ବ୍ରହ୍ମପୁର ଅଫିସ,୧୮ା୧୨- ବ୍ରହ୍ମପୁର ଟାଉନ ଥାନା ମିଲିଟାରୀ ଲାଇନ୍ରେ ଥିବା କାନାରା ବ୍ୟାଙ୍କରୁ ଦୁର୍ବୃତ୍ତମାନେ ଜୁଲାଇ ୬ରେ ଜଣେ ଜମାକାରୀଙ୍କଠାରୁ ୧୮ ହଜାର ଟଙ୍କା ଠକି ନେଇଥିଲେ। ଜମାକାରୀ ଶିବରାମ ସାହୁ ଥାନାରେ ଅଭିଯୋଗ କରିବା ପରେ ପୋଲିସ ମାମଲା ରୁଜୁ କରିଥିଲା। ପୋଲିସ ବ୍ୟାଙ୍କକୁ ଯାଇ ସିସି ଟିଭି ଫୁଟେଜ ସଂଗ୍ରହ କରି ଜମାକାରୀଙ୍କ ନିକଟରେ ଠିଆ ହୋଇଥିବା ଯୁବକମାନଙ୍କୁ ଚିହ୍ନଟ କରିଥିଲା। ଘଟଣାର ୫ ମାସ ବିତିଯାଇଥିଲେ ମଧ୍ୟ ଅଭିଯୁକ୍ତଙ୍କୁ ଧରି ପାରିନାହିଁ। ଅନ୍ୟପଟେ ଜମାକାରୀ ଜଣକ ଟଙ୍କା ନ ପାଇ ନିରାଶ ହୋଇଛନ୍ତି। ସୂଚନାଯୋଗ୍ୟ, ଟାଉନ ଥାନା ଅନ୍ତର୍ଗତ ମିଲିଟାରୀ ଲାଇନ୍ରେ ଥିବା କାନାରା ବ୍ୟାଙ୍କରେ ଲୁଟେରାମାନେ ଜଣେ ଜମାକାରୀଙ୍କୁ ଟାର୍ଗେଟ କରିଥିଲେ। ନୀଳାଦ୍ରିବିହାରର ଶିବରାମ ସାହୁ ଜୁଲାଇ ୬ରେ ୫୦ ହଜାର ଟଙ୍କା ଜମା କରିବାକୁ ଯାଇ ଧାଡିରେ ଠିଆ ହୋଇଥିଲେ। ତାଙ୍କ ପଛରେ ଠିଆ ହୋଇଥିବା ୨ ଜଣ ଯୁବକ ଶିବରାମଙ୍କୁ ସେ ଧରିଥିବା ୨ ହଜାର ଟଙ୍କାର କ୍ରମିକ ସଂଖ୍ୟାଗୁଡିକ ଚାଲାଣ ଫର୍ମରେ ଲେଖିବାକୁ ହେବ ନଚେତ୍ ବ୍ୟାଙ୍କ ଟଙ୍କା ରଖିବ ନାହିଁ ବୋଲି କହିଥିଲେ। ସେ ଧରିଥିବା ୫୦ ହଜାର ଟଙ୍କା ଯୁବକମାନଙ୍କୁ ଦେଇଥିଲେ। ସେଥିରେ ଥିବା ୨ ହଜାର ଟଙ୍କା ନୋଟଗୁଡିକର କ୍ରମିକ ନମ୍ବର ଲେଖିବା ଆଳରେ ସେଥିରୁ ୧୮ ହଜାର ଟଙ୍କା କୌଶଳକ୍ରମେ ସେମାନେ ଠକି ନେଇ ବଳକା ଟଙ୍କା ଜମାକାରୀଙ୍କୁ ଫେରାଇ ଦେଇ ଚମ୍ପଟ ମାରିଥିଲେ। ପରେ ଶିବରାମ ବ୍ୟାଙ୍କ କ୍ୟାଶ୍ କାଉଣ୍ଟରକୁ ଯାଇ ଟଙ୍କା ଜମା କରିବା ପାଇଁ କ୍ୟାଶିୟରଙ୍କୁ ଦେଇଥିଲେ। ଗଣିବା ବେଳେ ସେଥିରେ ୧୮ହଜାର ଟଙ୍କା କମ୍ ଥିବା କ୍ୟାଶିୟର କହିଥିଲେ। ପରେ ଶିବରାମ ଉକ୍ତ ଯୁବକମାନଙ୍କୁ ବ୍ୟାଙ୍କ ଭିତରେ ଓ ବାହାରେ ଖୋଜାଖୋଜି କରି ନିରାଶ ହୋଇଥିଲେ। ଠକାମିର ଶିକାର ହୋଇଥିବା ଜାଣି ଶିବରାମ ଟାଉନ ଥାନାରେ ଅଭିଯୋଗ କରିଥିଲେ।