hand in jail
ଜୟପୁର,୮ା୮(ଡି.ଏନ୍.ଏ.): କୋରାପୁଟ ଜିଲା ଜୟପୁରରେ ସ୍ବତନ୍ତ୍ର ଜେଲ ପ୍ରତିଷ୍ଠା ଦାବି ଦୀର୍ଘଦିନରୁ ହୋଇଆସୁଛି। ଏଥିପାଇଁ ଜେଲ ଏଡିଜି ମହେନ୍ଦ୍ର ପ୍ରତାପ ଗତ ୫ ତାରିଖରେ ଜେଲ୍ ପ୍ରତିଷ୍ଠା ଲାଗି ସହରାଞ୍ଚଳ କିମ୍ବା ଏହାର ଆଖପାଖରେ ୨୦ ଏକର ଜମି ଯୋଗାଇଦେବା ପାଇଁ କୋରାପୁଟ ଜିଲାପାଳଙ୍କୁ ଚିଠି କରିଛନ୍ତି। ଏଥିପାଇଁ ତହସିଲଦାର ଜୟପୁର ଓ ଆଖାପଖ ଅଞ୍ଚଳର ୨ରୁ ୩ଟି ଜମି ମଧ୍ୟ ଚିହ୍ନଟ କରିଛନ୍ତି। ମାଓବାଦୀ ଅଧ୍ୟୁଷିତ ଅଞ୍ଚଳ ହୋଇଥିବା ଯୋଗୁ ସୁରକ୍ଷା ଦୃଷ୍ଟିରୁ ଗୃହ ବିଭାଗର ଉଚ୍ଚ ଅଧିକାରୀ ଏହାର ଯାଞ୍ଚ କରିବା ପରେ କେଉଁଠାରେ ଜେଲ୍ ନିର୍ମାଣ ହେବ, ଚୂଡ଼ାନ୍ତ ନିଷ୍ପତ୍ତି ନେବେ।
୧୯୫୦ରେ ଜୟପୁର ଉପକାରାଗାର (ସବଜେଲ) ପ୍ରତିଷ୍ଠା ହୋଇଛି। ତେବେ ଏଠାରେ କଏଦୀଙ୍କ ସଂଖ୍ୟା ଦିନକୁ ଦିନ ବଢୁଛି। ଜୟପୁର ଟାଉନ, ସଦର, ମହିଳା, ବୈପାରୀଗୁଡ଼ା, ବୋରିଗୁମ୍ମା, ବିସିଙ୍ଗପୁର, କୁନ୍ଦୁରା ଓ କୋଟପାଡ଼ ଥାନା ବିଭିନ୍ନ ଅଭିଯୁକ୍ତଙ୍କୁ ଜୟପୁର ସବ୍ଜେଲକୁ ଚାଲାଣ କରୁଛି। ଫଳରେ ଏହି ଜେଲରେ କ୍ଷମତାଠାରୁ ଦୁଇଗୁଣା ବିଚାରାଧୀନ କଏଦୀ ରହୁଛନ୍ତି। ଏହି କାରଣରୁ ଏହି ଜେଲକୁ ଅପଗ୍ରେଡ କରାଯିବା ସହ ରାଉରକେଲା ଏବଂ ଭୁବନେଶ୍ୱର ଭଳି ସ୍ବତନ୍ତ୍ର ଜେଲ ଭାବେ ଘୋଷଣା କରାଯିବା ପାଇଁ ବିଭିନ୍ନ ସମୟରେ ଦାବି ହେଉଥିଲା। ଏଠାରେ ୧୫୩ ଜଣ ବିଚାରାଧୀନ କଏଦୀଙ୍କ ପାଇଁ ରହିବା ବ୍ୟବସ୍ଥା ଅଛି। ଗୁରୁବାର ସୁଦ୍ଧା ୩୦୫ ଜଣ କଏଦୀ ରହୁଥିବା ଜଣାପଡ଼ିଛି। ସେଥିରୁ ୯୭ ଜଣ କେବଳ ଗଞ୍ଜେଇ ଚାଲାଣ ଅଭିଯୋଗରେ ବିଚାରାଧୀନ କଏଦୀ ରହିଛନ୍ତି। ଗତ ଜୁନ୍ରେ ଆବଶ୍ୟକତାଠାରୁ ଅଧିକ କଏଦୀ ଥିବା ଯୋଗୁ ୮୨ ଜଣ ଅନ୍ତେବାସୀଙ୍କୁ କୋରାପୁଟ ସର୍କଲ ଜେଲକୁ ଅସ୍ଥାୟୀ ଭାବେ ସ୍ଥାନାନ୍ତର କରାଯାଇଛି ା କିନ୍ତୁ ସେମାନଙ୍କ ମାମଲା ଜୟପୁରସ୍ଥିତ ବିଭିନ୍ନ କୋର୍ଟରେ ଥିବାବେଳେ ମାମଲା ଶୁଣାଣି ଆରମ୍ଭ ହେଲେ ସେମାନଙ୍କୁ ଏଠାକୁ ପୁନଃ ଅଣାଯାଉଛି ା ମାନବାଧିକାର ସିଟିଜେନ କମିଶନର ଆଇନ ପରାମର୍ଶଦାତା ଅନୁପ ପାତ୍ର ଏହି ସମସ୍ୟା ନେଇ ଏଡିଜିଙ୍କୁ ୯ ମାସ ତଳେ ଜଣାଇଥିଲେ। ସେହିପରି ଜୟପୁରରୁ ୨୧ କିମି ଦୂର ବୋରିଗୁମ୍ମାରେ ଜେଏମ୍ଏଫ୍ସି କୋର୍ଟ ସ୍ଥାପନ କରାଯାଇଛି। କିନ୍ତୁ ଏହି କୋର୍ଟର ବିଚାରାଧୀନ କଏଦୀଙ୍କୁ ୨୮ କିମି ଦୂର କୋଟପାଡ଼ ଜେଲରେ ରଖିବା ବଦଳରେ ନେବାଆଣିବା ବଦଳରେ ସୁରକ୍ଷା ବ୍ୟବସ୍ଥା ନ ଥିବା ଦର୍ଶାଇ ଜୟପୁର ସବଜେଲରେ ରଖାଯାଉଛି। କୋଟପାଡ଼ ଜେଲରେ ୧୯୭ କଏଦୀ ରହିବା ବଦଳରେ ୨୭ ଜଣ ରହୁଛନ୍ତି। ଏନେଇ ଜୟପୁର ସବଜେଲ ସୁପରିଣ୍ଟେଣ୍ଡେଣ୍ଟ ଲଲାଟେନ୍ଦୁ ଭୂଷଣ ଦାସ କହିଛନ୍ତି, ଜୟପୁର ସହର କିମ୍ବା ଆଖାପଖ ଅଞ୍ଚଳର ୨୦ ଏକର ଜମିରେ ନୂଆଜେଲ ନିର୍ମାଣ କରାଯିବ ା ଉପଯୁକ୍ତ ଜମି ଚିହ୍ନଟ ସହ ପ୍ରାରମ୍ଭିକ କାର୍ଯ୍ୟ ଆରମ୍ଭ ହୋଇଛି। ଦକ୍ଷିଣ ଓଡ଼ିଶାରେ ଏହିପରି ସ୍ବତନ୍ତ୍ର ଜେଲ ହେବାର ଆବଶ୍ୟକତା ନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷ ପଦକ୍ଷେପ ନେଉଛନ୍ତି।