ରାଞ୍ଚି,୧୭ା୧୧(ପି.ଟି./ ଆଇଏଏନ୍ଏସ୍): ଝାଡ଼ଖଣ୍ଡ ବିଧାନସଭା ନିର୍ବାଚନକୁ ଦୁଇ ସପ୍ତାହରୁ କମ୍ ସମୟ ବାକି ଥିବାବେଳେ ଲୋକ ଜନଶକ୍ତି ପାର୍ଟି (ଏଲ୍ଜେପି) ଜାତୀୟ ଗଣତାନ୍ତ୍ରିକ ମେଣ୍ଟ (ଏନ୍ଡିଏ) ଛାଡ଼ିଛି। ଶାସକ ଭାଜପା ସହ ଅନ୍ୟତମ ସହଯୋଗୀ ଅଲ୍ ଝାଡ଼ଖଣ୍ଡ ଷ୍ଟୁଡେଣ୍ଟ ୟୁନିୟନ୍ (ଏଜେଏସ୍ୟୁ)ର ମଧ୍ୟ ମତଭେଦ ବୃଦ୍ଧି ପାଇଛି। କେବଳ ଏତିକି ନୁହେଁ, ଟିକେଟ ବଣ୍ଟନକୁ ନେଇ ଭାଜପା ଭିତରେ ବି ମତଭେଦ ବୃଦ୍ଧି ପାଇଛି। ଏହାକୁ ନେଇ ମୁଖ୍ୟମନ୍ତ୍ରୀ ରଘୁବର ଦାସ ସରକାରଙ୍କ ଅଡ଼ୁଆ ବଢ଼ିବାରେ ଲାଗିଛି।
୮୧ ଆସନ ବିଶିଷ୍ଟ ଝାଡ଼ଖଣ୍ଡ ବିଧାନସଭା ନିର୍ବାଚନ ନଭେମ୍ବର ୩୦ରୁ ଡିସେମ୍ବର ୨୦ ମଧ୍ୟରେ ୫ ପର୍ଯ୍ୟାୟରେ ହେବ। ଏଥିପାଇଁ ସବୁ ଦଳ ପକ୍ଷରୁ ରଣନୀତି ପ୍ରସ୍ତୁତ କରାଯାଇଛି। ଗତ ସପ୍ତାହରେ ଚିରାଗ ପାଶ୍ୱାନଙ୍କ ଦଳ ଏଲ୍ଜେପି ଆସନ ବୁଝାମଣାକୁ ନେଇ ମତଭେଦ ହେବାରୁ ମେଣ୍ଟରୁ ଓହରିଯିବା ପରେ ୫୦ ଆସନରେ ପ୍ରାର୍ଥୀ ଘୋଷଣା କରିଥିଲା। ସେହିପରି ସହଯୋଗୀ ଦଳ ଏଜେଏସ୍ୟୁ ପକ୍ଷରୁ ଅଦ୍ୟାବଧି ତୃତୀୟ ପ୍ରାର୍ଥୀ ତାଲିକା ଘୋଷଣା କରାଯାଇଛି। ରବିବାର ପ୍ରକାଶିତ ତାଲିକାକୁ ମିଶାଇ ଏଜେଏସ୍ୟୁର ମୋଟ ୨୭ ପ୍ରାର୍ଥୀଙ୍କ ନାମ ପ୍ରକାଶ ପାଇଛି। ଏହାସହ ଭାଜପା ଏବଂ ଏଜେଏସ୍ୟୁ ୧୯ ନିର୍ବାଚନମଣ୍ଡଳୀରେ ମୁହଁାମୁହିଁ ସ୍ଥିତିକୁ ଆସିଛନ୍ତି। ଭାଜପା ପକ୍ଷରୁ ଏଯାଏ ୭୨ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିବାବେଳେ କେତେଜଣ ବରିଷ୍ଠ ନେତାଙ୍କୁ ଟିକେଟ ଦିଆଯାଇ ନାହିଁ, ଯାହାକୁ ନେଇ ଦଳ ମଧ୍ୟରେ ଅସନ୍ତୋଷ ଦେଖାଦେଇଛି। ପ୍ରାର୍ଥୀ ତାଲିକାରେ ଖାଦ୍ୟ, ସାଧାରଣ ବଣ୍ଟନ ଓ ଉପଭୋକ୍ତା ବ୍ୟାପାର ମନ୍ତ୍ରୀ ସରୟୁ ରୟଙ୍କ ନାମ ନ ଥିବାରୁ ସେ ମୁଖ୍ୟମନ୍ତ୍ରୀ ରଘୁବର ଦାସଙ୍କୁ ଚ୍ୟାଲେଞ୍ଜ ଦେବାକୁ ବାହାରିଛନ୍ତି। ସେ ରଘୁବରଙ୍କ ବିରୋଧରେ ଜାମସେଦପୁର (ଇଷ୍ଟ୍) ଆସନରେ ସ୍ବାଧୀନ ପ୍ରାର୍ଥୀ ହେବେ। ଏହାସହ ୨୦୧୪ରେ ଜିତିଥିବା ଜାମସେଦପୁର (ଓ୍ବେଷ୍ଟ) ନିର୍ବାଚନମଣ୍ଡଳୀରୁ ମଧ୍ୟ ଲଢ଼ିବା ପାଇଁ ନିଷ୍ପତ୍ତି ନେଇଛନ୍ତି। ନାମାଙ୍କନପତ୍ର ଦାଖଲ କରିବା ଦିନ ସେ କ୍ୟାବିନେଟରୁ ଇସ୍ତଫା ଦେବେ ବୋଲି ଘୋଷଣା କରିଛନ୍ତି। ରଘୁବରଙ୍କ ବିରୋଧରେ କଂଗ୍ରେସ ଦଳର ଜାତୀୟ ମୁଖପାତ୍ର ଗୌରବ ବଲ୍ଲଭଙ୍କୁ ଟିକେଟ ଦେଇଛି। ଏହାକୁ ମିଶାଇ କଂଗ୍ରେସ ପକ୍ଷରୁ ୨୭ ପ୍ରାର୍ଥୀଙ୍କ ନାମ ଘୋଷଣା ଶେଷ ହୋଇଥିବାବେଳେ ଆଉ ୪ ଜଣଙ୍କୁ ଟିକେଟ ମିଳିବା ବାକି ଅଛି। ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମ୍ଏମ୍), କଂଗ୍ରେସ ଏବଂ ଲାଲୁ ଯାଦବଙ୍କ ରାଷ୍ଟ୍ରୀୟ ଜନତା ଦଳ (ଏଲ୍ଜେପି) ମଧ୍ୟରେ ପ୍ରାକ୍ ନିର୍ବାଚନୀ ମେଣ୍ଟ ଘୋଷଣା କରାଯାଇଛି। ମହାମେଣ୍ଟ ପକ୍ଷରୁ ଜେଏମ୍ଏମ୍ କାର୍ଯ୍ୟକାରୀ ଅଧ୍ୟକ୍ଷ ତଥା ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରାଯାଇଛି। ଜେଏମ୍ଏମ୍ ୪୩ ଆସନରେ ଲଢ଼ିବାକୁ ଥିବାବେଳେ ଆର୍ଜେଡିକୁ ୭ ଆସନ ମିଳିଛି। ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ନେତୃତ୍ୱାଧୀନ ସଂଯୁକ୍ତ ଜନତା ଦଳ (ଜେଡିୟୁ) ଏନ୍ଡିଏର ଅଂଶୀଦାର ହୋଇଥିଲେ ହେଁ ଝାଡ଼ଖଣ୍ଡରେ ଅଲଗା ନିର୍ବାଚନ ଲଢ଼ୁଛି।