ଅନୁଗୋଳ ଅଫିସ/ ଛେଣ୍ଡିପଦା, ୬।୫ – ଅନୁଗୋଳ ଜିଲାରେ ମଜୁରିଆ ଭାବେ କାର୍ଯ୍ୟ କରୁଥିବା ଝାଡ଼ଖଣ୍ଡର ଶ୍ରମିକମାନଙ୍କ ମଧ୍ୟରୁ ୧୨୪ ଜଣଙ୍କୁ ଅନୁଗୋଳ ଜିଲା ପ୍ରଶାସନ ମଙ୍ଗଳବାର ସେମାନଙ୍କ ରାଜ୍ୟକୁ ପଠାଇ ଦେଇଛି। ସୋମବାର ଦୁଇଟି ବସ୍ରେ ୫୬ ଜଣ ଯାଇଥିବାବେଳେ ମଙ୍ଗଳବାର ୧୨୪ ଜଣଙ୍କୁ ପଠାଯାଇଥିବା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି। କେବଳ ଛେଣ୍ଡିପଦା ଅଞ୍ଚଳରେ ଫସି ରହିଥିବା ୧୧୫ ଜଣଙ୍କ ମଧ୍ୟରୁ ୬୪ଜଣଙ୍କୁ ଛେଣ୍ଡିପଦା ଜଗନ୍ନାଥ ମନ୍ଦିର ସମ୍ମୁଖ ପଡିଆକୁ ଅଣାଯାଇଥିଲ। ବିଡିଓ ସୁନୀଲ କୁମାର କେରକେଟା ଓ ଛେଣ୍ଡିପଦା ତହସିଲଦାର ତଥା ମାଜିଷ୍ଟ୍ରେଟ ଡାନିଏଲ ଏକ୍କାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସେଠାରେ ଡାକ୍ତର ଧୀରେନ କୁମାର ପ୍ରଧାନ ସ୍ବାସ୍ଥ୍ୟ ପରୀକ୍ଷା କରିବା ପରେ ସେମାନଙ୍କୁ ବସ୍ ଯୋଗେ ଜିଲା ପ୍ରଶାସନ ହେପାଜତକୁ ପଠାଯାଇଥିଲା। ସେଠାରୁ ଶ୍ରମିକମାନେ ସେମାନଙ୍କ ରାଜ୍ୟକୁ ଯାଇଥିବା ସୂଚନା ମିଳିଛି।