ଝନେ କୁଷ୍ଠ ରୁଗୀକଁର ଅଁତରର କଥା

ଅତାବିରା,୨୮ା୮ (ଡି.ଏନ୍‌.ଏ): ଦେଶରୁ କୁଷ୍ଠ ରୋଗ୍‌ର ମୂଲ ମେଟାବାକେ କେନ୍ଦ୍ର ଆର ରାଏଜ୍‌ ସରକାର ଅନେକ ଯୋଜନା କାଯ୍‌କାରି କରି ସଚେତନତା ସୁରୁଷ୍‌ଟି କରୁଛନ୍‌। ସେନ୍‌ତା କୁଷ୍ଠ ରୋଗ୍‌ରେ ଆକ୍‌ରଁାତ ରୁଗୀକର ଚିକିଛା, ଥଇଥାନ ଲାଗି ବି ସରକାର ଅନେକ ଯୋଜନା କାଯ୍‌କାରୀ କରୁଛନ୍‌। ହେଲେ ଆଏଜ୍‌ ବି ଆମର ସମାଜରେ ଅଁଧ୍‌ ବିଶୁଆସ, କୁସଂସ୍କାର, ଟାହିଟାପରା, ସାମାଜିକ୍‌ ବାସଁଦ୍‌ର ଭଏରେ ଲୋକ୍‌ ରୋଗ୍‌କେ ଲୁକେଇ ଦେଉଛନ୍‌। ପଛେ ରୋଗ୍‌ ବଢ଼ି ଯେତେବେଲେ ହାତ୍‌ଗୋଡ଼୍‌ ବଁକା ହେଉଛେ, ଆଂଗ୍‌ଠି ଛିଡ଼ୁଛେ ସେତେବେଲେ ସେମାନେ ଘରଦୁଆର, ପରିବାର ଏନ୍‌ତା କି ଗଁା ଛାଡ଼ି ଉନିଆ ଜାଗାକେ ପଲଉଛନ୍‌।
ସୂଚନା ଅନ୍‌ସାରେ ସୁବର୍ଣ୍ଣପୁର ଜିଲା ବିନିକା ବ୍ଲକ ଅଂଚଳର ମୂଲ ବାସିନ୍‌ଦା ଛବିଳ ଦୀପ(୭୫)। ଆଏଜ୍‌କେ ୩୦ ବଛର ତଲେ ସେ କୁଷ୍ଠ ରୋଗ୍‌ରେ ଆକ୍‌ରଁାତ ହେଇଥିଲେ। ହେଲେ ସେ ପହେଲାରୁ କିଛି ଜାନି ନାଇଁପାରଲେ। ଯେତେବେଲେ ଜାନ୍‌ଲେ ଉଷୋକଷା କଲେ, ହେଲେ ବହୁତ ଡେରି ହେଇଯାଇଥିଲା। ସେ ସମିଆରେ ତାକର ହାତଗୋଡ଼ର ଆଂଗୁଠ୍‌ମାନ ବଁକା ହେବାର ସଂଗେ ଛିଡ଼୍‌ବାର ଆରମ୍‌ ହେଇଯାଇଥିଲା। ଏନ୍‌ତାଥି ଗଁାରେ ତାକର ପରିବାର ସାମାଜିକ ବାସଁଦ୍‌ର ଶିକାର ହେବାର ଭଏ ଛବିଳକୁଁ ଘାରିଥିଲା। ଇ ସବୁରୁ ପରିବାରକେ ବଁଚାବାର ଲାଗି ସେ ଆଏଜ୍‌କେ ୨୫ ବଛର ତଲେ ଗଁା, ପରିବାର ଛାଡ଼ିଦେଇଥିଲେ। ସେଦିନ୍‌ଠାନୁ ବରଗଡ଼ ଜିଲା ଅତାବିରା ବ୍ଲକ କାଦୋବାହାଲ ଛକ୍‌ ଛବିଳକଁର ଠିକ୍‌ନା ପାଲଟିଛେ। ସେ ଏହେଦେ କାଦୋବାହାଲ ପଁଚେତ୍‌ ମଦଭାଟି ଟିଣପଡ଼ା କେନାଲ ଖଁଡ଼ିରେ ଗୁଟେ ଛୁପ୍‌ଡ଼ିରେ ବଡ଼ା ଗୁଲ୍‌ଗୁଲା ହେଇ ଜୀବନ୍‌ ବିତଉଛନ୍‌। ସଖାଲ ପାଏଲେ ଆସର ପାସର ଗଁାଗଁଡ଼ା, କାଦୋବାହାଲ ଛକ୍‌ରେ ଭିଖ୍‌ ଭାଗି ପେଟ୍‌ ପାଲୁଛନ୍‌। ଇତାର ବାହାରେ ଛବିଳ କାଦୋବାହାଲ ପଁଚେତ୍‌ରୁ ଭିନ୍ନକ୍ଷମ ଭତା ପାଉଛନ୍‌। ହେଲେ ପରକୁତରେ ସରକାରୀ ହିସାବେ ସେ କେତେ ଟଁକା ଭତା ପାଉଛନ୍‌ କିଛି ସଠିକ୍‌ କହି ନାଇଁପାରବାର। ଭତା ପାଏବାର ସମିଆରେ ପଁଚେତ୍‌ରୁ ୬ଶହ ଟଁକା ଆନୁଛେଁ, ହେଲେ ଭତା ଖାତା ପତର ମୋର ପାସେ ନଁାଇଁନ ବଲି ସେ କହିଥିଲେ। ସେନ୍‌ତା ତାକର ପରିବାର ବାବ୍‌ଦେ ପଚରାଲାରୁ ମାଏକିନା, ଦୁଇ ପୁଓ ଆର ଗୁଟେ ବଲି ଝି’କେ ନେଇ ମୋର ପରିବାର। ଦୁଖ୍‌ସୁଖ କରି ଝି’କେ ବିହାଚୁରା କରିଥିଲି ବଲି ସେ ଆଏଁଖ୍‌ ଛଲ୍‌ ଛଲ୍‌ କରି କହିଥିଲେ। ହେଲେ ମୁଇଁ ଗଁା ଛାଡ଼ଲା ଦିନୁ ଆଏଜ୍‌କେ ୨୫ ବଛର ହେଲା ଘରର କାହାରି ସଂଗେ ଯୋଗାଯୋଗ ନଁାଇଁନ ବଲି ସେ କହିଛନ୍‌। ଥାନୀୟ ପରଶାସନ ଛବିଳକଁର ଥଇଥାନ ଲାଗି ତାକର ପରିବାର ସଂଗେ ଯୋଗାଯୋଗ କରବାକେ ବୁଧିଜୀବୀ ମହଲରେ ଦାବି ହେଉଛେ। ଇ ବାବ୍‌ଦେ ଅତାବିରା ବିଡିଓ ପ୍ରଣବ କୁମାର ଚାନ୍ଦକୁଁ ପଚରାଲାରୁ ଘଟନାର ତଦଁତ୍‌ କରି ପଦକ୍ଷେପ ନିଆଯିବା ବଲି ସେ କହିଥିଲେ।