ଝାରସୁଗୁଡ଼ା ଅଫିସ,୩୦ା୪: ଝାରସୁଗୁଡ଼ା ଜିଲାକୁ ଲକ୍ଡାଉନ୍ ପରେ ଫେରିବେ ୫ ହଜାରରୁ ଊର୍ଦ୍ଧ୍ୱ ପ୍ରବାସୀ। ଏଥିପାଇଁ ସେମାନେ ଅନ୍ଲାଇନ୍ ଯୋଗେ ରେଜିଷ୍ଟ୍ରେଶନ କରିଛନ୍ତି। ସେମାନେ ଆସିବା ପରେ ସେମାନଙ୍କୁ କ୍ୱାରାଣ୍ଟାଇନ୍ରେ ରଖିବା ପାଇଁ ଜିଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଏନେଇ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ତପିରାମ ମାଝି ସୂଚନା ଦେଇଛନ୍ତି।
ଜିଲାର ପ୍ରବାସୀଙ୍କ ସମ୍ପର୍କରେ ଜିଲା ପ୍ରଶାସନ ପକ୍ଷରୁ ସର୍ଭେ କରାଯାଇଥିଲା। ୫ଟି ବ୍ଲକ ଓ ୩ଟି ମ୍ୟୁନିସିପାଲଟିରେ ସର୍ଭେ ପରେ ଜିଲା ବାହାରେ ୫ ହଜାର ୪୦୯ ଜଣ ରହୁଥିବା ଜଣାପଡ଼ିଥିଲା। ବର୍ତ୍ତମାନ ସୁଦ୍ଧା ୫ ହଜାର ୧୨୩ ପ୍ରବାସୀ ଅନଲାଇନ୍ ଯୋଗେ ରେଜିଷ୍ଟ୍ରେଶନ କରିସାରିଛନ୍ତି। ଲକ୍ଡାଉନ୍ ସରିବା ପରେ ସେମାନେ ଆସିଲେ କ୍ୱାରାଣ୍ଟାଇନ୍ ସେଣ୍ଟରରେ ରଖାଯିବ। ଏଥିପାଇଁ ସମସ୍ତ ବ୍ଲକ ଓ ପୌରାଞ୍ଚଳରେ କ୍ୱାରାଣ୍ଟାଇନ୍ ସେଣ୍ଟରର ବ୍ୟବସ୍ଥା କରାଯାଇଛି।
ସୂଚନାଯୋଗ୍ୟ ଯେ, ଝାରସୁଗୁଡ଼ା ବ୍ଲକରୁ ୪୬୯ଜଣ, କିର୍ମିରାରୁ ୨୯୦, କୋଲାବିରାରୁ ୨୯୫, ଲଇକେରାରୁ ୪୮୭, ଲଖନପୁରରୁ ୮୯୭, ଝାରସୁଗୁଡ଼ା ମ୍ୟୁନିସିପାଲିଟିରୁ ୧୧୫୯, ବ୍ରଜରାଜନଗରରୁ ୧୨୭୦ ଓ ବେଲପାହାଡ଼ରୁ ୨୫୬ ଜଣ ପ୍ରବାସୀ ରହିଛନ୍ତି।