ବୋରିଗୁମ୍ମା,୨୫ା୧୨(ଡି.ଏନ୍.ଏ.): କୋରାପୁଟ ଜିଲାର ବିଭିନ୍ନ ସ୍ଥାନରେ ଚାଲିଥିବା କୁକୁଡ଼ା ଗାଲି ଓ ସେଠାକାର ଜୁଆଖେଳ ଉପରେ ଲଗାତାର ଚଢ଼ାଉ ଜାରି ରଖିଛି ପୋଲିସ। ଗତ ୩/୪ ଦିନ ଭିତରେ ୩୦ରୁ ଅଧିକ ଲୋକଙ୍କୁ ଧରିଲାଣି ପୋଲିସ। ବୁଧବାର ବୋରିଗୁମ୍ମା ପୋଲିସ ଲଦୀଯୋଡ଼ି ନିକଟସ୍ଥ ଜଙ୍ଗଲରେ ଚାଲିଥିବା କୁକୁଡ଼ାଗାଲିରେ ଅତର୍କିତ ଚଢ଼ାଉ କରିଛି। ସେଠାରେ କୁକୁଡ଼ା ଲଢ଼େଇ ସହ ଜୁଆ ଖେଳାଯାଉଥିଲା। ଥାନା ଆଇଆଇସି ସଞ୍ଜୟ କୁମାର ମଣ୍ଡଳଙ୍କ ନେତୃତ୍ୱରେ ପୋଲିସ ଟିମ ଚଢ଼ାଉ କରି ୪ ଜଣ ବ୍ୟକ୍ତିଙ୍କୁ ସେଠାରୁ ଗିରଫ କରିଥିଲା। ଅନ୍ୟମାନେ ସେଠାରୁ ଖସି ପଳାଇଥିଲେ। ଏହାସହ ୧୭ଟି ବାଇକ ଓ ୨୬ଟି ସାଇକେଲ ଜବତ କରାଯାଇଥିଲା। ଗିରଫ ବ୍ୟକ୍ତିମାନେ ହେଲେ ପଣ୍ଡସଗୁଡ଼ା ଗ୍ରାମର ଭଗବାନ ହରିଜନ, ମହେଶ୍ୱର ଗୌଡ଼, ପର୍ଶୁ ଜାନୀ ଓ ରଘୁନାଥ ଜାନୀ। ବୋରିଗୁମ୍ମା ଥାନାରେ କେସ୍ ନମ୍ବର ୧୮୯/୨୦୧୯ରେ ମାମଲା ରୁଜୁ କରାଯାଇ ତଦନ୍ତ ଚାଲିଥିବା ଆଇଆଇସି ମଣ୍ଡଳ କହିଛନ୍ତି। ଚଢ଼ାଉରେ ଏସ୍ଆଇ ଚିନ୍ତେଶ୍ୱର ମୁଣ୍ଡା, ଶ୍ରୀକାନ୍ତ ସାହୁ, ଏଏସ୍ଆଇ ପ୍ରକାଶ ଚନ୍ଦ୍ର ମିଶ୍ର, ସଞ୍ଜୟ ମଣ୍ଡଳ ସାମିଲ ଥିଲେ।