ବମ୍ବେ: ଶୋକରେ ବଲିଉଡ୍। ଗତ ଦୁଇ ଦିନ ମଧ୍ୟରେ ଦୁଇଜଣ ପ୍ରତିଷ୍ଠିତ କଳାକାର ଇରଫାନ୍ ଖାନ୍ ଏବଂ ଋଷି କପୁରଙ୍କୁ ବଲିଉଡ୍ ହରାଇଛି। ଏହାକୁ ସହଜରେ କେହି ଗ୍ରହଣ ମଧ୍ୟ କରିପାରୁନାହାନ୍ତି। ସମ୍ପ୍ରତି ଦେଶରେ ଲକ୍ଡାଉନ୍ ସ୍ଥିତି ଜାରି ରହିଥିବାରୁ ପ୍ରଶଂସକମାନେ ମଧ୍ୟ ନିଜ ପ୍ରିୟ ଅଭିନେତାଙ୍କ ଶେଷ ଦର୍ଶନରୁ ବଞ୍ଚିତ ହୋଇଛନ୍ତି। ଏପରିକି ଋଷି କପୁରଙ୍କ ଝିଅ ରିଦ୍ଧିମା କପୁର ମଧ୍ୟ ଶେଷ ଥର ପାଇଁ ବାପାଙ୍କୁ ଦେଖିପାରିନାହାନ୍ତି।
ରିଦ୍ଧିମା ଦିଲ୍ଲୀରେ ରହୁଥିବା ବେଳେ ଋଷି କପୁର ବମ୍ବେର ଏକ ଡାକ୍ତରଖାନାରେ ଶେଷ ନିଶ୍ୱାସ ତ୍ୟାଗ କରିଥିଲେ। ଲକ୍ଡାଉନ୍ ଯୋଗୁ ଅନ୍ତିମ ସତ୍କାରରେ ସାମିଲ ହେବାକୁ କେବଳ ପଚିଶଜଣଙ୍କୁ ମିଳିଥିଲା ଅନୁମତି। ସାମାଜିକ ଦୂରତ୍ୱ ରକ୍ଷା କରି ସମସ୍ତ କାର୍ଯ୍ୟ ସମ୍ପର୍ଣ୍ଣ ହୋଇଥିଲା। ହେଲେ ଏସବୁରେ ସାମିଲ ହୋଇପାରି ନ ଥିଲେ ରିଦ୍ଧିମା।
ଏହାକୁ ନେଇ ଭାଙ୍ଗି ପଡ଼ିଛନ୍ତି ସେ। ନିଜର ଇନ୍ଷ୍ଟା ଷ୍ଟୋରୀରେ ସେ ବାପାଙ୍କୁ ମନେ ପକାଉଥିବା କହିଛନ୍ତି। କିଛି ସମୟ ପରେ ସେ ବମ୍ବେ ପହଞ୍ଚିବେ ବୋଲି ମଧ୍ୟ କହିଛନ୍ତି। ଋଷିଙ୍କ ସହ ଏକାଧିକ ଫଟୋ ଶେୟାର କରି ଏଇ କିଛି ସମୟ ମଧ୍ୟରେ ସେ ବହୁତ ମନେ ପକାଇଲେଣି। ଏଣୁ ଫେରି ଆସନ୍ତୁ ବୋଲି ମଧ୍ୟ କହୁଥିବା ଦେଖାଯାଇଛି। ପୋଷ୍ଟକୁ ନେଇ ଅନେକେ ଭାବବିହ୍ବଳ ମଧ୍ୟ ହେଉଛନ୍ତି।