ଭଞ୍ଜନଗର,୨୧।୬(ଡି.ଏନ୍.ଏ.)- ଲୋକେ ସାମାଜିକ ଦୁରତ୍ୱ ବଜାୟ ନରଖିବା, ମାସ୍କ ବ୍ୟବହାର ନକରିବା, ନିୟମିତ ସଫା ନରହିବା ହେତୁ ଗଞ୍ଜାମ ଜିଲାରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ିଚାଲିଛି। ଶୁକ୍ରବାର ସୁଦ୍ଧା ଭଞ୍ଜନଗର ବ୍ଲକର ବିଭିନ୍ନ ଗ୍ରାମରୁ ୧୦ ବ୍ୟବସାୟୀ କରୋନା ପଜିଟିଭ୍ ଚିହ୍ନଟ ହେଲେଣି। ଯାହାକୁ ଏବେ ସମସ୍ତଙ୍କ ଚିନ୍ତା ବଢାଇଛି। ବ୍ୟବସାୟୀମାନେ ଆକ୍ରାନ୍ତ ହେବାଯୋଗୁ ଗୋଷ୍ଠୀ ସଂକ୍ରମଣ ଆଶଙ୍କା ଦେଖାଦେଇଛି। ଶୁକ୍ରବାର ବାରୁଡା ଗ୍ରାମର ୨ ବ୍ୟବସାୟୀ ଆକ୍ରାନ୍ତ ହେବାପରେ ଶନିବାର ପ୍ରଶାସନ ପକ୍ଷରୁ ଉକ୍ତ ଗ୍ରାମକୁ ସିଲ୍ କରାଯିବା ସହ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି। ଏଥିସହ ସମ୍ପୃକ୍ତ ଗ୍ରାମ ନିକଟରେ ଥିବା ୩ଟି ଗ୍ରାମକୁ ବଫର୍ ଜୋନ ଘୋଷଣା କରାଯାଇଛି। ଏହାପୂର୍ବରୁ ଝାଲିଆଗୋଛାକୁ କଣ୍ଟେନମେଣ୍ଟ ଜୋନ୍ ଘୋଷଣା କରାଯାଇଛି। ବିଡିଓ ଅନିଲ କୁମାର ସେଠୀ କଣ୍ଟେନମେଣ୍ଟ ଜୋନ୍ ଉପରେ ସ୍ବତନ୍ତ୍ର ନଜର ରଖିଛନ୍ତି। ଅପରପକ୍ଷେ ଶନିବାର ଓ ରବିବାର ସଟ୍ଡାଉନ ଯୋଗୁ ଲୋକଙ୍କ ଚଳପ୍ରଚଳ ପ୍ରାୟ କମିଯାଇଛି। ଯେଉଁମାନେ ଅମାନିଆ ହୋଇ ବାହାରକୁ ବାହାରୁଛନ୍ତି ସେମାନଙ୍କୁ ଜରିମାନା ପକାଯାଉଛି। ଉପ ଜିଲାପାଳ ରାଜେନ୍ଦ୍ର ମିଞ୍ଜ ଶନିବାର ଉପଖଣ୍ଡର ବିଭିନ୍ନ ଅଞ୍ଚଳ ପରିଦର୍ଶନ କରି ସଟ୍ଡାଉନ ସ୍ଥିତି ଅନୁଧ୍ୟାନ କରିଛନ୍ତି।