ନୂଆଦିଲ୍ଲୀ, ୨୨ା୬ (ପି.ଟି.): କ୍ରିକେଟକୁ ଫେରିବା ଲାଗି ପ୍ରସ୍ତୁତି ଚଳାଇଛନ୍ତି ପେସ୍ବୋଲର ଏସ୍ ଶ୍ରୀସନ୍ଥ୍। ମାଇକେଲ ଜୋର୍ଡାନଙ୍କ ପୂର୍ବତନ ଟ୍ରେନର ଟିମ୍ ଗ୍ରୋଭରଙ୍କଠାରୁ ମେଣ୍ଟାଲ କଣ୍ଡିଶନିଂ ଶିକ୍ଷା ନେଉଛନ୍ତି। ଗ୍ରୋଭର ହେଉଛନ୍ତି ଏନବିଏର ଜଣାଶୁଣା ଶାରୀରିକ ଓ ମାନସିକ ଟ୍ରେନିଂ କୋଚ୍। ମାଇକେଲ ଜୋର୍ଡାନ ଓ କୋବେ ବ୍ରାଏଣ୍ଟ୍ଙ୍କ ଭଳି ଷ୍ଟାର ବାସ୍କେଟବଲ ଖେଳାଳିଙ୍କ ସହିତ ସେ କାର୍ଯ୍ୟ କରିଛନ୍ତି। ଶ୍ରୀସନ୍ଥ କହିଛନ୍ତି ସପ୍ତାହକୁ ୩ଥର ସକାଳ ୫ଟା ୩୦ରୁ ୮ଟା ୩୦ ପର୍ଯ୍ୟନ୍ତ ଗ୍ରୋଭରଙ୍କ ଅନ୍ଲାଇନ୍ କ୍ଲାସ୍ରେ ଯୋଗ ଦେଉଛନ୍ତି। ଅପରାହ୍ନରେ ୧ଟା ୩୦ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏର୍ନାକୁଲମସ୍ଥିତ ଇନ୍ଡୋର ନେଟ୍ସରେ ୨୩ ବର୍ଷରୁ କମ୍ କେରଳ ଦଳର ବହୁ ଖେଳାଳି ଏବଂ ସଚିନ ବେବିଙ୍କ ଭଳି ରଣଜୀ ଖେଳାଳିଙ୍କ ସହ ଅଭ୍ୟାସ ଜାରି ରଖିଛନ୍ତି। ୨୦୧୩ ଆଇପିଏଲ ସ୍ପଟ ଫିକ୍ସିଂ ମାମଲାରେ ସମ୍ପୃକ୍ତ ଥିବା ଅଭିଯୋଗରେ ୭ ବର୍ଷ ଦଣ୍ଡିତ ହେବାପରେ ଭାରତର ଏହି ପ୍ରତିଭା ସମ୍ପନ୍ନ ସୁଇଂ ବୋଲର କେରଳ ତରଫରୁ ପୁଣି ରଣଜୀ ଖେଳିବା ଲାଗି ଯୋଜନା ଚଳାଇଛନ୍ତି।