ନୋଏଡା, ୬।୯: ଉତ୍ତର ପ୍ରଦେଶର ନୋଏଡା ଏକ ଅଭାବନୀୟ ଘଟଣା ଘଟିଛି। ଝିଅ ବୁଲେଟ୍ ଚଢିବାରୁ କିଛି ଦୁର୍ବୃତ୍ତ ତାଙ୍କ ପିତାଙ୍କୁ ଗୁଳି ମାରିଛନ୍ତି। ପୋଲିସ ଏହି ଘଟଣାରେ ଦୁଇ ଜଣଙ୍କ ନାଁରେ ମାମଲା ରୁଜୁ କରିଛି। ସୂଚନାଯୋଗ୍ୟ, ଗ୍ରେଟର ନୋଏଡାର ଜାରଚା ଅଞ୍ଚଳରେ ସୁନୀଲ କୁମାର ନାମକ ଜଣେ କୃଷକ ରୁହନ୍ତି। ତାଙ୍କ ୪ ଝିଅ ଏବଂ ଦୁଇଟି ପୁଅ ଅଛନ୍ତି। ସବା ସାନ ଝିଅ କଲେଜ ଯିବାରେ ଅସୁବିଧା ହେବାରୁ ଝିଅର ପସନ୍ଦ ମୁତାବକ ତାଙ୍କୁ ଏକ ବୁଲେଟ୍ ଗାଡି ଆଣିଦେଇଥିଲେ ପିତା। ଗାଁରେ ଝିଅ ବୁଲେଟ୍ ଚଢିବାରୁ କିଛି ଲୋକଙ୍କୁ ଏହା ପସନ୍ଦ ଆସି ନ ଥିଲା। ଝିଅ ବୁଲେଟ ଚଢିଲେ ଗାଁ ପରିବେଶ ଖରାପ ହେଉଛି ବୋଲି ଗାଁ ପଞ୍ଚାୟତରେ ନିଷ୍ପତ୍ତି ନିଆଯାଇଥିଲା। ଏହାକୁ ମାନି ନ ଥିଲେ ସୁନୀଲ। ଅଗଷ୍ଟ ୩୧ ରାତିରେ ଗାଁ ଜଣେ ଶିକ୍ଷକ ସଚିନ ଏବଂ କୁଲୁ ସୁନୀଲ ନାମକ ଦୁଇ ଜଣ ବ୍ୟକ୍ତି ହାତରେ ବନ୍ଧୁକ ଧରି ସୁନୀଲଙ୍କ ଘରେ ପହଞ୍ଚି ତାଙ୍କୁ ଧମକ ଦେଇଥିଲେ। ଯଦି ଝିଅକୁ ବୁଲେଟ ଚଢିବାକୁ ବାରଣ ନ କର ତେବେ ପରିସ୍ଥିତି ଭୟଙ୍କର ହେବ। କିନ୍ତୁ ସୁନୀଲ ଏଥିରେ ଅରାଜି ହୋଇ ଝିଅ ବୁଲେଟ୍ ଚଢିବ ବୋଲି କହିଥିଲେ। ସେମାନେ ତାଙ୍କୁ ଗୁଳିମାଡ କରି ଫେରାର୍ ହୋଇଯାଇଥିଲେ। ଏନେଇ ସୁନୀଲଙ୍କ ପରିବାର ପକ୍ଷରୁ ପୋଲିସରେ ସୂଚନା ଦିଆଯାଇଥିଲା। ପୋଲିସ ଘଟଣାର ତଦନ୍ତ ଆରମ୍ଭ କରିଛି।