ନୂଆଦିଲ୍ଲୀ,୨୬।୬(ପିଟି)- ତୀରନ୍ଦାଜ ତରୁନଦୀପ ରାଇ, ଅତନୁ ଦାସ, ପ୍ରବିନ ଯାଦବ ଓ ଅତୁଲ ବର୍ମାଙ୍କୁ ବୁଧବାର ଟାଗେର୍ଟ ଅଲିମ୍ପିକ୍ ପୋଡିୟମ୍ ଯୋଜନା (ଟପ୍ସ)ରେ ସାମିଲ କରାଯାଇଛି। ଭାରତୀୟ କ୍ରୀଡ଼ା ପ୍ରାଧିକରଣ (ସାଇ)ର ଡିରେକ୍ଟର ଜେନେରାଲ ନିଲମ କାପୁରଙ୍କ ଅଧ୍ୟକ୍ଷତାରେ ଅନୁଷ୍ଠିତ ମିସନ ଅଲିମ୍ପିକ୍ ସେଲ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏଥିସହିତ ପ୍ରସ୍ତାବିତ ୩୪ ଲକ୍ଷ ଟଙ୍କାକୁ ସ୍ବୀକୃତି ମିଳିଛି। ରାଇ, ଦାସ ଓ ଯାଦବଙ୍କୁ ନେଇ ଗଠିତ ଭାରତୀୟ ପୁରୁଷ ରିକର୍ଭ ଦଳ ଚଳିତ ମାସରେ ବିଶ୍ୱ ଆର୍ଚେରୀ ଚାମ୍ପିୟନଶିପ୍ରେ ରୌପ୍ୟ ପଦକ ଜିତିଥିଲା। ଏହି ଅବସରରେ ଦଳଗତ ବ୍ୟତୀତ ବ୍ୟକ୍ତିଗତ ୩ଟି ରିକର୍ଭ ଇଭେଣ୍ଟ ଲାଗି ମଧ୍ୟ ଅଲିମ୍ପିକ୍ ଯୋଗ୍ୟତା ହାସଲ କରିଛନ୍ତି। ବର୍ମା ୨୦୧୪ ଯୁବ ଅଲିମ୍ପିକ୍ସରେ ବାଳକ ରିକର୍ଭ ଇଭେଣ୍ଟରେ ବ୍ରୋଞ୍ଜ ପଦକ ଜିତିଥିଲେ। ଅତୀତ ଓ ବର୍ତ୍ତମାନ ପ୍ରଦର୍ଶନକୁ ଦୃଷ୍ଟିରେ ରଖି ତୀରନ୍ଦାଜଙ୍କୁ ଚୟନ କରାଯାଇଥିବା ସାଇ ପକ୍ଷରୁ କୁହାଯାଇଛି। ଏହି କମିଟି ଶ୍ରୀଶଙ୍କର ଓ ଜିନ୍ସନ ଜନସନଙ୍କୁ ଅନ୍ତର୍ଜାତୀୟ ଇଭେଣ୍ଟରେ ପ୍ରତିଦ୍ୱନ୍ଦ୍ୱିତା କରିବାକୁ ଅନୁମତି ଦେଇଛି। କିନ୍ତୁ ଶଟ ପୁଟର ତାଜିନ୍ଦୀ ତୁର ନିଜ ପାଇଁ ବିଦେଶୀ କୋଚ୍ ଇରେନେଜ ବୁକୋଓ୍ବିକିଙ୍କୁ ୨ ମାସ ଲାଗି ନିଯୁକ୍ତ କରିବାକୁ ଦେଇଥିବା ପ୍ରସ୍ତାବକୁ କମିଟି ପ୍ରତ୍ୟାଖ୍ୟାନ କରିଛି। ଟିଟି ଖେଳାଳି ମନିକା ବାତ୍ରାଙ୍କ ଲାଗି ଖେଳ ଉପକରଣ ଓ ଶରଥ କମଲଙ୍କ ଲାଗି ୧୨ ଦିନ ପାଇଁ ଫିଜିଓଥେରିପିଷ୍ଟ ହିରାକ ବାଗଚିଙ୍କୁ ନିଯୁକ୍ତ କରାଯାଇଛି। ଟେନିସ ଖେଳାଳି ରୋହନ ବୋପାନ୍ନାଙ୍କ ଆଣ୍ଠୁରେ ଅସ୍ତ୍ରୋପଚାର ଲାଗି ମଧ୍ୟ ଅର୍ଥ ମଞ୍ଜୁର କରାଯାଇଛି।