ଭୁବନେଶ୍ୱର, ୧୧।୧୨ (ସ୍ପୋଟର୍ସ ବ୍ୟୁରୋ)- ଟାଟା ଷ୍ଟିଲ୍ ଭୁବନେଶ୍ୱର ହାଫ୍ ମାରାଥନ୍ର ୫ମ ସଂସ୍କରଣ ଜାନୁୟାରୀ ୧୨ରେ ଅନୁଷ୍ଠିତ ହେବ। ଟାଟା ଷ୍ଟିଲ୍ ଏବଂ ଓଡ଼ିଶା କ୍ରୀଡ଼ା ଓ ଯୁବ ସେବା ବିଭାଗର ମିଳିତ ଆନୁକୂଲ୍ୟରେ ହେବାକୁ ଥିବା ଏହି ମାରାଥନର ପ୍ରଥମ ସଂସ୍କରଣ ୨୦୧୬ରେ ଆରମ୍ଭ ହୋଇଥିଲା। ଏହାପରଠାରୁ ପ୍ରତିବର୍ଷ ଜାନୁୟାରୀ ୧୨ରେ ନ୍ୟାଶନାଲ ୟୁଥ୍ ଡେ ଉପଲକ୍ଷେ ଟାଟା ଷ୍ଟିଲ୍ ପକ୍ଷରୁ ଏକ ସୁସ୍ଥ ଓ କ୍ରିୟାଶୀଳ ଜୀବନଶୈଳୀର ପ୍ରସାର ପାଇଁ ଏହି ମାରାଥନ ଦେଶର ବିଭିନ୍ନ ସ୍ଥାନର ଲୋକଙ୍କ ପାଇଁ ଏକ ମଞ୍ଚ ପ୍ରଦାନ କରିବ। ସାରା ଭାରତବର୍ଷରେ ଭୁବନେଶ୍ୱର ହାଫ୍ ମାରାଥନ୍କୁ ଏକ ଅଗ୍ରଣୀ ମାରାଥନ ରୂପେ ପରିଚିତ କରାଇବା ପାଇଁ ଟାଟା ଷ୍ଟିଲ୍ ପକ୍ଷରୁ ପ୍ରଚେଷ୍ଟା ଜାରି ରହିଛି।
ଅବସରରେ ଟାଟା ଷ୍ଟିଲ କର୍ପୋରେଟ୍ ସର୍ଭିସେସ୍ ଭାଇସ ପ୍ରେସିଡେଣ୍ଟ ଚାଣକ୍ୟ ଚୌଧୁରୀ କହିଛନ୍ତି, ”ଓଡ଼ିଶା ସରକାରଙ୍କ ସହ ମିଶି ଆଉ ଥରେ ଟାଟା ଷ୍ଟିଲ ଭୁବନେଶ୍ୱର ହାଫ୍ ମାରାଥନ୍ ଆୟୋଜନ କରୁଥିବାରୁ ଆମେ ବହୁତ ଖୁସି। ଭୁବନେଶ୍ୱରକୁ ଦେଶର ଏକ ପ୍ରମୁଖ କ୍ରୀଡ଼ା କେନ୍ଦ୍ର ଭାବେ ବିକଶିତ ହେବାର ଦେଖି ବହୁତ ଖୁସି ଲାଗୁଛି। ପ୍ରତ୍ୟେକ ବର୍ଷ ଏହି ପ୍ରତିଯୋଗିତାର ଲୋକପ୍ରିୟତା ବୃଦ୍ଧି ପାଉଥିବାବେଳେ ଏହାର ଦୌଡ଼ ଅଭିଜ୍ଞତାରେ ଉନ୍ନତି ଆଣିବା ପାଇଁ ଆମେ ପ୍ରତିବଦ୍ଧ। ଚଳିତଥର ଅଧିକରୁ ଅଧିକ ଲୋକ ଅଂଶଗ୍ରହଣ କରିବେ ବୋଲି ଆଶା କରୁଛୁ“।
ଷ୍ଟିଲ ଭୁବନେଶ୍ୱର ହାଫ୍ ମାରାଥନକୁ ୩ଟି ପ୍ରତିଦ୍ୱନ୍ଦ୍ୱିତାମୂଳକ ଦୌଡ଼ ପ୍ରତିଯୋଗିତାରେ ବିଭକ୍ତ କରାଯାଇଛି। ହାଫ୍ ମାରାଥନ (୨୧.୦୯୭୫ କି.ମି), ୧୦ କି.ମି ଓ ୫ କି.ମି. ଦୌଡ଼। ହାଫ୍ ମାରାଥନ୍ରେ ୧୮ ବର୍ଷରୁ ଊର୍ଦ୍ଧ୍ୱ ମହିଳା ଓ ପୁରୁଷଙ୍କ ପାଇଁ ଉଦ୍ଦିଷ୍ଟ। ସେହିଭଳି ୧୫ ବର୍ଷରୁ ଊର୍ଦ୍ଧ୍ୱ ମହିଳା ଓ ପୁରୁଷଙ୍କ ପାଇଁ ୧୦ କି.ମି. ଏବଂ ୧୨ ରୁ ୧୬ ବର୍ଷ ବୟସର ବାଳିକା ଓ ବାଳକଙ୍କ ପାଇଁ ୫ କିଲୋମିଟର ଦୌଡ଼ ପ୍ରତିଯୋଗିତା ଅନୁଷ୍ଠିତ ହେବ।
ହାଫ୍ ମାରାଥନ୍ର ଅନ୍ଲାଇନ୍ ପଞ୍ଜୀକରଣ ଆରମ୍ଭ ହୋଇଯାଇଛି। ବର୍ତ୍ତମାନ ସୁଦ୍ଧା ୮୩୦ ପ୍ରତିଯୋଗୀ ଅନ୍ଲାଇନ୍ରେ ନାମ ପଞ୍ଜୀକରଣ କରିସାରିଛନ୍ତି। ଉତ୍ସାହୀ ପ୍ରତିଯୋଗୀ ହାଫ୍ ମାରାଥନ ପଞ୍ଜୀକରଣ ପାଇଁ ଉଦ୍ଦିଷ୍ଟ ଓ୍ବେବସାଇଟ୍ www.tatasteelbbsr-run.com ଜରିଆରେ ଡିସେମ୍ବର ୩୦ ତାରିଖ ସୁଦ୍ଧା ପଞ୍ଜୀକରଣ କରିପାରିବେ। ତେବେ ସର୍ବାଧିକ ୫୦୦୦ ଲୋକ ଏଥିପାଇଁ ପଞ୍ଜୀକରଣ କରିବେ। ପ୍ରଥମେ ପଞ୍ଜୀକରଣ କରିଥିବା ଲୋକମାନଙ୍କୁ ଅଗ୍ରାଧିକାର ଦିଆଯିବ ବୋଲି ଟାଟା ଷ୍ଟିଲ୍ ପକ୍ଷରୁ ଖବରଦାତା ସମ୍ମିଳନୀରେ କୁହାଯାଇଛି। ହାଫ୍ ମାରାଥନ୍ ପାଇଁ ପଞ୍ଜୀକରଣ ମୂଲ୍ୟ ୩୦୦ ଟଙ୍କା ରଖାଯାଇଥିବାବେଳେ ୧୦ କି.ମି. ଓ ୫ କି.ମି. ପାଇଁ ଯଥାକ୍ରମେ ୨୦୦ ଓ ୧୦୦ ଟଙ୍କା ରଖାଯାଇଛି। ସମସ୍ତ ପ୍ରତିଯୋଗୀମାନଙ୍କୁ ଟି-ସାର୍ଟ, ବି.ଆଇ.ବି. ଚିପ୍ ଓ ସଂଖ୍ୟା ପ୍ରଦାନ କରାଯିବ। ଏଥିସହିତ ଆନ୍ତର୍ଜାତିକ ମାନ୍ୟତା ଅନୁସାରେ ଟାଟା ଷ୍ଟିଲ ହାଫ୍ ମାରାଥନ୍ରେ ଦୌଡ଼ ହେଉଥିବା ମାର୍ଗରେ ଟାଇମିଂ ମ୍ୟାଟ୍ସ ଓ ଏହାର ନିୟନ୍ତ୍ରଣ ଶାଖା, ରେଡିଓ ଫ୍ରିକ୍ୟୁଏନ୍ସି ଆଇଡେଣ୍ଟିଫିକେଶନ୍ (ଆରଏଫ୍ଆଇଡି) ଚିପ୍, ଦୌଡ଼ିବା ମାର୍ଗରେ ବିଭାଜିତ ସମୟ ମ୍ୟାଟସ୍, ଟ୍ରାକିଂ କ୍ୟାମେରା ଏବଂ ୱାଇ-ଫାଇ ନେଟୱର୍କ ପରି ଶ୍ରେଷ୍ଠ ପ୍ରଯୁକ୍ତି ବ୍ୟବସ୍ଥା କରାଯାଇଛି। ଏହି ଅବସରରେ ଟାଟା ଷ୍ଟିଲ ଭୁବନେଶ୍ୱର ହାଫ୍ ମାରାଥନ୍ ୨୦୨୦ର ଟି-ଶାର୍ଟକୁ ଉନୋ୍ମଚନ କରାଯାଇଥିଲା। ଖବରଦାତା ସମ୍ମିଳନୀରେ ଓଡ଼ିଶା ସରକାରଙ୍କ କ୍ରୀଡ଼ା ଓ ଯୁବ ସେବା ବିଭାଗ ଯୁଗ୍ମ ସଚିବ ମନୋଜ କୁମାର ପାଢୀ, ଟାଟା ଷ୍ଟିଲ କଳିଙ୍ଗନଗର କର୍ପୋରେଟ୍ ସର୍ଭିସେସ୍ ମହାପ୍ରବନ୍ଧକ ଆର୍. ଆର୍. ଶତପଥୀ, ଓଡ଼ିଆ ଅଭିନେତ୍ରୀ ଅର୍ଚ୍ଚିତା ସାହୁ ଓ ଅଭିନେତା ସବ୍ୟସାଚୀ ମିଶ୍ର ପ୍ରମୁଖ ଉପସ୍ଥିତ ରହିଥିଲେ।
