳୟ ଅଧ୍ୟକ୍ଷ ଏ ନେଇ ଜିଲା ସ୍ବାସ୍ଥ୍ୟ ବିଭାଗକୁ ଜଣାଇବା ପରେ ଜିଲା ମୁଖ୍ୟ ଚିକିତ୍ସାଳୟର ଗୋଟିଏ ଟିମ୍ ଓ ବନ୍ତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଏକ ଟିମ୍ ସେଠାରେ ପହଞ୍ଚି ଆକ୍ରାନ୍ତଙ୍କ ଚିକିତ୍ସା କରିଛନ୍ତି। ଏହି ଟିମ୍ରେ ଡ. ବିଶ୍ୱଜିତ ନାୟକ, ଡ. ବୀରେନ ସାହୁ, ଡ. ରାକେଶ ସନ୍ତୋଷ ପାଳ, ଫାର୍ମାସିଷ୍ଟ ଛବିନ୍ଦ୍ର ସାମଲ, ଏପିଡେମିଲୋଜିଷ୍ଟ, ବାୟୋଲୋଜିଷ୍ଟ ପ୍ରମୁଖ ଛାତ୍ରୀଛାତ୍ରଙ୍କ ଚିକିତ୍ସା କରିଛନ୍ତି। ତେବେ ଏଥିରେ ୧୨ ଜଣ ଛାତ୍ରୀଛାତ୍ର ଓ ୨ ଜଣ ରୋଷେୟାଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ବିଦ୍ୟାଳୟ ପରିସରରେ ସାଲାଇନ ଲଗାଯାଇଛି। ଅନ୍ୟମାନଙ୍କ ସ୍ବାସ୍ଥ୍ୟାବସ୍ଥା ଭଲ ଅଛି। ଅନ୍ୟପକ୍ଷରେ ୩ ଜଣ ଅଭିଭାବକ ସେମାନଙ୍କ ପିଲାଙ୍କୁ ଅନୁଗୋଳ, ନାଲ୍କୋ ସ୍ବାସ୍ଥ୍ୟକେନ୍ଦ୍ରକୁ ଆଣି ଚିକିତ୍ସା କରିଥିବା ଜଣାପଡିଛି। ନିମ୍ନମାନର ଖାଦ୍ୟଖାଇ ପିଲାମାନଙ୍କ ଏପରି ଅବସ୍ଥା ହୋଇଥିବା ଅଭିଭାବକ କମିଟିର ପ୍ରଦୀପ ମିଶ୍ର, ବ୍ରଜବନ୍ଧୁ ସାହୁ, ଅଜୟ ପ୍ରଧାନ ଓ ଦୁଃଶାସନ ସେଠୀଙ୍କ ସମେତ ଅନ୍ୟମାନେ ଅଭିଯୋଗ ଆଣିଛନ୍ତି। ଏ ବିଷୟରେ ନବୋଦୟ ବିଦ୍ୟାଳୟର ଅଧ୍ୟକ୍ଷ ଆର୍. ପି. ସାହୁ କୁହନ୍ତି, ବିଦ୍ୟାଳୟରେ ସମୁଦାୟ ୪୯୪ ଛାତ୍ରୀଛାତ୍ରୀ ପଢୁଛନ୍ତି। ଅଧିକାଂଶ ପିଲା ଛୁଟିରେ ଘରକୁ ଯାଇଥିଲେ। ଅଭିଭାବକମାନେ ଲୁଚାଇ ବାହାର ଖାଦ୍ୟ ଖାଇବା ସହିତ ପାଗ ପରିବର୍ତ୍ତନ ଯୋଗୁ ଏଭଳି ସମସ୍ୟା ଦେଖା ଦେଇଛି। ରୋଷେୟାଙ୍କୁ ମିଶାଇ ୫ ଜଣଙ୍କୁ ସାଲାଇନ ଦିଆଯାଇଛି। ଅନ୍ୟ ୧୫ ଜଣଙ୍କୁ ଭାଇରାଲ ଜ୍ୱର ହୋଇଛି। ସେମାନଙ୍କୁ ଔଷଧ ଦିଆଯାଇଛି। ଏ ବିଷୟରେ ବନ୍ତଳା ସ୍ବାସ୍ଥ୍ୟ ଅଧିକାରୀ ଡ. ଘନଶ୍ୟାମ ବେହେରା କୁହନ୍ତି, ଚିକିତ୍ସା କରାଯିବା ପରେ ସମସ୍ତଙ୍କ ସ୍ବାସ୍ଥ୍ୟାବସ୍ଥା ଭଲ ଅଛି।