ନୁଆଦିଲ୍ଲୀ,୨୮।୮: ସାଧାରଣତଃ ଭାରତର ପର୍ଯ୍ୟଟନସ୍ଥଳୀଗୁଡ଼ିକ ବିଦେଶୀ ପର୍ଯ୍ୟଟକଙ୍କୁ ବେଶ୍ ଆକର୍ଷିତ କରିଥାଏ। ନିକଟରେ ଗୁଜରାଟରେ ତିଆରି ହୋଇଥିବା ‘ଷ୍ଟାଚ୍ୟୁ ଅଫ୍ ୟୁନିଟି’ ମଧ୍ୟ ଲୋକଙ୍କୁ ବେଶ୍ ଆକୃଷ୍ଟ କରିପାରିଛି। ଏହି କ୍ରମରେ ବିଶ୍ୱର ପ୍ରତିଷ୍ଠିତ ଟାଇମ୍ ମାଗାଜିନ୍ ପକ୍ଷରୁ ‘ବିଶ୍ୱର ପ୍ରମୁଖ ସ୍ଥାନ ୨୦୧୯’ର ଏକ ତାଲିକା ପ୍ରକାଶ ପାଇଛି। ଦ୍ୱିତୀୟ ବାର୍ଷିକ ତାଲିକାରେ ଗୁଜରାଟର ୫୯୭ ଫୁଟ ଉଚ୍ଚ ‘ଷ୍ଟାଚ୍ୟୁ ଅଫ ୟୁନିଟି’ ଏବଂ ମୁମ୍ବାଇର ‘ସୋହୋ’ ହାଉସ ‘ଟାଇମ’ ମାଗାଜିନ୍ରେ ଅନ୍ତର୍ଭୁକ୍ତ ହୋଇଛି। ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟୁଇଟ କରି ଖୁସି ବ୍ୟକ୍ତ କରିଛନ୍ତି। ଏଥିସହ ସେ ଲେଖିଛନ୍ତି, ‘ଷ୍ଟାଚ୍ୟୁ ଅଫ ୟୁନିଟି’ ଟାଇମ ମାଗାଜିନ୍ର ତାଲିକା ୨୦୧୯ରେ ୧୦୦ତମ ଶ୍ରେଷ୍ଠ ସ୍ଥାନରେ ସାମିଲ ହେବା ଏହା ସମସ୍ତଙ୍କ ପାଇଁ ଏକ ଭଲ ଖବର। କିଛି ଦିନ ତଳେ ଏଠାକୁ ଗୋଟିଏ ଦିନରେ ୩୪,୦୦୦ ଲୋକ ଆସିଥିବା ବେଳେ ଧୀରେ ଧୀରେ ଏହା ଲୋକପ୍ରିୟ ପର୍ଯ୍ୟଟନସ୍ଥଳୀ ପାଲଟୁଥିବା ଜାଣି ବେଶ୍ ଖୁସି ଲାଗୁଛି ବୋଲି ମୋଦି କହିଛନ୍ତି। ଗୁଜରାଟର ନର୍ମଦା ନଦୀପଠାରେ ଅବସ୍ଥାପିତ ହୋଇଥିବା ବିଶ୍ୱର ସର୍ବୋଚ୍ଚ ପ୍ରତିମାରୁ ପର୍ଯ୍ୟଟକ ଆଖପାଖର ପ୍ରାକୃତିକ ସୌନ୍ଦର୍ଯ୍ୟକୁ ଉପଭୋଗ କରିଥାନ୍ତି। ଅପରପକ୍ଷରେ ତାଲିକାଭୁକ୍ତ ହୋଇଥିବା ମୁମ୍ବାଇର ସୋହୋ ହାଉସ ୧୧ ମହଲା କୋଠା ହୋଇଥିବା ବେଳେ ଏହା ଉପରୁ ଆରବ ସାଗର ଦେଖାଯାଇଥାଏ। ଏଥିରେ ଏକ ଲାଇବ୍ରେରି, ୩୪ ଆସନ ବିଶିଷ୍ଟ ସିନେମା ହଲ୍ ଓ ଛାତ ଉପରେ ଏକ ବାର୍ ଏବଂ ସୁଇମିଂ ପୁଲ୍ ରହିଛି।