ପୋଖାରା,୨।୧୨- ନେପାଳର ମହିଳା କ୍ରିକେଟର ଅଞ୍ଜଳୀ ଚାନ୍ଦ ସୋମବାର ଅନ୍ତର୍ଜାତୀୟ ଟି୨୦ କ୍ରିକେଟରେ ଇତିହାସ ସୃଷ୍ଟି କରିଛନ୍ତି। ମାଳଦ୍ୱୀପ ବିପକ୍ଷ ମ୍ୟାଚ୍ରେ ସେ ବିନା କୌଣସି ରନ୍ ଦେଇ ୬ ଉଇକେଟ ହାତେଇଛନ୍ତି। ଅନ୍ତର୍ଜାତୀୟ କ୍ରିକେଟ ଏପରି କି ପୁରୁଷମାନଙ୍କ ମଧ୍ୟରେ ଏହା ପ୍ରଥମ ଘଟଣା। ପ୍ରଥମେ ବ୍ୟାଟିଂ କରିଥିବା ମାଲଦ୍ୱୀପ ମାତ୍ର ୧୬ ରନ୍ରେ ହିଁ ଅଲଆଉଟ୍ ହୋଇଯାଇଥିଲା। ଆୟୋଜକ ନେପାଳ ବିଜୟ ଲକ୍ଷ୍ୟକୁ ମାତ୍ର ୦.୫ ଓଭରରେ ହାସିଲ କରି ନେଇଛି। ନେପାଳ ୧୦ ଉଇକେଟ ଓ ୧୧୫ ବଲ ପୂର୍ବରୁ ମ୍ୟାଚ୍ ଜିତିଥିଲା। ଏହା ମଧ୍ୟ ଏକ ରେକର୍ଡ। ଅଞ୍ଜଳୀ ୭ମ ଓଭରରେ ୩ ଉଇକେଟ ନେଇଥିଲେ। କିନ୍ତୁ କୌଣସି ରନ୍ ଦେଇ ନ ଥିଲେ। ସେହିଭଳି ୯ମ ଓ ୧୧ତମ ଓଭରରେ ଯଥାକ୍ରମେ ୨ଟି ଓ ଗୋଟିଏ ଉଇକେଟ ହାସଲ କରିଥିଲେ। ମୋଟ ୧୩ ବଲରେ ୬ ଉଇକେଟ ଅଧିକାର କରିଥିଲେ। ଏଭଳି ପ୍ରଦର୍ଶନ ବଳରେ ମହିଳା ଟି୨୦ ଅନ୍ତର୍ଜାତୀୟ କ୍ରିକେଟରେ ନୂଆ ରେକର୍ଡ ପ୍ରତିଷ୍ଠା କରିଛନ୍ତି। ପୂର୍ବରୁ ଏହି ରେକର୍ଡ ମାଳଦ୍ୱୀପର ମାସ ଇଲିସାଙ୍କ ନାମରେ ଥିଲା। ସେ ଚିଳତବର୍ଷ ଚାଇନା ବିପକ୍ଷରେ ୩ ରନ୍ ବ୍ୟୟରେ ୬ ଉଇକେଟ ନେଇଥିଲେ। ପୁରୁଷ ବିଭାଗରେ ଭାରତୀୟ ପେସର ଦୀପକ ଚହରଙ୍କ ନାମରେ ରେକର୍ଡ ରହିଛି। ସେ ଗତମାସରେ ବାଂଲାଦେଶ ବିପକ୍ଷ ଟି୨୦ରେ ମାତ୍ର ୭ ରନ୍ ଦେଇ ୬ ଉଇକେଟ ହାତେଇଥିଲେ।