ପାଟନା,୯।୭: ବିହାର ସାସାରାମ୍ସ୍ଥିତ କୈମୁର ପାହାଡ଼ରୁ ବାହାରିଥିବା ଝରଣାରେ ହଠାତ୍ ବନ୍ୟାଜଳ ଆସିବାରୁ ଏକ ଅଭାବନୀୟ ପରିସ୍ଥିତି ସୃଷ୍ଟି ହୋଇଛି। ଏଠାରେ ଥିବା ତୁତଲା ଭବାନୀ ମନ୍ଦିରକୁ ସୋମବାର ଶତାଧିକ ଶ୍ରଦ୍ଧାଳୁ ପୂଜାର୍ଚ୍ଚନା ପାଇଁ ଆସିଥିଲେ। ବନ୍ୟାଜଳ ଯୋଗୁ ଝରଣାର ଜଳସ୍ତର ୬ଫୁଟରୁ ଅଧିକ ହୋଇଯାଇଥିଲା। ଶ୍ରଦ୍ଧାଳୁ ଆତଙ୍କିତ ହୋଇ ପଡ଼ିଥିଲେ। ଝରଣା ମଝିରେ ଥିବା ବଡ଼ ବଡ଼ ପଥର ଉପରେ ଶ୍ରଦ୍ଧାଳୁ ଠିଆ ହୋଇ ରହିଥିଲେ। ତେବେ ଏହାର ମୁକାବିଲା ପାଇଁ ସ୍ଥାନୀୟ ଯୁବକ ଅଣ୍ଟା ଭିଡ଼ିଥିଲେ। ଝରଣାର ଦୁଇ କୂଳରେ ଦଉଡ଼ି ଧରି ମାନବ ଶୃଙ୍ଖଳ ଦ୍ୱାରା ଯୁବକମାନେ ସମସ୍ତ ଶ୍ରଦ୍ଧାଳୁଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ଉପରମୁଣ୍ଡରେ ବର୍ଷା ହେବାରୁ ଝରଣାରେ ହଠାତ୍ ବନ୍ୟାଜଳ ଆସିଥିବା କୁହାଯାଉଛି। ପୂର୍ବରୁ ଏଭଳି ଘଟଣା ଘଟିଥିବା ମନ୍ଦିର ବିକାଶ କମିଟି ପକ୍ଷରୁ କୁହାଯାଇଛି।
