ମେଲବୋର୍ନ, ୧୭ା୬ (ପି.ଟି.)- କୋଭିଡ୍-୧୯ ମହାମାରୀ ଯୋଗୁ ଟି୨୦ ବିଶ୍ୱକପ୍ ଆୟୋଜନ ଅବାସ୍ତବ ମନେ ହେଉଛି ବୋଲି କହିଛନ୍ତି କ୍ରିକେଟ ଅଷ୍ଟ୍ରେଲିଆ ଚେୟାରମ୍ୟାନ ଇଅର୍ଲ ଏଡିଙ୍ଗ୍ସ। ଟୁର୍ନାମେଣ୍ଟରେ ଭାଗ ନେଉଥିବା ୧୬ଟି ଦଳ ଦେଶକୁ ଆସିବା ସହଜ ନୁହେଁ। ସମଗ୍ର ବିଶ୍ୱରେ କରୋନା ଭାଇରସ୍ ସଂକ୍ରମିତଙ୍କ ସଂଖ୍ୟା ୮.୧ ନିୟୁତରୁ ଅଧିକ ରହିଛି। ବହୁ ଦେଶ ଯାତାୟାତରେ କଟକଣା ଜାରି କରିଥିବାରୁ ଅକ୍ଟୋବର-ନଭେମ୍ବରରେ ହେବାକୁଥିବା ଏହି ପ୍ରତିଯୋଗିତାର ଆୟୋଜନ ନେଇ ଅନିଶ୍ଚିତତା ଦେଖା ଦେଇଛି ବୋଲି ଏଡିଙ୍ଗ୍ସ କହିଛନ୍ତି। ଅନ୍ୟପକ୍ଷରେ ଏହି ପ୍ରତିଯୋଗିତା ଆୟୋଜନ କରିବା ଲାଗି ବିକଳ୍ପ ବାଟ ଖୋଜିବାରେ ବ୍ୟସ୍ତ ରହିଛି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)। ତେବେ କ୍ରିକେଟର ଏହି ବିଶ୍ୱ ପରିଚାଳନା ପରିଷଦ ଆସନ୍ତା ମାସରେ ଚୂଡ଼ାନ୍ତ ନିଷ୍ପତି ନେବ। ଶୁଣିବାକୁ ମିଳୁଛି ଯେ, ଏହି ମେଗା ଇଭେଣ୍ଟକୁ ସ୍ଥଗିତ ରଖାଯିବ। ଯଦି ଏହା ହୁଏ ତେବେ ବର୍ତ୍ତମାନ ସସ୍ପେଣ୍ଡ ରଖାଯାଇଥିବା ଆଇପିଏଲ୍ ଆୟୋଜନ ପାଇଁ ରାସ୍ତା ଖୋଲିଯିବ। ସୂଚନାଯୋଗ୍ୟ, ଯେଉଁ କେତୋଟି ଦେଶ କରୋନାକୁ ନିୟନ୍ତ୍ରଣରେ ରଖିବାରେ ସଫଳ ହୋଇଛନ୍ତି, ସେମାନଙ୍କ ମଧ୍ୟରେ ଅଷ୍ଟ୍ରେଲିଆ ଅନ୍ୟତମ। ଏହି ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ମାତ୍ର ୭ ହଜାରରୁ ଅଧିକ। ତନ୍ମଧ୍ୟରୁ ୬୦୦୦ରୁ ଅଧିକ ସୁସ୍ଥ ହୋଇଛନ୍ତି। ଏଣେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) କୋଷାଧ୍ୟକ୍ଷ ଅରୁଣ ଧୂମଲ ବାରମ୍ବାର କହି ଆସୁଛନ୍ତି ଯେ, ଟି୨୦ ବିଶ୍ୱକପ୍ ଯଦି ସ୍ଥଗିତ ରୁହେ ତେବେ ଆଇପିଏଲ ଆାୟୋଜନ ହୋଇପାରିବ। ଆଇପିଏଲ୍ ଯଦି ଆୟୋଜନ ନ ହୁଏ ତେବେ ୪୦୦୦ କୋଟି ରାଜସ୍ବ ହାନି ଘଟିବ। ଏହା ଏକ ବଡ଼ ସମସ୍ୟା ସୃଷ୍ଟି କରିବ।