ଝାରସୁଗୁଡା ଅଫିସ,୩।୫- ଝାରସୁଗୁଡା ଜିଲା ବ୍ରଜରାଜନଗର ମୁନିସିପାଲିଟି ଅଧୀନ ବୁଢ଼ୀଜାମ ଅଞ୍ଚଳକୁ ପଶ୍ଚିମବଙ୍ଗ ଅଞ୍ଚଳରୁ ଆସିଥିବା ଜଣେ ୧୮ ବର୍ଷିଆ ଯୁବତୀଙ୍କ ଗତ ବୁଧବାର କରୋନା ପଜିଟିଭ୍ ଆସିଥିବା ଜଣାପଡିଥିଲା। ଏହାର ୪ ଦିନ ପରେ ଜିଲାର ଲଖନପୁର ବ୍ଲକ ଅଂଚଳରେ ଜଣେ ୪୦ ବର୍ଷୀୟ ମହିଳା କରୋନା ପଜିଟିଭ୍ ଥିବା ଜଣାପଡିଛି। ଏହି ମହିଳାଙ୍କ ଘର ଉକ୍ତ ବ୍ଲକ କୋଡାଲୋଇ ଗାଁ ଅଧୀନ ଦହଲଡେରା ଅଞ୍ଚଳର ବୋଲି ଜଣାପଡିଛି। ଏନେଇ ଜିଲାପାଳ ସରୋଜ କୁମାର ସାମଲ ସୂଚନା ଦେଇଛନ୍ତି। ଗତ ୨୧ ତାରିଖ ଦିନ ଏହି ମହିଳା ସୁନ୍ଦରଗଡ଼ ଜିଲା ବନ୍ଦବାହାଲସ୍ଥିତ ତାଙ୍କର ଜଣେ ସମ୍ପର୍କୀୟଙ୍କ ଘରକୁ ଯାଇଥିଲେ। ଏବଂ ୨୬ ତାରିଖ ଦିନ ଘରକୁ ଫେରିଥିଲେ। ତାଙ୍କର ଜଣେ ସମ୍ପର୍କୀୟ ମହିଳା ସେହି ସମୟରେ ଗର୍ଭବତୀ ଥିବାରୁ ସେ ସୁନ୍ଦରଗଡ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ତେବେ ତାଙ୍କୁ ଦେଖିବାକୁ ଏହି ମହିଳା ଜଣକ ଯାଇଥିଲେ। ଅନ୍ୟପକ୍ଷରେ ଏହି ମହିଳା ହସ୍ପିଟାଲ ଯାଇଥିଲେ ନା ନାହିଁ ସେ ନେଇ ତଦନ୍ତ କରାଯାଉଥିବା ଜିଲାପାଳ ସାମଲ କହିଛନ୍ତି। ଏନେଇ ସୁନ୍ଦରଗଡ ଜିଲାପାଳଙ୍କ ସହ ଆଲୋଚନା କରି ମହିଳା କାହା କାହା ସହ ସଂସ୍ପର୍ଶରେ ଆସିଛନ୍ତି ତାହା ତଦନ୍ତ କରାଯାଉଛି ବୋଲି ମଧ୍ୟ କହିଛନ୍ତି।