କାମାକ୍ଷାନଗର,୭ା୩(ଡି.ଏନ.ଏ.):ଘରେ ଗଣ୍ଡଗୋଳ କରି ଜୀବନ ହାରିବାକୁ ୪୪୦ କେଭି ବିଦ୍ୟୁତ୍ ଟାଓ୍ବାର ଉପରକୁ ଚଢ଼ିଯାଇଥିଲେ ପୁତୁରା। ତାଙ୍କୁ ବଞ୍ଚାଇବାକୁ ନିଜ ଜୀବନକୁ ବିପନ୍ନ କରି ଦାଦା ବି ଚଢ଼ିଗଲେ ଗ୍ରୀଡ୍ରେ। ଉଚ୍ଚ କ୍ଷମତାସମ୍ପନ୍ନ ବିଦ୍ୟୁତ୍ ତାର ଭିତରୁ ଯୁବକଙ୍କୁ ଉଦ୍ଧାର କରିବାକୁ ଦୀର୍ଘ ୩ ଘଣ୍ଟା ଧରି ଚାଲିଲା କସରତ। ତେବେ ବିଦ୍ୟୁତ୍ ବିଭାଗ ଅଧିକାରୀଙ୍କ ଉପସ୍ଥିତ ବୁଦ୍ଧି ଯୋଗୁ ୨ ଜୀବନ ବଞ୍ଚତ୍ୟାଇଥିବାବେଳେ ଏକ ନିଶ୍ଚିତ ଦୁର୍ଘଟଣାକୁ ଏଡ଼ାଇ ଦିଆଯାଇପାରିଛି ।
ଢେଙ୍କାନାଳ ଜିଲା କାମାକ୍ଷାନଗର ଥାନା ବାଙ୍ଗୁରା ଗ୍ରାମ ନିକଟରେ ଶୁକ୍ରବାର ଅପରାହ୍ନରେ ଘଟିଥିବା ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ଶୁକ୍ରବାର ଅପରାହ୍ନ ୨ଟା ୪୫। ବାଙ୍ଗୁରା ନିକଟ ଦେଇ ଯାଇଥିବା ମେରାମଣ୍ଡଳୀ-ଡୁବୁରୀ ୪୪୦ କେଭି ଟାଓ୍ବାର ଉପରକୁ ହଠାତ୍ ଚଢ଼ିଯାଇଥିଲେ ବାଙ୍ଗୁରା ଗ୍ରାମର କାଳିଆ ପଧାନ (୨୫)। ତାଙ୍କୁ ଉଦ୍ଧାର କରିବାକୁ ଦାଦା ସୁବାସ ପଧାନ (୫୫) ମଧ୍ୟ ତାଙ୍କ ପଛେ ପଛେ ଟାଓ୍ବାର ଉପରକୁ ଚଢ଼ିଥିଲେ। ଘଟଣାର ପ୍ରତ୍ୟକ୍ଷଦର୍ଶୀ ଏ ସମ୍ପର୍କରେ ତୁରନ୍ତ ବିଦ୍ୟୁତ୍ ବିଭାଗ ଏବଂ ଅଗ୍ନିଶମ ବିଭାଗକୁ ସୂଚନା ଦେଇଥିଲେ। ବିଦ୍ୟୁତ୍ ବିଭାଗ ଯନ୍ତ୍ରୀ ନଳିନୀ ଶଙ୍କର ରଥ ପହଞ୍ଚତ୍ ଉପରିସ୍ଥ ଅଧିକାରୀଙ୍କ ସହ ଯୋଗାଯୋଗ କରିଥିଲେ। ଫଳରେ ତୁରନ୍ତ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଥିଲା। ଅଗ୍ନିଶମ କର୍ମଚାରୀ ଏବଂ ଗ୍ରାମବାସୀ ବହୁ ବୁଝାଶୁଝା କରିବା ପରେ ୫ଟା ୪୫ରେ କାଳିଆ ଏବଂ ସୁବାସ ତଳକୁ ଆସିଥିଲେ। କାଳିଆଙ୍କୁ କାମାକ୍ଷାନଗର ମେଡିକାଲରେ ଭର୍ତ୍ତି କରାଯାଇଛି। ସେଠାରେ ତାଙ୍କର ଚିକିତ୍ସା ଚାଲିଛି।
ଏ ନେଇ ସୁବାସ କୁହନ୍ତି, ଘରେ ହୋଇଥିବା ସାମାନ୍ୟ ଗଣ୍ଡଗୋଳକୁ କେନ୍ଦ୍ରକରି ପୁତୁରା ଆତ୍ମହତ୍ୟା କରିବାକୁ ଟାଓ୍ବାର ଉପରକୁ ଚଢ଼ିଯାଇଥିଲେ। ବିଦ୍ୟୁତ୍ ତାରକୁ ଗୋଡ଼ ବଢ଼ାଇଥିଲେ ମଧ୍ୟ ପାଇ ନ ଥିଲା। ତେଣୁ ସେ ବଞ୍ଚତ୍ୟାଇଛନ୍ତି। ପୁତୁରାଙ୍କୁ ଉଦ୍ଧାର କରିବାକୁ ଯାଇ ବାଧ୍ୟ ହୋଇ ସୁବାସ ନିଜ ଜୀବନକୁ ବିପଦରେ ପକାଇ ଟାଓ୍ବାର ଉପରକୁ ଚଢ଼ିଯାଇଥିଲେ ବୋଲି କହିଛନ୍ତି। ଏ ନେଇ ଯନ୍ତ୍ରୀ କୁହନ୍ତି, ଏପରି ଘଟଣା ଦେଖିବା ପରେ ସେ ବ୍ୟସ୍ତ ବିବ୍ରତ ହୋଇପଡ଼ିଥିଲେ। ୪୪୦ କେଭି ଲାଇନରୁ ବିଦ୍ୟୁତ୍ ବିଚ୍ଛିନ୍ନ କରିବା କଷ୍ଟକର କଥା। କାରଣ ଏଥିପାଇଁ ସ୍ବତନ୍ତ୍ର ଭାବେ ଅନୁମତି ଆଣିବାକୁ ପଡ଼ିଥାଏ। ତେବେ ମେରାମଣ୍ଡଳୀ ଅଧିକାରୀ ଠିକ୍ ସମୟରେ ସହାୟତା କରିବାରୁ ଏକ ଦୁର୍ଘଟଣାକୁ ଟାଳି ଦିଆଯାଇପାରିଛି।