କୋମନା,୨୩।୮(ଡି.ଏନ.ଏ.): ନୂଆପଡ଼ା ଜିଲା କୋମନା ବ୍ଲକ ପଏଁର ପଁଚେତ୍ ଅଧୀନ ମହୁଲଭଟା ଗଁାର ଝନେ ଗରିବ୍ ଛାତ୍ରୀ ଟଁକା ପଏସା ଅଭାବୁ ଉଚ ଶିକ୍ଷାରୁ ବଁଚିତ୍ ହେଇଛନ୍।
ସୂଚନା ଅନ୍ସାରେ ମହୁଲଭଟା ଗଁାର ସ୍ବର୍ଗତ ଗଜାନନ ପାତ୍ରକଁର ଝି’ ଜ୍ୟୋତିଜୟା ପାତ୍ର(୧୭)। ଚଲତି ବଛର ସେ ଯୁକ୍ତ ଦୁଇ ପାସ୍ କରିଛନ୍। ହେଲେ ଟଁକା ପଏସା ଅଭାବୁ ଯୁକ୍ତ ତିନ୍ରେ ନଁା ଲେଖାବାରୁ ବଁଚିତ୍ ହେଇଛନ୍। ଯେନ୍ଥିରଲାଗି ତାକର ସବୁ ସପନ୍ ଏହେଦେ ଭାଂଗି ଯାଇଛେ। ୨୦୧୩ରେ ବାପା ଗଜାନନ ପାତ୍ର ହଠାତ୍ ହୃଦ୍ଘାତର ଶିକାର ହେଇ ଆରପାରକେ ଚାଲିଗଲେ। ଏହେଦେ ବିଧବା ମା’ ଆର ଦୁଇ ଭାଇ ବହେନ୍କୁ ନେଇ ତାକର ପରିବାର। ସାନ୍ ଭାଇ ଗଁା ସ୍କୁଲରେ ପରଥମ ଶ୍ରେଣୀରେ ପଢ଼ୁଥିଲାବେଲେ ମା’ ଝି’ କୁଲିମଜୁରି କରି ପରିବାର ଚଲଉଛନ୍। ସେଥ୍ରୁ ଯାହା ବଲ୍କୁଛେ ସେଥ୍ରେ ଦୁଇ ଭାଇ ଭହେନ୍ ପାଠ୍ ପଢ଼ୁଥିଲେ। ଇତାର ବାହାରେ ପରିବାରକେ ମିଲୁଥିବାର ସରକାରୀ ସାହାଯ୍ କହେଲେ ମା’ ପାଉଥିବାର ୫ଶହ ଟଁକା ବିଧବା ଭତା ଆର ୩୫ କେ.ଜି. ଚାଉଲ ସାହାଭରସା। ଏନ୍ତା ପରିସ୍ଥିତିରେ ସେ ଚଲତି ବଛର ପାଠ୍ପଢ଼ବାର ଅନେକ ଲୁକ୍କୁ ସାହାଯ୍ ମାଗି ନିରାଶ ହେଇଛନ୍। ଯେନ୍ଥିରଲାଗି ଏହେଦେ ତାକର ପାଠ୍ପଢ଼ାରେ ଗଏଁଠ୍ ପଡ଼ିଛେ। ଏନ୍ତାଥି ଉପେ ଶୂଇନ୍ ବିଧବା ମା’ ଝି’ର ପାଠ୍ପଢ଼ା ସାହାଯ୍ ଲାଗି ଗଣମାଧ୍ୟମ ଜରିଆରେ ସରକାରୀ, ବେସରକାରୀ, ସହୁରୁଦ୍ ଲୁକ୍କୁ ସହଯୋଗ୍ର ହାତ୍ ବଢ଼ାବାକେ ଗୁହାରି କରିଛନ୍।