ନୂଆଦିଲ୍ଲୀ, ୨୫ା୫ (ପି.ଟି.)-ଭାରତରେ ଆଗକୁ ହେବାକୁ ଥିବା ଆଇସିସି ଗ୍ଳୋବାଲ କ୍ରିକେଟ ଇଭେଣ୍ଟ ପାଇଁ ଟିକସ ଛାଡ଼ କରିବା ପ୍ରସଙ୍ଗରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ପୁଣି ଥରେ ମୁହଁାମୁହିଁ ହୋଇଛନ୍ତି। ଭାରତ ୨୦୨୧ରେ ଟି୨୦ ବିଶ୍ୱକପ୍ ଏବଂ ୨୦୨୩ରେ ୫୦ ଓଭର ବିଶିଷ୍ଟ ଇଭେଣ୍ଟ ଆୟୋଜନ କରିବାକୁ ଯାଉଛି। ୨୦୧୬ରେ ଭାରତରେ ଟି୨୦ ବିଶ୍ୱକପ୍ ବେଳକୁ ଟିକସ ଛାଡ଼ ପ୍ରସଙ୍ଗକୁ ନେଇ ଆଇସିସି ଓ ବିସିସିଆଇ ମଧ୍ୟରେ ଦୀର୍ଘ ଦିନ ହେଲା ବିବାଦ ଲାଗି ରହିଛି। ତେବେ ଉଭୟ ପକ୍ଷ ଏହି ସମସ୍ୟାର ଆପୋଷ ସମାଧାନ ପାଇଁ ଚେଷ୍ଟା ଚଳାଇଥିବା ଆଇସିସିର ଜଣେ ମୁଖପାତ୍ର ପ୍ରକାଶ କରିଛନ୍ତି। ଆଇସିସି ସାଧରଣତଃ ଭାବେ ଟିଭି ପ୍ରଡକ୍ସନ ସରଞ୍ଜାମ ଆମଦାନୀ ଓ ଟିକେଟିଂରୁ ଏକସାଇଜ୍ ଡ୍ୟୁଟି ଛାଡ଼ ପାଇଁ ଚାହିଥାଏ। ଆଇସିସିର ନୂଆ ଚେୟାରମ୍ୟାନ ପଦବୀ ପାଇଁ ପ୍ରାର୍ଥିପତ୍ର ଦାଖଲ ମଙ୍ଗଳବାରଠାରୁ ଆରମ୍ଭ ହେବାକୁ ଥିବା ବେଳେ ଟିକସ ବିବାଦ ପୁଣି ମୁଣ୍ଡ ଟେକିଛି। ବିଦାୟୀ ଆଇସିସି ଚେୟାରମ୍ୟାନ ଶଶାଙ୍କ ମନୋହର ଏବଂ ମୁଖ୍ୟ କାର୍ଯ୍ୟନିର୍ବାହୀ ମନୁ ସାହାନେ ବିସିସିଆଇ ସଭାପତି ସୌରଭ ଗାଙ୍ଗୁଲି ଏବଂ ସମ୍ପାଦକ ଜୟ ଶାହାଙ୍କ ସହିତ ଯୋଗାଯୋଗରେ ଅଛନ୍ତି। ହେଲେ ଆଇସିସି ଆଇନ ବିଭାଗ ମୁଖ୍ୟ ଜୋନାଥନ ହଲ୍ ପଠାଇଥିବା ମେଲ୍ରେ ଯେପରିଭାବେ ଲେଖାଯାଇଛି ବିସିସିଆଇର ଉଚ୍ଚ କର୍ମକର୍ତ୍ତାମାନେ ସେଥିରେ ଖପ୍ପା ହୋଇଛନ୍ତି। ରାଜିନାମା ଅନୁସାରେ ଟିକସ ଛାଡ଼ ସମସ୍ୟାର ସମାଧାନ କେବେ ହେବ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ତାହାର ନିର୍ଦ୍ଦିଷ୍ଟ ଦିନ ଧାର୍ଯ୍ୟ କରୁ। ବିସିସିଆଇର ଜଣେ ବରିଷ୍ଠ ଅଫିସିଆଲ କହିଛନ୍ତି,ଦେଶରେ ଟିକସ ସମ୍ପର୍କିତ ନିଷ୍ପତ୍ତି ବିସିସିଆଇ ନୁହେଁ ଭାରତୀୟ ସରକାର ନେଇଥାନ୍ତି। ଅତୀତରେ ଫର୍ମୁଲାଓ୍ବାନ ରେସ୍ ଆୟୋଜନ ବେଳେ ସରକାର ଟିକସ ଛାଡ଼ କରି ନ ଥିଲେ। ଆଇସିସି ଗ୍ଲୋବାଲ ଇଭେଣ୍ଟ ଲାଗି ଟିକସ ଛାଡ଼ କରାଯିବା କି ନା ତାହା ସରକାର ସ୍ଥିର କରିବେ। ଲକ୍ଡାଉନ ନ ଉଠିବା ପର୍ଯ୍ୟନ୍ତ ଏହି ପ୍ରସଙ୍ଗରେ ଆମେ ସରକାରଙ୍କ ସହ ଆଲୋଚନା କରିବା ସମ୍ଭବ ନୁହେଁ ବୋର୍ଡର ବରିଷ୍ଠ କର୍ମକର୍ତ୍ତାଜଣକ ପ୍ରକାଶ କରିଥିଲେ।
