ଦିଗପହଣ୍ଡି,୨୦ା୧୧(ଡି.ଏନ.ଏ.)- ଦିଗପହଣ୍ଡି ପୋଲିସ ମଙ୍ଗଳବାର କଲ୍ୟାଣପୁର ଗଁାର ମଞ୍ଜୁଳା ଗୌଡଙ୍କୁ ଗିରଫ କରି କୋର୍ଟଚାଲାଣ କରିଛି। ଥାନା ମାମଲା ନଂ. ୨୩୬/୧୯ ଦଫା ୩୪୧/୩୨୩/୨୯୪/୫୦୬ ଅନୁଯାୟୀ ଜାମିନ ନାମଞ୍ଜୁର ହେବାରୁ ଅଭିଯୁକ୍ତାଙ୍କୁ ଦିଗପହଣ୍ଡି ସବଜେଲ ହାଜତକୁ ପଠାଇ ଦିଆଯାଇଛି। ମଙ୍ଗଳବାର ସକାଳ ପ୍ରାୟ ୮ ଟାରେ ମଞ୍ଜୁଳା ଏକ ଦା’ ଧରି ଗଁାରେ ରହୁଥିବା ତାଙ୍କ ଝିଅ ଜୟନ୍ତୀଙ୍କ ଘର ପାଖକୁ ଯାଇ ଗାଳି ଗୁଲଜ କରିବା ସହ ଦା’ରେ ଆକ୍ରମଣ ଉଦ୍ୟମ କରିଥିଲେ। ପଡୋଶୀ ପହଞ୍ଚି ଛଡାଛଡି କରିଥିଲେ। ଜୟନ୍ତୀ ଏନେଇ ଏତଲା ଦେବା ପରେ ପୋଲିସ ଘଟଣାର ତଦନ୍ତ କରି ଅଭିଯୁକ୍ତାଙ୍କୁ ଗିରଫ କରିଥିଲା। ଏସ୍ଆଇ ମାଧବ ଚନ୍ଦ୍ର ଟାକରୀଙ୍କ ସୂଚନାନୁସାରେ, ମଞ୍ଜୁଳାଙ୍କ ଝିଅ ଜୟନ୍ତୀ ପରିବାର ଲୋକଙ୍କ ବିନା ସହମତିରେ ଗ୍ରାମର ସଞ୍ଜୟ କୁମାର ଗୌଡଙ୍କୁ ଇଚ୍ଛାରେ ବିବାହ କରି ଦିଗପହଣ୍ଡିରେ ଏକ ଭଡ଼ାଘରେ ରହୁଥିଲେ। ଜୁଲାଇ ୧୮ ତାରିଖ ରାତି ପ୍ରାୟ ୯ ଟାରେ ଜ୍ୱାଇଁ ସଞ୍ଜୟ ଦିଗପହଣ୍ଡି ପୁଞ୍ଜିକୟଁା ଛକ ନିକଟ ଏକ ଡ୍ରେସ ଦୋକାନ ପାଖରେ ଠିଆ ହୋଇଥିବା ବେଳେ ଶ୍ୱଶୁର ତଥା ମଞ୍ଜୁଳାଙ୍କ ସ୍ବାମୀ ଉମାକାନ୍ତ ଗୌଡ ତାଙ୍କୁ ଛୁରିରେ ଅତର୍କିତ ଆକ୍ରମଣ କରି ଫେରାର ହୋଇଯାଇଥିଲେ। ଛୁରା ମାଡ଼ରେ ସଞ୍ଜୟଙ୍କ ଅନ୍ତବୁଜୁଳା ବାହାରି ପଡ଼ିଥିଲା। ତାଙ୍କ ମୁଣ୍ଡ ଓ କାନ୍ଧରେ ଗଭୀର ଆଘାତ ଲାଗିଥିଲା। ତାଙ୍କୁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ ଡାକ୍ତରଖାନା ସ୍ଥାନାନ୍ତର କରାଯାଇଥିଲା। ଘଟଣାର ପରଦିନ ସଞ୍ଜୟଙ୍କ ସ୍ତ୍ରୀ ଜୟନ୍ତୀ ଥାନାରେ ବାପା ଉମାକାନ୍ତଙ୍କ ନଁାରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ମାମଲା ନଂ. ୧୭୯/୧୯ରେ ପୋଲିସ ଅଭିଯୁକ୍ତ ଉମାକାନ୍ତଙ୍କ ନଁାରେ ହତ୍ୟା ଉଦ୍ୟମ ମକଦ୍ଦମା ରୁଜୁ କରିଥିଲା। ଘଟଣା ପରଠାରୁ ଦୁଇ ପରିବାର ମଧ୍ୟରେ ଉତ୍ତେଜନା ଲାଗି ରହିଥିବା ସେ କହିଛନ୍ତି।