ଅତାବିରା, ୭।୩ (ଡି.ଏନ୍.ଏ.)-କେନ୍ଦ୍ର ଆର ରାଏଜ୍ ସରକାର ଗରିବ୍ ଦୁଖି, ନିଅଁ। ସି ପରିବାରମାନକର ଲାଗି ପ୍ରଧାନମନ୍ତ୍ରୀ ଅବାସ, ଇନ୍ଦିରା ଅବାସ, ବିଜୁ ପକାଘର, ମୋ କୁଡ଼ିଆ ଲେଖେଁ ଯୋଜନା କାଯ୍କାରୀ କରୁଛନ୍। ହେଲେ ଅନେକ ଜାଗାରେ ଭିନେ ଭିନେ କାରନ୍ରୁ ହକ୍ଦାର ହିତାଧିକାରୀ ଯୋଜନାର ଲାଭ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଭେଡ଼େନ ବ୍ଲକ ଦେଶଭଟିଲି ପଁଚେତ୍ ଉଦେପୁର ଗଁ। ହରିଜନପଡ଼ାରେ।
ସୂଚନା ଅନ୍ସାରେ ଉଦେପୁର ହରିଜନ ପଡ଼ାର ବୁରୁଧ୍ କାନ୍ତି ଚାନ୍ଦ(୮୦)। ଆପ୍ନେ ଅନେକ ବଛର ହେଲା ଆରପାରକେ ଚାଲିଯାଇଛନ୍। ଇଆଡ଼େ ବୁରୁଧ୍କଁର ଛୁଆପିଲା ନାଇଁ। ଏନ୍ତାଥି ସେ ନିଜର ଭଂଗା ଦଦ୍ରା କୁରିଆରେ ବଡ଼ା ଗୁଲ୍ଗୁଲା ହେଇ ଏକଲିଆ ଜୀବନ୍ ବିତଉଛନ୍। ଦିହିପା ଖରାପ ହେଲେ ଡୁଂଗି ଦେଖ୍ବାକେ କେହି ନାଇଁ। ବୁରୁଧ୍ କାନ୍ତି ସରକାରୀ ସାହାଯ୍ ହିସାବେ ପଁଚେତ୍ରୁ ମାସିକ ୫ଶହ ଟଁକା ଭତା ପାଉଛନ୍। ଯେନ୍ଟା କି ସବୁକେ ନିଅଁଟ ହେଉଛେ। ଅନେକ ସମିଆରେ ସେ ଖାଏବାର ପିଇବାର ଲାଗି ପାଖ୍ପଡ଼ିଶାକର ଉପରେ ନିରଭର କରୁଥିବାର କହିଛନ୍। ଥାନୀଅ ପରଶାସନ ଇ ନିସାହା ବୁରୁଧ୍କୁଁ ଦୁରୁଷ୍ଟି ଦେଇ ଆବାସ ଯୋଜନାରେ ଘରଖଁଡ଼େ ଆର ଅନ୍ତ୍ୟୋଦୟ ଅନ୍ନପୂର୍ଣ୍ଣା ଯୋଜନାରେ ୩୫ କେ.ଜି. ଚାଉଲ ଯୁଗେଇ ଦେବାକେ ପଡ଼ାବାସୀ ଦାବି କରିଛନ୍। ଇ ବାବ୍ଦେ ଦେଶଭଟିଲି ପଁଚେତ୍ କାର୍ଯ୍ୟନିର୍ବାହୀ ଅଧ୍କାରୀ ପ୍ରମୋଦ କୁମାର ଦାଶକୁଁ ପଚ୍ରାଲାରୁ ନିହାତି ଭାବେ ଇ ଦିଗେ ପଦକ୍ଷେପ ନିଆଯିବା। ଆବାସ ଯୋଜନାର ଲାଗି ତାକର ଲାଗେଲେସରମାନେ ବ୍ଲକକେ ଯାଇ ବୁରୁଧ୍କଁର ନଁାରେ ଆବେଦନ କରବାକେ ପଡ଼ବା ବଲି ସେ କହିଥିଲେ।