ବ୍ରିସବେନ,୨୧।୫: କେଉଁ କାରଣରୁ ଟିମ ଇଣ୍ଡିଆରୁ ବାଦ୍ ପଡ଼ିଥିଲେ ପୂର୍ବତନ ଅଧିନାୟକ ସୌରଭ ଗାଙ୍ଗୁଲି? ସେତେବେଳେ ଭାରତୀୟ ଦଳର କୋଚ୍ ପଦରେ ଥିବା ଗ୍ରେଗ୍ ଚାପେଲ ଏହି ପ୍ରଶ୍ନର ଉତ୍ତର ଦେଇଛନ୍ତି। ଉଲ୍ଲେଖଥାଉ କି, ୨୦୦୫ରେ ଗାଙ୍ଗୁଲିଙ୍କୁ ଅଧିନାୟକ ପଦରୁ ହଟାଯିବା ସହ ଜାତୀୟ ଦଳରୁ ବାଦ୍ ଦିଆଯାଇଥିଲା। ପରେ ଟିମ୍ ଇଣ୍ଡିଆର ମଙ୍ଗ ସମ୍ଭାଳିଥିଲେ ରାହୁଲ ଡ୍ରାଭିଡ୍। ୨୦୦୭ ଆଇସିସି ବିଶ୍ୱକପ୍ରେ ଭାରତୀୟ ଦଳର ବିଫଳତା ପରେ ଚାପେଲ କୋଚ୍ ପଦରୁ ବିଦାୟ ନେଇଥିଲେ।
“ ଡ୍ରାଭିଡ୍ ଦଳକୁ ଆଗେଇ ନେବାକୁ ଚାହୁଁଥିଲେ। କିନ୍ତୁ ଅନ୍ୟ ବରିଷ୍ଠ ଖେଳାଳିଙ୍କ ଉଦ୍ଦେଶ୍ୟ ଥିଲା ଦଳରେ ସ୍ଥାନ ସୁରକ୍ଷିତ ରଖିବା। କାରଣ ସେମାନଙ୍କ ମଧ୍ୟରୁ ପ୍ରାୟ ଖେଳାଳିଙ୍କ ଅବସର ନେବାର ବୟସ ହୋଇଯାଇଥିଲା। ଏଥିଯୋଗୁ ଦଳରୁ ବାଦ୍ ଦିଆଯାଇଥିଲା ଗାଙ୍ଗୁଲିଙ୍କୁ। ଏହା ଦ୍ୱାରା ଅନ୍ୟ ସିନିୟର ଖେଳାଳିଙ୍କୁ ଜଣାଇ ଦେଇଥିଲୁ ପ୍ରଦର୍ଶନ ନ ଥିଲେ ଟିମ୍ ଇଣ୍ଡିଆରେ ଯାଗା ନାହିଁ। ଏହା ଟିମ୍ ଇଣ୍ଡିଆ ପାଇଁ କାମ ଦେଇଥିଲା। ମାତ୍ର ଗାଙ୍ଗୁଲି ଦଳକୁ ଫେରିବା ପରେ ହଠାତ୍ ସବୁକିଛି ବଦଳି ଯାଇଥିଲା ” ବୋଲି କ୍ରିକେଟ୍ ଲାଇଫ୍ ଷ୍ଟୋରିଜ ସହ ଏକ ଆଲୋଚନାବେଳେ ପୂର୍ବତନ ଅଷ୍ଟ୍ରେଲିଆନ କ୍ରିକେଟର ଏହା କହିଛନ୍ତି।