ନୂଆଦିଲ୍ଲୀ, ୧୩ା୭ (ପି.ଟି.)-ଦେଶରେ ଟାଏକୋଣ୍ଡୋ ବ୍ୟାପାର ବୁଝାଶୁଝା କରିବା ଲାଗି ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ଏକ ଆଡହକ୍ କମିଟି ଗଠନ କରିଛି। ଏହା ୬ମାସ ମଧ୍ୟରେ ମହାସଂଘର ନିର୍ବାଚନ କରାଇବ। ଗତବର୍ଷ ଡିସେମ୍ବରରେ ଆଇଓଏର ଜେନେରାଲ ଆସେମ୍ବ୍ଲିରେ ଏ ସମ୍ପର୍କରେ ନିଷ୍ପତ୍ତି ନିଆଯାଇଥିଲା। ଆଇଓଏ ଯୁଗ୍ମ ସମ୍ପାଦକ ନାମଦେବ ଶିରଗାଁକାର ୫ ଜଣିଆ ଆଡହକ କମିଟିର ମୁଖ୍ୟ ରହିବେ। ଏହାର ଅନ୍ୟ ସଦସ୍ୟମାନେ ହେଲେ ଏସ.ଏମ୍. ବାଲି (ଆଇଓଏ ଯୁଗ୍ମ ସମ୍ପାଦକ), ସୁନୈନା କୁମାରୀ (ଆଇଓଏ ଉପସଭାପତି), ଦିଗ୍ବିଜୟ ସିଂ (ଆଇଓଏ କାର୍ଯ୍ୟନିର୍ବାହୀ ପରିଷଦ ସଦସ୍ୟ) ଏବଂ ଇଣ୍ଟରନ୍ୟାଶନାଲ ଟାଏକୋଣ୍ଡୋ ଫେଡେରେଶନର ଜଣେ ମନୋନୀତ ବ୍ୟକ୍ତି। ଆଇଓଏ ଜେନେରାଲ ଆସେମ୍ବ୍ଲିର ନିଷ୍ପତ୍ତି ଅନୁସାରେ ଆଡ୍ହକ କମିଟି ଆସନ୍ତା ୬ମାସ ମଧ୍ୟରେ ସମସ୍ତ ନିର୍ବାଚନ ପ୍ରକ୍ରିୟା ଶେଷ କରିବ। ସେପର୍ଯ୍ୟନ୍ତ ଭାରତରେ ଟାଏକୋଣ୍ଡୋ ପରିଚାଳନା ପାଇଁ ଏକ ନୂଆ ସୋସାଇଟି ରେଜିଷ୍ଟ୍ରି ପାଇଁ ମଧ୍ୟ ନିଷ୍ପତ୍ତି ନିଆଯାଇଥିଲା। ଆଇଓଏ ଇତିମଧ୍ୟରେ ଏହାର ଆସାମ ଶାଖାର ପରିଚଳନା ଏବଂ କର୍ମକର୍ତ୍ତା ନିର୍ବାଚନ ଲାଗି ଏବଂ ସମାନ ଲକ୍ଷ୍ୟ ନେଇ ଗଲ୍ଫ ଖେଳପାଇଁ ପୃଥକ୍ ପୃଥକ୍ ଆଡହକ୍ କମିଟି ଗଠନ କରିସାରିଛି।