ଟି୨୦ ସିରଜ: ୫-୦ରେ ଭାରତର କ୍ଲିନ୍‌ ସୁଇପ୍‌, ରାହୁଲ ପ୍ଲେୟାର ଅଫ୍‌ ଦି ସିରିଜ୍‌

ମାଉଣ୍ଟ ମାଉଁଗାନୁଇ,୩।୨(ପି.ଟି.)- କିକେଟର ସବୁଠାରୁ ଛୋଟ ଫର୍ମାଟ ଟି୨୦ରେ ଭାରତ ରେକର୍ଡ କରିଛି। ବିଶ୍ୱର ପ୍ରଥମ ଦଳ ଭାବେ ଭାରତ ବୃହତ୍‌ ବ୍ୟବଧାନରେ ସିରିଜ ଜିତି ରେକର୍ଡ ସୃଷ୍ଟି କରିଛି। ସ୍ଥାନୀୟ ବେ ଓଭାଲ ଗ୍ରାଉଣ୍ଡରେ ରବିବାର ଖେଳାଯାଇଥିବା ପଞ୍ଚମ ତଥା ଅନ୍ତିମ ଟି୨୦ ମ୍ୟାଚ୍‌ରେ ଭାରତ ୭ ରନରେ ଘରୋଇ ନ୍ୟୁଜିଲାଣ୍ଡକୁ ପରାସ୍ତ କରିଛି। ୫ ମ୍ୟାଚ୍‌ ବିଶିଷ୍ଟ ଏହି ସିରିଜର ସବୁ ମ୍ୟାଚ୍‌ ଜିତି ଭାରତ ୫-୦ରେ କ୍ଲିନ୍‌ ସୁଇପ୍‌ କରି ଏକ ବିରଳ ସଫଳତା ହାସଲ କରିଛି। ଡେଥ୍‌ ଓଭର ସ୍ପୋଶାଲିଷ୍ଟ ଯଶପ୍ରୀତ ବୁମ୍‌ରାଙ୍କ ନେତୃତ୍ୱରେ ଭାରତୀୟ ବୋଲିଂ ବାହିନୀ ଅନ୍ତିମ ୭.୨ ଓଭରରେ ମାତ୍ର ୨୫ ରନ ବ୍ୟୟ କରି ଶେଷ ୭ ଉଇକେଟ ହାସଲ କରି ନ୍ୟୁଜିଲାଣ୍ଡକୁ ଚକ୍‌ମା ଦେଇଥିଲା। ଟସ୍‌ ଜିତି ନ୍ୟୁଜିଲାଣ୍ଡ ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ଭାରତ ନିର୍ଦ୍ଧାରିତ ୨୦ ଓଭରରେ ୩ ଉଇକେଟ ହରାଇ ୧୬୩ ରନ ସଂଗ୍ରହ କରିଥିଲା। ଜବାବରେ ନ୍ୟୁଜିଲାଣ୍ଡ ନିୟମିତ ଅନ୍ତରରେ ଉଇକେଟ ହରାଇବା ସହ ୯ ଉଇକେଟ ହରାଇ ୧୫୬ ରନରେ ସୀମିତ ରହି ବିଜୟଠାରୁ ୮ ରନ ଦୂରରେ ରହିଯାଇଥିଲା। ୪ ଓଭରରେ ମାତ୍ର ୧୨ ରନ ବ୍ୟୟ କରି ମୂଲ୍ୟବାନ ୩ ଉଇକେଟ ଅକ୍ତିଆର କରିଥିବା ଭାରତୀୟ ତାରକା ଦ୍ରୁତ ବୋଲର ବୁମ୍‌ରା ପ୍ଲେୟାର ଅଫ୍‌ ଦି ମ୍ୟାଚ୍‌ ବିବେଚିତ ହୋଇଥିଲେ। ସେହିପରି ସାରା ସିରିଜରେ ଦମ୍‌ଦାର ବ୍ୟାଟିଂ ଓ ଉଇକେଟକିପିଂ ପ୍ରଦର୍ଶନ କରି ତାରକା ଓପନର ଲୋକେଶ ରାହୁଲ ପ୍ଲେୟାର ଅଫ୍‌ ଦି ସିରିଜ ବିବେଚିତ ହୋଇଛନ୍ତି। ଏଥି ସହିତ ବିଦେଶରେ ଭାରତ ତୃତୀୟ ଥର ପାଇଁ ପ୍ରତିପକ୍ଷ ଦଳ ବିପକ୍ଷରେ କ୍ଲିନ୍‌ ସୁଇପ୍‌ କରିବାରେ ସଫଳ ହୋଇଛି। ଏହାପୂର୍ବରୁ ୨୦୧୯ରେ ଭାରତ ଟି୨୦ ସିରିଜରେ ଓ୍ବେଷ୍ଟଇଣ୍ଡିଜକୁ ୩-୦ ଓ ୨୦୧୬ରେ ଅଷ୍ଟ୍ରେଲିଆକୁ ମଧ୍ୟ ୩-୦ରେ ପରାସ୍ତ କରିଥିଲା। ଆସନ୍ତା ୫ ତାରିଖରୁ ଦିନିକିଆ ସିରିଜ ଆରମ୍ଭ ହେବ। ହାମିଲଟନ୍‌ରେ ବୁଧବାର ପ୍ରଥମ ଦିନିକିଆ ମ୍ୟାଚ୍‌ ଆୟୋଜନ ହେବ।
୧୬୪ ରନ ଟାର୍ଗେଟର ପିଛା କରି ନ୍ୟୁଜିଲାଣ୍ଡ ମାତ୍ର ୧୭ ରନରେ ୩ ଉଇକେଟ ହରାଇ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଆଉଟ୍‌ଅଫ୍‌ ଫର୍ମ ଓପନର ମାର୍ଟିନ ଗୁପ୍ଟିଲ ୨ ରନ କରି ବୁମ୍‌ରା ଓ ଅନ୍ୟତମ ଓପନର କଲିନ ମୁନରୋ ୧୫ ରନକରି ଓ୍ବାଶିଂଟନ ସୁନ୍ଦରଙ୍କ ଦ୍ୱାରା ଆଉଟ ହୋଇଥିଲେ। ଏହାପରେ ସଞ୍ଜୁ ସାମସଙ୍କେ ଥ୍ରୋରେ ଟମ୍‌ ବ୍ରୁସ୍‌ ଉଇକେଟ କିପର ରାହୁଲଙ୍କ ଦ୍ୱାରା ଦୁର୍ଭାଗ୍ୟଜନକ ଭାବେ ରନ୍‌ ଆଉଟ ହୋଇଥିଲେ। ଚତୁର୍ଥ ଉଇକେଟରେ ଉଇକେଟକିପର ବ୍ୟାଟ୍ସମ୍ୟାନ ଟିମ୍‌ ସିଫର୍ଟ ଓ ଅଭିଜ୍ଞ ରସ୍‌ ଟେଲର ୫୭ ବଲରୁ ୯୯ ରନ ସଂଗ୍ରହ କରି ସ୍ଥିତି ସମ୍ଭାଳିବା ସହ ନ୍ୟୁଜିଲାଣ୍ଡକୁ ମ୍ୟାଚ୍‌କୁ ଫେରାଇଥିଲେ ଓ ବିଜୟ ସମ୍ଭାବନା ସୃଷ୍ଟି କରିଥିଲେ। ଇନିଂସର ୧୦ମ ଓଭରରେ ଏହି ଦୁଇ ବ୍ୟାଟ୍ସମ୍ୟାନ ଶିବମ ଦୁବେଙ୍କୁ ନିର୍ମମ ପ୍ରହାର କରିଥିଲେ ଓ ରେକର୍ଡ ୩୪ ରନ ସଂଗ୍ରହ କରିଥିଲେ। ତେବେ ସିଫର୍ଟ ୫ ଚୌକା ଓ ୩ ଛକା ସହ ୫୦ ରନର ଅର୍ଦ୍ଧଶତକୀୟ ପାଳି ଖେଳି ନବଦୀପ ସଇନିଙ୍କ ବଲ୍‌ରେ ମିଡ୍‌ ଉଇକେଟରେ ସାମସନଙ୍କୁ କ୍ୟାଚ୍‌ ଦେଇ ପ୍ୟାଭିଲିୟନ ଫେରିଥିଲେ। ଏହାପରେ ନ୍ୟୁଜିଲାଣ୍ଡର ପୁଣି ବିପର୍ଯ୍ୟୟ ଆରମ୍ଭ ହୋଇଥିଲା। ଡାରିଲ ମିଚେଲ ୨, ମିଚେଲ ସାଣ୍ଟନର ୬, ସ୍କଟ କୁଗେଲେଜିନ ବିନା ସ୍କୋରରେ ଆଉଟ ହୋଇଥିଲେ। ତେବେ ଗୋଟିଏ ପଟେ ଟେଲର ଲଢେଇ ଜାରି ରଖିଥିଲେ ମଧ୍ୟ ୪୭ ବଲରୁ ୫ ଚୌକା ଓ ୨ ଛକା ସହ ୫୩ ରନର ଅର୍ଦ୍ଧଶତକୀୟ ପାଳି ଖେଳି ସଇନିଙ୍କ୍‌ ଫୁଲ୍‌ ଓ୍ବାଇଡ ବଲ୍‌କୁ ଖେଳିବାକୁ ଯାଇ ଉଇକେଟ ପଛରେ ରାହୁଲଙ୍କୁ କ୍ୟାଚ୍‌ ଦେଇଥିଲେ। ଟେଲର ଆଉଟ ହେବା ପରେ ନ୍ୟୁଜିଲାଣ୍ଡ ହାରିବା ନିଶ୍ଚିତ ହୋଇଥିଲା। କାମଚଳା ଅଧିନାୟକ ଟିମ୍‌ ସୌଦି ୬ ରନକରି ଆଉଟ ହେବା ପରେ ଅନ୍ତିମ ଓଭରରେ ଇଶ୍‌ ସୋଧି ଶାର୍ଦ୍ଦୂଳ ଠାକୁରଙ୍କୁ ୨ଟି ଛକା ମାରିଥିଲେ ମଧ୍ୟ ଦଳକୁ ଜିତାଇପାରି ନ ଥିଲେ। ଇଶ୍‌ ୧୦ ବଲରୁ ୧୬ ଓ ହାମିଶ ବେନେଟ ୧ ରନକରି ଅପରାଜିତ ରହିଥିଲେ। ବୋଲିଂରେ ବୁମ୍‌ରା ୩, ସଇନି ଓ ଠାକୁର ୨ଟି ଲେଖାଏ, ଓ୍ବାଶିଂଟନ ସୁନ୍ଦର ଗୋଟିଏ ଉଇକେଟ ହାସଲ କରିଥିଲେ।
ଟସ୍‌ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଭାରତ ତରଫରୁ ଓପନିଂ କରିବାର ସୁଯୋଗ ପାଇଥିବା ସାମସନ ପୁଣି ଥରେ ଫେଲ୍‌ ମାରିଥିଲେ ଓ ସେ ୨ ରନ କରି ଆଉଟ ହୋଇଥିଲେ। ଦ୍ୱିତୀୟ ଉଇକେଟରେ ରାହୁଲ ଓ ରୋହିତ ଶର୍ମା ୬୦ ବଲରୁ ୮୮ ରନ ସଂଗ୍ରହ କରିଥିଲେ। ରାହୁଲ ୩୩ ବଲରୁ ୪ ଚୌକା ଓ ୨ ଛକା ସହ ୪୫ ରନ କରି ଆଉଟ ହୋଇଥିଲେ। ୩ ନଂରେ ବ୍ୟାଟିଂ କରିବାକୁ ଆସିଥିବା ରୋହିତ ୪୧ ବଲରୁ ୩ ଚୌକା ଓ ୩ ଛକା ସହ ୬୦ ରନ କରି ରିଟାୟର୍ଡ ହର୍ଟ ହୋଇଥିଲେ। ଦୁବେ ୫ ରନକରି ଆଉଟ ହୋଇଥିବା ବେଳେ ଶ୍ରେୟାସ ଆୟାର ୩୩ (୩୧ ବଲ, ୧ ଚୌକା, ୨ ଛକା) ଓ ମନୀଷ ପାଣ୍ଡେ ୧୧ (୪ ବଲ, ୧ ଚୌକା, ୧ ଛକା) ରନ କରି ଅପରାଜିତ ରହିଥିଲେ। ରାହୁଲ ଓ ରୋହିତ ଆଉଟ ହେବା ପରେ ଭାରତର ବ୍ୟାଟିଂ ଧିମା ହୋଇଥିଲା। ନ ହେଲେ ଭାରତ ଆଉ ଅଧିକ ୧୫/୨୦ ରନ ସଂଗ୍ରହ କରିପାରିଥାନ୍ତା। ବୋଲିଂରେ ନ୍ୟୁଜିଲାଣ୍ଡ ତରଫରୁ ସ୍କଟ କୁଗେଲେଜିନ ୨ ଓ ବେନେଟ ଗୋଟିଏ ଉଇକେଟ ଅକ୍ତିଆର କରିଥିଲେ।