ଝାରସୁଗୁଡ଼ା ବ୍ଲଡ୍ବ୍ୟାଙ୍କ୍ରେ ରକ୍ତ ଅଭାବ
54 ଝାରସୁଗୁଡ଼ା ଅଫିସ,୨୭।୩: କରୋନା ଭୂତାଣୁ ସଂକ୍ରମଣରୁ ଲୋକଙ୍କୁ ରକ୍ଷା କରିବା ପାଇଁ ସମଗ୍ର ଭାରତରେ ୨୧ ଦିନ ପାଇଁ ଲକ୍ ଡାଉନ ଘୋଷଣା କରାଯାଇଛି। କୌଣସି ଜରୁରୀ କାମ ନ ଥିଲେ ଘରୁ ନ ବାହାରିବାକୁ ସମସ୍ତଙ୍କୁ ପରାମର୍ଶ ଦିଆଯାଇଛି । ଏହି ପରିପ୍ରେକ୍ଷୀରେ ଝାରସୁଗୁଡ଼ା ବ୍ଲଡ୍ବ୍ୟାଙ୍କ୍ରେ ରକ୍ତ ଅଭାବ ଦେଖାଦେବା ଏକ ବଡ ସମସ୍ୟା ଭାବେ ଠିଆ ହୋଇଛି। ଗତ ୨୦ ତାରିଖରୁ ରକ୍ତ ଅଭାବ ରୋଗୀ ଓ ସେମାନଙ୍କ ସମ୍ପକୀୟଙ୍କ ପାଇଁ ଭୟଙ୍କର ପରିସ୍ଥିତି ସୃଷ୍ଟି କରିଛି। ରକ୍ତ ଅଭାବରୁ ବହୁ ଗୁରୁତର ରୋଗୀ ଏବେ ବି ବିଭିନ୍ନ ଡାକ୍ତରଖାନାରେ ପଡି ରହିଛନ୍ତି। କରୋନା କଟକଣା ଯୋଗୁ ଚଳିତ ମାସ ୧୯, ୨୨ ଓ ୩୧ ତାରିଖରେ ହେବାକୁ ଥିବା ରକ୍ତଦାନ ଶିବିର ବାତିଲ ହେବାରୁ ଏପରି ସ୍ଥିତି ଦେଖା ଦେଇଛି। ଅନ୍ୟପକ୍ଷେ କୌଣସି ରକ୍ତଦାତା ମଧ୍ୟ ରକ୍ତଦାନ କରିବାକୁ ବ୍ଲଡ୍ ବ୍ୟାଙ୍କ୍କୁ ଆସୁନାହାନ୍ତି। ଏପରି ସ୍ଥଳେ ଜିଲା ସ୍ବାସ୍ଥ୍ୟ ବିଭାଗ ଚୁପ୍ ହୋଇ ବସିଛି। କେବଳ ଜରୁରୀ ପରିସ୍ଥିତି ପାଇଁ ଓ ପଜିଟିଭ, ଏ ପଜିଟିଭ, ବି ପଜିଟିଭ ଓ ଏବି ପଜିଟିଭର ୩ଟି ଲେଖାଏଁ ୟୁନିଟ ରକ୍ତ ରଖା ଯାଇଥିବା ଜଣେ ବିଭାଗୀୟ ଅଧିକାରୀ କହିଛନ୍ତି। ଅନ୍ୟପକ୍ଷେ ଜିଲା ମୁଖ୍ୟ ଚିକିତ୍ସାଳୟରୁ ରକ୍ତଭଣ୍ଡାରର ଦୂରତା ପ୍ରାୟ ୮ କି.ମି.। ଲକ୍ ଡାଉନ୍ ଯୋଗୁ ଲୋକେ ମୁଖ୍ୟ ଚିକିତ୍ସାଳୟରୁ ରକ୍ତ ଭଣ୍ଡାରକୁ ଆସିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ରାଜ କିଶୋର ସାହୁ ନାମକ ଜଣେ ବ୍ୟକ୍ତି କହିଛନ୍ତି, ସେ ତାଙ୍କ ଜଣେ ସମ୍ପର୍କୀୟଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଛନ୍ତି। ରକ୍ତ ପାଇଁ ପ୍ରାୟ ୮ କି.ମି. ଦୂର ମଙ୍ଗଳ ବଜାରକୁ ଆସିବାକୁ ପଡିଛି। ଏହି ରାସ୍ତାରେ ଆସିଲେ ପୋଲିସକୁ ବହୁ ଉତ୍ତର ଦେବାକୁ ପଡୁଛି। ଏଣୁ ଯଦି ଡାକ୍ତରଖାନା ପରିସରରେ ରକ୍ତ ଭଣ୍ଡାର ଥାନ୍ତା ତେବେ ଏଭଳି ହଇରାଣ ହେବାକୁ ପଡି ନ ଥାନ୍ତା। ସେହିଭଳି ଅନ୍ୟ ଜଣେ ରୋଗୀଙ୍କ ସମ୍ପର୍କୀୟ ବେଦବ୍ୟାସ ଦେହୁରୀ କୁହନ୍ତି, ରକ୍ତଭଣ୍ଡାରରେ ରକ୍ତ ନ ଥିବାରୁ ତାଙ୍କୁ ବହୁ ହଇରାଣ ହେବାକୁ ପଡିଛି। କହୁ କଷ୍ଟରେ ଜଣେ ରକ୍ତଦାତା ଯୋଗାଡ କରି ରକ୍ତ ଭଣ୍ଡାରକୁ ଆସିଥିଲୁ। ରକ୍ତ ନେବା ପରେ ମୋର ସମ୍ପର୍କୀୟଙ୍କୁ ଦିଆଯାଇଥିଲା। ତେବେ ଏ ସମ୍ପର୍କରେ ରକ୍ତ ଭଣ୍ଡାର ଦାୟିତ୍ୱରେ ଥିବା ଡା. ଏସ୍.ଜୋଜୋଙ୍କୁ ପଚାରିବାରୁ କରୋନା କଟକଣା ପାଇଁ ରକ୍ତ ଦାନ ଶିବିରଗୁଡିକ ଶେଷ ମୁହୂର୍ତ୍ତରେ ବାତିଲ ହୋଇଯାଇଛି। ବର୍ତ୍ତମାନ ସାମାଜିକ ଦୂରତ୍ୱ ତଥା ଜନଗହଳିକୁ ବାରଣ କରାଯାଇଥିବାରୁ ରକ୍ତଦାନ ଶିବିର ଆୟୋଜନ ସମ୍ଭବ ହୋଇ ପାରୁନାହିଁ। ବ୍ୟକ୍ତିଗତ ଭାବେ ରକ୍ତଦାତା ଆସିଲେ ରୋଗୀଙ୍କ ଆବଶ୍ୟକତା ପୂରଣ ହେଉଛି। ସେହିପରି ଜିଲା ମୁଖ୍ୟ ଚିକିତ୍ସାଳୟ ଓ ରକ୍ତଭଣ୍ଡାର ମଧ୍ୟରେ ଥିବା ଦୂରତ୍ୱ ସମ୍ପର୍କରେ ସେ କୁହନ୍ତି, ଜିଲା ମୁଖ୍ୟ ଚିକିତ୍ସାଳୟ ନିକଟରେ ଜାଗା ଚିହ୍ନଟ କରାଯାଇଛି। ପରବର୍ତ୍ତୀ ସମୟରେ ଏହା ସ୍ଥାନାନ୍ତର ହେବ ।
ସୂଚନାଯୋଗ୍ୟ, ଝାରସୁଗୁଡ଼ା ସହର ମଙ୍ଗଳବଜାରରେ ଥିବା ଜିଲା ମୁଖ୍ୟ ଚିକିତ୍ସାଳୟକୁ ସହର ବାହାରକୁ ସ୍ଥାନାନ୍ତର କରାଯାଇ ସେଠାରେ ଜନସାଧାରଣଙ୍କୁ ଉନ୍ନତ ମାନର ସେବା ଯୋଗାଇବାକୁ ସ୍ବାସ୍ଥ୍ୟ ବିଭାଗ ଯୋଜନା କରିଥିଲା। ଗତ ବର୍ଷ ମେ’ମାସରେ ଏହି ପରିବର୍ତ୍ତନ କରାଯାଇଥିଲା। ହେଲେ ଏହି ପରିବର୍ତ୍ତନ ବେଳେ କିନ୍ତୁ ରକ୍ତ ଭଣ୍ଡାରକୁ ଜିଲା ନୂଆ ମୁଖ୍ୟ ଚିକିତ୍ସାଳୟ ସହିତ ସଂଯୋଗ କରାଯାଇ ନ ଥିଲା। ସ୍ବାସ୍ଥ୍ୟ ବିଭାଗର ଏହି ଅବହେଳା ଯୋଗୁ ଲୋକେ ପ୍ରତିଦିନ ମୁଖ୍ୟ ଚିକିତ୍ସାଳୟରୁ ମଙ୍ଗଳ ବଜାରସ୍ଥିତ ରକ୍ତ ଭଣ୍ଡାର ପଯର୍ର୍ୟନ୍ତ ପ୍ରାୟ ୮ କି.ମି. ଦୂରକୁ ଯାଇ ହଇରାଣ ହୋଇ ଆସୁଛନ୍ତି।