ବେଙ୍ଗାଲୁରୁ,୫।୮: ବେଙ୍ଗାଲୁରୁର ଏସ୍ଆର ନଗରର ଏକ ଆପାର୍ଟମେଣ୍ଟରେ ଭୟଙ୍କର ଘଟଣା ସାମ୍ନାକୁ ଆସିଛି। ସେଠାରେ ଜଣେ ମହିଳା ନିଜ ୪ ବର୍ଷର ଝିଅକୁ ଚାରି ମହଲା ଆପାର୍ଟମେଣ୍ଟର ବାଲକୋନୀରୁ ଫିଙ୍ଗି ଦେଇଛନ୍ତି। ଏହି ଦୃଶ୍ୟ ସିସିଟିଭିରେ କଏଦ୍ ହୋଇଛି। ତେବେ ନାବାଳିକାଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିବା ପୋଲିସ କହିଛି। ପୋଲିସ ସୂଚନାମୁତାବକ, ଚାରି ବର୍ଷର ଝିଅଟିକୁ ଶୁଣା ଯାଉଥିଲେ ମଧ୍ୟ ସେ କଥା କହିପାରୁ ନଥିଲେ। ଏହାକୁ ନେଇ ମହିଳା ଜଣଙ୍କ ଚିନ୍ତିତ ଥିଲେ। ମହିଳା ଜଣଙ୍କ ମାନସିକ ଭାରସାମ୍ୟ ହରାଇ ଏଭଳି କାଣ୍ଡ କରିଥିବା ପୋଲିସ ଅନୁମାନ କରୁଛି। ମହିଳାଙ୍କ ସ୍ବାମୀଙ୍କ ଅଭିଯୋଗକୁ ଭିତ୍ତି କରି ପୋଲିସ ମହିଳାଙ୍କୁ ଗିରଫ କରି ତଦନ୍ତ ଚଳାଇଛି। ଏହାସହ ମହିଳାଙ୍କ ମାନସିକ ସ୍ବାସ୍ଥ୍ୟ ମଧ୍ୟ ଯାଞ୍ଚ କରାଯାଉଥିବା ନେଇ ପୋଲିସର ଜଣେ ବରିଷ୍ଠ ଅଧିକାରୀ କହିଛନ୍ତି। ତେବେ ମହିଳା ଜଣଙ୍କ ଦନ୍ତ ଚିକିତ୍ସକ ହୋଇଥିବାବେଳେ ତାଙ୍କ ସ୍ବାମୀ ସଫ୍ଟୱେୟାର ଇଞ୍ଜିନିୟର।
