ନୂଆଦିଲ୍ଲୀ,୧୪।୫ (ପି.ଟି.):ଦକ୍ଷିଣ ଆଫ୍ରିକାର ଅଭିଜ୍ଞ ବ୍ୟାଟ୍ସମ୍ୟାନ ଫାଫ୍ ଡୁପ୍ଲେସି ଅଷ୍ଟ୍ରେଲିଆରେ ଆଗକୁ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ପାଇଁ ଏକ ବହୁମୂଲ୍ୟ ପରାମର୍ଶ ଦେଇଛନ୍ତି। ବିଶ୍ୱକପ୍ ପୂର୍ବରୁ ଓ ପରେ ଖେଳାଳିମାନଙ୍କୁ ୨ ସପ୍ତାହ ଆଇସୋଲେଶନରେ ରଖିବାକୁ ସେ ମତ ଦେଇଛନ୍ତି। କୋଭିଡ୍-୧୯ ମହାମାରୀ କାରଣରୁ ଅନ୍ୟ କ୍ରୀଡ଼ା ଭଳି କ୍ରିକେଟ ମଧ୍ୟ ଠପ୍ ହୋଇଯାଇଛି। ଏହି ମହାମାରୀ କାରଣରୁ ଆଗାମୀ ଅକ୍ଟୋବର-ନଭେମ୍ବରରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍କୁ ନେଇ ଅନିଶ୍ଚିତତା ସୃଷ୍ଟି ହୋଇଛି।
ଏହି ଭାଇରସ୍ରେ ଅଷ୍ଟ୍ରେଲିଆ ସେତେଟା ଅଧିକ ପ୍ରଭାବିତ ହୋଇ ନ ଥିଲେ ମଧ୍ୟ ସେଠାକୁ ଯାତ୍ରା କରିବା ଏକ ବଡ଼ ଚ୍ୟାଲେଞ୍ଜ ବୋଲି ବାଂଲାଦେଶ ଅଧିନାୟକ ତାମିମ ଇକ୍ବାଲଙ୍କ ସହ କଥା ହେବା ବେଳେ ଡୁପ୍ଲେସି ଏହା କହିଛନ୍ତି। ବାଂଲାଦେଶ , ଦକ୍ଷିଣ ଆଫ୍ରିକା ଓ ଭାରତ ଭଳି ଦେଶରୁ କ୍ରିକେଟର କିଭଳି ଯାତ୍ରା କରିବେ ତାହା ଏକ ବଡ଼ ସମସ୍ୟା। ଏଥିରେ ନିଶ୍ଚିତ ଭାବେ ବିପଦ ରହିଛି। ତେବେ ଖେଳାଳିଙ୍କ ଟୁର୍ନାମେଣ୍ଟ ପୂର୍ବରୁ ଓ ପରେ ଆସୋଲେଶନରେ ରଖାଯିବାର ଆବଶ୍ୟକତା ଉପରେ ଡୁପ୍ଲେସି ଗୁରୁତ୍ୱ ଦେଇଛନ୍ତି। ଆଗଭଳି ଆମେ ଯାତ୍ରା କରିପାରିବୁ ନାହିଁ ବୋଲି ଡୁପ୍ଲେସି କହିଛନ୍ତି। ଉଲ୍ଲେଖଥାଉ କି, ଗତ ମାର୍ଚ୍ଚରେ ଦକ୍ଷିଣ ଆଫ୍ରିକାର ଭାରତ ବିପକ୍ଷ ସିରିଜ ମଧ୍ୟ ବାତିଲ ହୋଇଛି। ଅବଶ୍ୟ ପ୍ରଥମ ମ୍ୟାଚ୍ ବର୍ଷାଯୋଗୁ ଧୋଇଯାଇଥିଲା।