ଝାରସୁଗୁଡା ଅଫିସ,୫ା୪- କରୋନା ଭୁତାଣୁ ସଂକ୍ରମଣକୁ ରୋକିବା ପାଇଁ ଝାରସୁଗୁଡା ଜିଲା ପ୍ରଶାସନ ବିଭିନ୍ନ ପଦକ୍ଷେପ ମାନ ନେଉଛି । ଜିଲା ପ୍ରଶାସନ ସହିତ ଜିଲା ସ୍ୱାସ୍ଥ୍ୟ ବିଭାଗ ଏଥିପାଇଁ ସଜାଗ ରହିଛି ବୋଲି ଜିଲାପାଳ ସରୋଜ କୁମାର ସାମଲ କହିଛନ୍ତି । ସୂଚନା ଦେଇ ସେ କହିଛନ୍ତି ଯେ, ଅଦ୍ୟାବଧି ଜିଲାର ୧୮୪୦ ଜଣ ହୋମ କ୍ୱାରେଣ୍ଟାଇନରେ ଅଛନ୍ତି । ଜିଲାରେ ୮୮ଟି ଆଇସୋଲେସନ ସେଣ୍ଟର କରାଯାଇଛି । ରବିବାର ସୁଦ୍ଧା ଜିଲାରୁ ୫୪ଟି ନମୁନା ପରୀକ୍ଷା ପାଇଁ ଯାଇଥିଲା। ସେଥିରୁ ୧୭ ଜଣଙ୍କ ରିପୋର୍ଟ ଆସିଛି ଯାହା ନେଗେଟିଭ ରହିଛି । ଏହା ସହିତ ଜିଲାର କୌଣସି ବ୍ୟକ୍ତି ନିଜାମୁଦ୍ଦିନ କାର୍ଯ୍ୟକ୍ରମକୁ ଯାଇ ନାହାନ୍ତି । ଏ ନେଇ ଜିଲାରେ ଥିବା ୨୧ଟି ମସଜିଦର ମୌଲାନାଙ୍କ ସହିତ ପ୍ରଶାସନ ଆଲୋଚନା କରିସାରିଛି । ସହରର ମଙ୍ଗଳବଜାରରେ ଥିବା ପୁରୁଣା ଜିଲା ମୁଖ୍ୟ ଚିକିତ୍ସାଳୟ କୋଠାରେ ୧୫୦ ଶଯ୍ୟା ବିଶିଷ୍ଟ କୋଭିଡ-୧୯ ହସ୍ପିଟାଲ ସ୍ଥାପନ କରାଯିବ । ଏଥିପାଇଁ କେୟାର ସହଯୋଗ କରୁଛି । ଆସନ୍ତା ତିନି ଦିନ ମଧ୍ୟରେ ଜିଲା ପ୍ରଶାସନ ଓ କେୟାର କର୍ତ୍ତୃପକ୍ଷଙ୍କ ମଧ୍ୟରେ ଚୁକ୍ତିନାମା ହେବ ।