ଷଢ଼େଇକଳା,୨୪ା୬: ଝାଡ଼ଖଣ୍ଡର ଷଢ଼େଇକଳା ଖରସୁଆଁ ଜିଲାରେ ଏକ ଅଭାବନୀୟ ଘଟଣା ଘଟିଛି। ଶତାଧିକ ଗ୍ରାମବାସୀ ଚୋରି ସନ୍ଦେହରେ ଜଣେ ମୁସଲିମ୍ ଯୁବକଙ୍କୁ ଧରି ‘ଜୟ ଶ୍ରୀରାମ’ କହିବାକୁ ବାଧ୍ୟ କରିବା ପରେ ବିଦ୍ୟୁତ୍ ଖୁଣ୍ଟରେ ବାନ୍ଧି ପିଟି ପିଟି ମାରିଦେଇଛନ୍ତି। ଏହି ବର୍ବର କାଣ୍ଡର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ମୃତକଙ୍କ ପରିବାର ଲୋକେ ଥାନାରେ ଅଭିଯୋଗ କରିଛନ୍ତି। ଅନ୍ୟପକ୍ଷରେ ଯୁବକ ଜଣକ ହାଜତରେ କି ହସ୍ପିଟାଲରେ ପ୍ରାଣ ହରାଇଛନ୍ତି ତାକୁ ନେଇ ବିବାଦ ଉଠିଛି।
ଅଭିଯୋଗ ଅନୁଯାୟୀ, ଖରସୁଆଁ ଅନ୍ତର୍ଗତ କଦମଡିହା ଗ୍ରାମର ତବ୍ରେଜ୍ ଅନ୍ସାରୀ(୨୪) ଗତ ୧୮ ତାରିଖ ରାତିରେ ବାଇକ୍ ଚୋରି କରୁଥିବା ସନ୍ଦେହରେ ଗାଁ ଲୋକେ ତାଙ୍କୁ ଧରିଥିଲେ। ସେମାନେ ତାଙ୍କୁ ଏକ ବିଦ୍ୟୁତ୍ ଖୁଣ୍ଟରେ ବାନ୍ଧି ରାତିସାରା ମାଡ଼ ମାରିଥିଲେ। ପୋଲିସ ଖବର ପାଇ ସେଠାକୁ ଯାଇ ତବ୍ରେଜ୍ଙ୍କୁ ଗିରଫ କରିଥିଲା। ଏହାସହ ତାଙ୍କୁ ଗୁରୁତର ଅବସ୍ଥାରେ ଏକ ସ୍ଥାନୀୟ କୋର୍ଟରେ ହାଜର କରାଇ ରିମାଣ୍ଡରେ ନେଇଥିଲା। ଶନିବାର ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଇତିମଧ୍ୟରେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହୋଇଛି। ପପୁ ମଣ୍ଡଳ ନାମକ ଜଣେ ଯୁବକଙ୍କ ସମେତ ଶତାଧିକ ବ୍ୟକ୍ତି ତାଙ୍କୁ ‘ଜୟ ଶ୍ରୀରାମ’ ଓ ‘ଜୟ ହନୁମାନ’ କହିବାକୁ ବାଧ୍ୟ କରିଥିଲେ। ଏହାସହ ସେମାନେ ବିଦ୍ୟୁତ୍ ଖୁଣ୍ଟରେ ବାନ୍ଧି ମାଡ଼ ମାରୁଥିବାର ଦୃଶ୍ୟ ଏଥିରେ ରହିଛି। ତବ୍ରେଜ୍ଙ୍କ ସ୍ତ୍ରୀ ଶାଇସ୍ତା ପରବିନ୍ ଉକ୍ତ ଭିଡିଓ ଆଧାରରେ ଥାନାରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରିଛି। ପପୁଙ୍କୁ ହତ୍ୟା ଅଭିଯୋଗରେ ଗିରଫ କରାଯାଇଛି। ତବ୍ରେଜ୍ ହସ୍ପିଟାଲରେ ଆଖିବୁଜି ଦେଇଥିବା ପୋଲିସ କହୁଥିବାବେଳେ ତାଙ୍କ ମୃତ୍ୟୁକୁ ନେଇ ବିବାଦ ଉଠିଛି। ପ୍ରକୃତରେ ହାଜତରେ ତାଙ୍କର ମୃତ୍ୟୁ ଘଟିଛି ବୋଲି ଝାଡ଼ଖଣ୍ଡରେ ସାମ୍ପ୍ରଦାୟିକ ସଦ୍ଭାବନା ପାଇଁ କାର୍ଯ୍ୟରତ ଅମନ ବିରାଦରି ନାମକ ସଙ୍ଗଠନର ସଂଯୋଜକ ଅଫ୍ଜଲ ଅନିସ୍ ଅଭିଯୋଗ ଆଣିଛନ୍ତି। ତବ୍ରେଜ୍ଙ୍କ ଦାଦା ମକ୍ସୁଦ୍ ଅନ୍ସାରୀ କହିଛନ୍ତି, ଜେଲ୍ରେ ପୁତୁରାଙ୍କ ମୃତ୍ୟୁ ଘଟିଛି। କିନ୍ତୁ ଜେଲ ଅଧିକାରୀମାନେ ନିଜକୁ ବଞ୍ଚାଇବା ପାଇଁ ତାଙ୍କୁ ହସ୍ପିଟାଲକୁ ପଠାଇଦେଇଥିଲେ। ପୋଲିସ ଓ ଜେଲ୍ ଅଧିକାରୀମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉ ବୋଲି ସେ ଦାବି କରିଛନ୍ତି। ଭାରତରେ ସଂଖ୍ୟାଲଘୁଙ୍କ ଉପରେ ହିନ୍ଦୁବାଦୀ ସଙ୍ଗଠନଗୁଡ଼ିକର ଆକ୍ରମଣ ବଢ଼ି ଚାଲିଥିବା ନେଇ ଆମେରିକାର ଏକ ରିପୋର୍ଟ ପ୍ରକାଶ ପାଇଥିବାବେଳେ ଭାରତର ବହିର୍ବ୍ୟାପାର ମନ୍ତ୍ରଣାଳୟ ଏହାକୁ ଖଣ୍ଡନ କରିଛି। ଏହି ପରିପ୍ରେକ୍ଷୀରେ ତବ୍ରେଜ୍ଙ୍କ ମୃତ୍ୟୁ ଅନେକ ପ୍ରଶ୍ନ ଛିଡ଼ା କରିଛି।