ଯୋଡ଼ା,୨୪।୭(ଡି.ଏନ୍.ଏ.): କେନ୍ଦୁଝର ଜିଲା ଯୋଡ଼ା ଅଞ୍ଚଳରେ ଟାଟା ଷ୍ଟିଲ ଓଏମ୍କ୍ୟୁ ବିଭାଗ ପକ୍ଷରୁ ବୁଧବାର ଡେଙ୍ଗୁ ସଚେତନତା କରାଯାଇଛି। ଏହାର ଭୟାବହତାକୁ ଦୃଷ୍ଟିରେ ରଖି ମଙ୍ଗଳବାର ଯୋଡ଼ା ପଶ୍ଚିମ ପ୍ରେକ୍ଷାଳୟରେ ୧ ମାସ ଧରି ଏହି ଅଭିଯାନ ହେବା ନେଇ ଯୋଜନା ହୋଇଛି । ବଡ଼ବିଲ ତହସିଲ୍ଦାର ତଥା ଯୋଡ଼ା ବ୍ଲକ ଉନ୍ନୟନ ଅଧିକାରୀ ଦାୟିତ୍ୱରେ ଥିବା କ୍ଷୀରୋଦ କୁମାର ବେହେରା, ଟାଟା ଷ୍ଟିଲ ଖଣ୍ଡବନ୍ଧ ମୁଖ୍ୟ ଶିରିଶ ଶେଖର, ଟାଟା ଷ୍ଟିଲ ଯୋଡ଼ା ଡାକ୍ତରଖାନାର ମୁଖ୍ୟ ଚିକିତ୍ସାଧିକାରୀ ଏ.କେ. ରଏ, ଟାଟା ଷ୍ଟିଲ ଓଏମ୍କ୍ୟୁ ବିଭାଗ ମୁଖ୍ୟ ଅନିଲ ଓରନ୍, ଟାଟା ଷ୍ଟିଲ ଓଏମ୍କ୍ୟୁ ଖଣ୍ଡବନ୍ଧ ପ୍ରକଳ୍ପ ଭୂମି ଓ ଲିଜ୍ ବିଭାଗ ବରିଷ୍ଠ ପ୍ରବନ୍ଧକ ଏସ୍.ପି. ସିଂହଙ୍କ ଉପସ୍ଥିତିରେ ଉକ୍ତ ସଚେତନତା ଅଭିଯାନର ଶୁଭାରମ୍ଭ କରାଯାଇଥିଲା।
ଏହାସହିତ ମ୍ୟାଲେରିଆ ଓ ପାଣିରୁ ସଂକ୍ରମିତ ଅନ୍ୟ ରୋଗର ନିରାକରଣ ପାଇଁ ଉକ୍ତ ଅଭିଯାନରେ ଗୁରୁତ୍ୱ ଦିଆଯାଇଛି। ଏକ ମାସ ଧରି ହେବାକୁ ଥିବା ଉକ୍ତ ଅଭିଯାନ ଅନ୍ତର୍ଗତ ଯୋଡ଼ା ପୌରପାଳିକା ପାର୍ଶ୍ୱବର୍ତ୍ତୀ ୫୦ ଗ୍ରାମରେ ସୂଚନା ରଥ ସହଯୋଗରେ ଲୋକମାନଙ୍କୁ ସଚେତନ କରାଯିବା ସହିତ ସୂଚନା ପୁସ୍ତିକା ବଣ୍ଟନ କରାଯିବ। ଡାକବାଜି ଯନ୍ତ୍ର, ସ୍ଥାନୀୟ ଅଞ୍ଚଳରେ ଫଗିଂ, ୨୮ ବିଦ୍ୟାଳୟର ଛାତ୍ରୀଛାତ୍ରଙ୍କ ପାଇଁ ସଚେତନତା କାର୍ଯ୍ୟକ୍ରମ ଓ ପଥପ୍ରାନ୍ତ ନାଟକ ମାଧ୍ୟମରେ ଲୋକମାନଙ୍କୁ ସଚେତନ କରାଯିବ .େବାଲି ସୂଚିତ କରାଯାଇଛି।