ସିଡନୀ,୧।୬(ପି.ଟି.): କୋଭିଡ-୧୯ ମହାମାରୀ କାରଣରୁ ଆସନ୍ତା ଅକ୍ଟୋବର- ନଭେମ୍ବରରେ ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ଘୁଞ୍ଚିବାର ସମ୍ଭାବନା ସୃଷ୍ଟି ହୋଇଛି। ଏପରି ହେଲେ ଅଷ୍ଟ୍ରେଲୀୟ ବ୍ୟାଟିଂ ତାରକା ଷ୍ଟିଭ୍ ସ୍ମିଥ୍ ଇଣ୍ଡିଆନ ପ୍ରମିୟର ଲିଗ୍ (ଆଇପିଏଲ୍) ଖେଳିବାକୁ ଇଚ୍ଛା ପ୍ରକାଶ କରିଛନ୍ତି। ମହାମାରୀ କାରଣରୁ ଆଇପିଏଲ ଅନିର୍ଦ୍ଦିଷ୍ଟ କାଳ ପାଇଁ ଘୁଞ୍ଚାଇବାକୁ ନିଷ୍ପତ୍ତି ନିଆଯାଇଛି। ତେବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସେପ୍ଟେମ୍ବର- ଅକ୍ଟୋବର ଓ୍ବିଣ୍ଡୋ ଉପରେ ନଜର ରଖିଛି।
ସ୍ମିଥ୍ଙ୍କୁ ରାଜସ୍ଥାନ ରୟାଲ୍ସର ଅଧିନାୟକ ନିଯୁକ୍ତ କରାଯାଇଛି। ଅଷ୍ଟ୍ରେଲିଆ ସରକାର ଅନୁମତି ଦେଲେ ଓ ନିରାପଦ ମଣନ୍ତି ତା’ହେଲେ ଆଇପିଏଲ୍ ଖେଳିବାକୁ ଭାରତ ଗସ୍ତ କରିବି ବୋଲି ସ୍ମିଥ୍ କହିଛନ୍ତି। କିନ୍ତୁ ବିଶ୍ୱକପ୍ ଆୟୋଜନ ହେଲେ ପ୍ରଥମେ ଦେଶ ପାଇଁ ଖେଳିବି ବୋଲି ଟ୍ରେନିଂକୁ ଫେରିବା ପରେ ସେ କହିଛନ୍ତି। ସୋମବାର ସେ ନ୍ୟୁ ସାଉଥ୍ ଓ୍ବେଲ୍ସ ଦଳ ସହ ଟ୍ରେନିଂ ଆରମ୍ଭ କରିଛନ୍ତି। ଯଦି ଟି୨୦ ବିଶ୍ୱକପ୍କୁ ସ୍ଥଗିତ ରଖିବାକୁ ନିଷ୍ପତ୍ତି ନିଆଯାଏ ଆଇପିଏଲ୍ ଖେଳିବାର କୌଣସି ଅସୁବିଧା ନାହିଁ ବୋଲି ସେ କହିଛନ୍ତି। ନିର୍ଦ୍ଦେଶ ଅନୁଯାୟୀ ଆମେ ଯାହା କିଛି କରୁଛୁ। ଆବଶ୍ୟକତା ଅନୁଯାୟୀ ଆମେ କୌଣସି ସ୍ଥାନକୁ ଯାଉଛୁ।
ଗତ ସପ୍ତାହରେ କ୍ରିକେଟ ଅଷ୍ଟ୍ରେଲିଆ ଟି୨୦ ବିଶ୍ୱକପ୍ ଘୁଞ୍ଚାଇବାକୁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)କୁ ଚିଠି ଲେଖିଛି ବୋଲି କୁହାଯାଇଥିଲା। ଜୁନ୍ ୧୦ ତାରିଖରେ ଆଇସିସି ବୈଠକ ବସିବ ଓ ଏଥିରେ ଟି୨୦ ବିଶ୍ୱକପ୍ ସମ୍ପର୍କରେ ନିଷ୍ପତ୍ତି ନିଆଯିବ। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଟି୨୦ ବିଶ୍ୱକପ୍ ଆୟୋଜନ ହେଲେ ଭଲ କଥା। ଆୟୋଜନ ନ ହେଲେ ଘରେ ରହି ଫିଟ୍ ଓ ଷ୍ଟ୍ରଙ୍ଗ୍ ହେବାକୁ ଆମକୁ କୁହାଯାଇଛି ବୋଲି ସ୍ମିଥ୍ କହିଛନ୍ତି। ମ୍ୟାଚ୍ ବେଳେ ଲାଳ ବ୍ୟବହାର କରିବାକୁ ଆଇସିସି କ୍ରିକେଟ କମିଟି ବାରଣ କରିଛି। ତେବେ ଲାଳର ବିକଳ୍ପ ବାହାର କରିବା ନିହାତି କଷ୍ଟକର ବୋଲି ସେ କହିଛନ୍ତି। ଟି୨୦ ବିଶ୍ୱକପ୍ ଓ ଆଇପିଏଲ୍କୁ ବାଦ୍ ଦେଲେ ଏବେ ବିଶ୍ୱ ଟେଷ୍ଟ ଚାମ୍ପିୟନଶିପ୍ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି ଚାମ୍ପିୟନଶିପ୍ ଚାଲୁରହିବା ଜରୁରୀ। ତେବେ ବର୍ତ୍ତମାନ ଆମକୁ ଧୈର୍ଯ୍ୟର ସହ ଅପେକ୍ଷା କରିବାକୁ ହେବ ବୋଲି ସ୍ମିଥ୍ କହିଛନ୍ତି।