ଆଠମଲ୍ଲିକ, ୪ା୩(ଡି.ଏନ.ଏ.) – ଅନୁଗୋଳ ଜିଲା ଆଠମଲ୍ଲିକ ସହରରେ ବୁଧବାର ଅପରାହ୍ନରେ ହଠାତ୍ ପ୍ରବଳ ବେଗରେ ପବନ ମାଡ଼ିଆସିବା ସହ କୁଆପଥର ବର୍ଷା ହୋଇ ବ୍ୟାପକ କ୍ଷୟକ୍ଷତି ଘଟିଛି। ଅନେକ ସ୍ଥାନରେ ଗଛ ଉପୁଡି ପଡିବା ସହ ବିଦ୍ୟୁତ୍ ତାର ଛିଣ୍ଡି ଯାଇଛି। ଜୋରରେ ପବନ ବହିବାରୁ ଆଠମଲ୍ଲିକ ଏନଏସି ସିଦ୍ଧପୁର ଗ୍ରାମର ଦୀନବନ୍ଧୁ ପ୍ରଧାନଙ୍କ ଛେଳି ଗୁହାଳ ଭାଙ୍ଗି ଯାଇଥିଲା। ଫଳରେ ସେଠାରେ ଥିବା ୨ଶହ ମେଣ୍ଢାରୁ ୯ଟିର ମୃତ୍ୟୁ ଘଟିଛି। ସେହିପରି ଆଠମଲ୍ଲିକ ଥାନା ଆଇଆଇସି ପ୍ରିୟବ୍ରତ ଦାସଙ୍କ ସରକାରୀ ବାସଭବନ ଉପରେ ଏକ ବିଶାଳ ଲିମ୍ବ ଗଛ ଉପୁଡି ପଡିଥିଲା। ଆଇଆଇସି ଘରେ ଥିବାବେଳେ ସେ ସୁରକ୍ଷିତ ଥିବା ଜଣାପଡିଛି। ଏଥିସହ ଏକ ଶାଗୁଆନ ଗଛ ଭାଙ୍ଗି ତାଙ୍କ ବାସଭବନର ଗେଟରେ ପଡିଛି। ସ୍ଥାନୀୟ ମୋଚିସାହିର ଯୁବକ ମଧୁମେୟ ତାଙ୍କ ଦୋକାନ ଘର ପୂଜା କରୁଥିବା ବେଳେ ଏକ ବିରାଟ ଗଛ ଉପରେ ପଡ଼ିବାରୁ ତାଙ୍କର ଗୋଟିଏ ଗୋଡ ଭାଙ୍ଗି ଯାଇଛି l ତୁରନ୍ତ ତାଙ୍କୁ ଆଠମଲ୍ଲିକ ଡାକ୍ତରଖାନା ଓ ପରେ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ସହରର ଦୁର୍ଗା ବଜାର, ଗଣେଶ ବଜାର, ଗାନ୍ଧୀଛକ, ଉଠାଜଳ ସେଚନ ବିଭାଗ, ବ୍ଲକ ସମ୍ମୁଖ, ବରଗାଁ ରାସ୍ତା, ତହସିଲ ଅଫିସ ରାସ୍ତା, ରାଜବାଟି ରାସ୍ତା ଇତ୍ୟାଦି ସ୍ଥାନରେ ବଡ ବଡ଼ ଗଛ ଭାଙ୍ଗି ଯାଇ ରାସ୍ତା ଅବରୋଧ ହୋଇଛି। ସେହିପରି ଅନେକ ସ୍ଥାନରେ ଗଛଗୁଡିକ ବିଦ୍ୟୁତ୍ ତାର ଉପରେ ପଡିଥିବାରୁ ସହରରେ ବିଦ୍ୟୁତ୍ ସରବରାହ ବିଚ୍ଛିନ୍ନ ହୋଇଛି।