ଜହ୍ନାପଙ୍କ, ୩୦।୫ (ଡି.ଏନ.ଏ.)-ଗୁରୁବାର ସନ୍ଧ୍ୟାରେ ହୋଇଥିବା ଝଡତୋଫାନ ଯୋଗୁ ମୁଣ୍ଡାପଡା ଓ ବ୍ରାହ୍ମଣୀପାଲିକୁ ଯାଇଥିବା ବିଦ୍ୟୁତ୍ ତାର ଛିଣ୍ଡି ଯାଇଛି ା ଫଳରେ ୨ ଦିନ ହେଲା ବ୍ରାହ୍ମଣୀପାଲି ପଞ୍ଚାୟତର କିଛି ଗାଁ ଓ ମୁଣ୍ଡାପଡା ପଞ୍ଚାୟତର ମୁଣ୍ଡାପଡା, ବାରପୁଡୁଗ, କିରାସିରା, ଖମାରିଗୁଡା, କମିରା, ଖଣ୍ଡପଡା ଗ୍ରାମବାସୀ ଅନ୍ଧାରରେ ରହିଛନ୍ତି ।
ପ୍ରକାଶ ଯେ, ଜହ୍ନାପଙ୍କ ସବ୍ଷ୍ଟେଶନରୁ ୨ଟି ଫିଡର୍ ସାହାଯ୍ୟରେ ବିଦ୍ୟୁତ୍ ଯୋଗାଣ ହୋଇଥାଏ । ପ୍ରଥମ ଫିଡରରୁ ଖୁଣ୍ଟବନ୍ଧ, ଲକ୍ଷ୍ମୀପ୍ରସାଦ, ପଦ୍ମନପୁର ପଞ୍ଚାୟତକୁ ବିଦ୍ୟୁତ୍ ଯୋଗାଣ ହୋଇଥିବା ବେଳେ ଅନ୍ୟ ଫିଡର୍ ଯୋଗେ ତେଲିବନ୍ଧ, ତଳସରଡା, ମୁଣ୍ଡିପଦର, ମୁଣ୍ଡାପଡା ଓ ବ୍ରାହ୍ମଣୀପାଲି ପଞ୍ଚାୟତକୁ ବିଦ୍ୟୁତ୍ ଯୋଗାଣ ହୋଇଥାଏ । ତେବେ ଏହି ଫିଡର୍ ଦୀର୍ଘ ୧୨ କିମି ପର୍ଯ୍ୟନ୍ତ ବିଦ୍ୟୁତ ସରବରାହ ଯୋଗାଇବା ଯୋଗୁ ବିଭାଗୀୟ କର୍ମଚାରୀମାନେ ଏହାକୁ ଦେଖାରଖା କରିବା ସମୟସାପେକ୍ଷ ହୋଇଥାଏ । ଅନ୍ୟପକ୍ଷରେ ଦୀର୍ଘ ଦିନ ହେଲା ପୋଲ୍ ଓ ତାର ବଦଳା ଯାଉ ନ ଥିବାରୁ ଏହି ସମସ୍ୟା ଲାଗି ରହିଥିବା ଉପଭୋକ୍ତାମାନେ ଅଭିଯୋଗ କରିଛନ୍ତି । ଏପରି କି ସାମାନ୍ୟ ପବନ କିମ୍ବା ବର୍ଷା ହେଲେ ବିଦ୍ୟୁତ୍ ବିଭ୍ରାଟ ନିତିଦିନିଆ ଘଟଣା ହୋଇଥାଏ ା ଅନ୍ୟପକ୍ଷରେ ଜହ୍ନାପଙ୍କ ଫିଡର୍ଠାରୁ କମିରା ଗ୍ରାମ ୬ କିମି ହୋଇଥିବା ବେଳେ ତେଲିବନ୍ଧ ଫିଡର୍ ପଟୁ ୧୨ କିମି ଦୂର ହୋଇଥାଏ । ଫଳରେ ବିଦ୍ୟୁତ୍ ସମସ୍ୟା ଦେଖାଦେଲେ କମିରାବାସୀଙ୍କ ଦୁର୍ଦ୍ଦଶା ବଢିଥାଏ। ତୁରନ୍ତ ବିଦ୍ୟୁତ୍ ତାର ସଜାଡିବା ସହିତ କମିରା ଗ୍ରାମକୁ ଜହ୍ନାପଙ୍କ ଫିଡର୍ରୁ ବିଦ୍ୟୁତ୍ ଯୋଗାଇ ଦେବାକୁ ସରପଞ୍ଚ ବିଦ୍ୟାଧର ସ୍ବାଇଁ, ସମିତି ସଭ୍ୟ ସଞ୍ଜୟ ପ୍ରଧାନ, ୱାର୍ଡ ସଭ୍ୟ ଦକ୍ଷ କୁମ୍ଭାର, ସନ୍ତୋଷ ଦାସ, ଶୁକଦେବ ପ୍ରଧାନ, ନବୀନ କୁମାର ପ୍ରଧାନ, ଶିବ ସାହୁ, ଦୁର୍ଯ୍ୟୋଧନ ଖଟୁଆ, ଆଦିତ୍ୟ ଦାସ, ରାଜୀବ ଲୋଚନ ଦାସ, ସୁମନ୍ତ ଦାସ, ସୁଶାନ୍ତ ବାଘ, ବାଞ୍ଝାନିଧି ହୋତା, କିଶୋର ସାହୁ ପ୍ରମୁଖ ଦାବି କରିଛନ୍ତି ।